ក្រុមកំណាយជួសជុលស្ពានហាលនៃប្រាសាទព្រះខ័ន ស្ថិតនៅភូមិ តាសែង ឃុំរណសិរ្ស ស្រុកសង្គមថ្មី នៅថ្ងៃ​ទី ១០ ខែ មិថុនា ឆ្នាំ ២០២១ នេះ​បានធ្វើកំណាយប្រទះឃើញដងខ្លួនបដិមាចំនួន១។

ស្ពានរានហាល​គោបុរៈទីមួយនៃប្រាសាទបាកាន ឬព្រះខ័នកំពង់ស្វាយត្រូវបានរៀបចំប្រារព្វពិធីក្រុងពាលី​ជួសជុល​ឡើងវិញកាល​ពី​ចុង​ខែ​ឧសភា​កន្លង​ទៅ​ ក្រោយរងការខូចខាត យ៉ាងធ្ងន់ធ្ងរដោយសារកត្តាអាយុកាល កត្តាធម្មជាតិ ខ្វះការថែរក្សាឲ្យបានដិតដល់​ ជាពិសេសការបំផ្លាញជីកកកាយ រកវត្ថុមានតម្លៃពីសំណាក់មនុស្ស​ទុច្ចរិតកាល​ពីសម័យសង្គ្រាម។

នេះ​មិន​មែន​ជា​លើក​ដំបូង​ទេ​ដែល​ក្រុម​អភិរក្ស​រក​ឃើញ​វត្ថុ​សិល្បៈ​អំឡុង​ពេល​ជួសជុល​ពោល​គឺ​​កន្លង​មក​គេ​បាន​ប្រទះ​ឃើញបំណែកដៃរូបបដិមាករមួយចំហៀង ប្រវែង ០,៥០សង់ទីម៉ែត្រ និង ទទឹង ០,១៥សង់ទីម៉ែត្រ នៅ​ថ្ងៃ​ទី៣១ ខែឧសភា ឆ្នាំ២០២១ ហើយក្រោយមកនៅថ្ងៃទី ០១ ខែ មិថុនា ឆ្នាំ ២០២១ បានកំណាយឃើញ​រូបព្រះកេសចំនួន ០៣ រូប រួច​មក​ហើយ​។

ប្រាសាទព្រះខ័នកំពង់ស្វាយ (អ្នកស្រុកហៅ ប្រាសាទបាកាន) មានចំងាយប្រមាណ ២៩០គីឡូម៉ែត្រ​ពី​រាជ​ធានី​ភ្នំពេញ។ ប្រាសាទបាកាន(ឬ ប្រាសាទព្រះខ័ន កំពង់ស្វាយ) មានទីតាំងស្ថិតនៅភូមិបាកាន ឃុំ​រណសិរ្ស ស្រុកសង្គមថ្មី ខេត្តព្រះវិហារ និងមានចម្ងាយ១០៥គីឡូម៉ែត្រ ពីក្រុងអង្គរ។ប្រាសាទស្ថិត​នៅប៉ែក​ខាងត្បូង​ឆៀងខាងលិចស្រុកសង្គមថ្មី និងមានព្រំប្រទល់ខាងជើងជាប់ឃុំស្តៅ ខាងត្បូងជាប់នឹងឃុំសាគ្រាម ស្រុក​ប្រាសាទបល្ល័ង្ហ ខេត្តកំពង់ធំ រីឯខាងលិចជាប់នឹងឃុំ ខ្វាវ ស្រុកជីក្រែង ខេត្តសៀមរាប និងខាងកើតជាប់​នឹងឃុំរមទម្យ ស្រុករវៀង ខេត្តព្រះវិហារ៕