លោកយាយ ហូ ខាំ ​មានអាយុវែងដល់ទៅ ១០១ឆ្នាំ ជាអ្នករស់នៅរាជធានីភ្នំពេញ បានធ្វើឱ្យមហាជនផ្ទុះការចាប់អារម្មណ៍កាលពីប៉ុន្មានថ្ងៃមុន ក្រោយ​លោកយាយ អញ្ជើញទៅទទួលការចាក់វ៉ាក់សាំងការពារកូវីដ-១៩ នៅមណ្ឌលអនុវិទ្យាល័យចតុមុខ ។

គិតមកទល់ពេលនេះ លោកយាយគឺជាមនុស្សចាស់បំផុតនៅកម្ពុជាដែលទទួលការចាក់វ៉ាក់សាំង។ បើយោងតាមប្រភពពី ហ្វេសប៊ុកឈ្មោះ Heng Sok Kung បានឲ្យដឹងថា លោកយាយ​ បានប្រាប់អាថ៌កំបាំងដែលធ្វើឲ្យមានព្រះជន្មវែង សុខភាពនៅល្អ សាច់ចាំ ហើយស្មារតីចងចាំនៅល្អរហូតសព្វថ្ងៃ ដូចខាងក្រោម៖

១. បរិស្ថានរស់នៅ និងរបបគេងទៀងទាត់ ជារៀងរាល់ថ្ងៃលោកយាយសម្រាន្តនៅម៉ោង ៩:៣០យប់ និងភ្ញាក់នៅម៉ោង ៥ព្រឹក ហើយលោកយាយសម្រាកថ្ងៃត្រង់១ ម៉ោងជារៀងរាល់ថ្ងៃ។

២. របបហាត់ប្រាណ លោកយាយហាត់ប្រាណទៀងទាត់ ទោះបីចាស់ក៏ដោយ ការលើកដៃ ជើង និងតោងដើរចុះឡើងៗ។

៣ -របបទទួលទាន លោកយាយទទួលទានបាយតិចបំផុត តែលោកយាយទទួលទានបន្លែ និងត្រីច្រើន ជាពិសេសលោកយាយចូលចិត្តពិសារ ត្រីសាលម៉ុន ហើយលោកយាយទទួលទានផ្លែឈើច្រើន (២គីឡូក្នុងមួយថ្ងៃ គ្រប់ប្រភេទផ្លែឈើ តាមរដូវកាល) ក្រៅពីនេះលោកយាយទទួលទានទឹកច្រើន និងទៀងទាត់។

ក្នុងនោះដែរ លោកយាយ ហូ ខាំ ​បានទទួលជំនួយឧបត្ថម្ភថវិកាចំនួន​ ៣លានរៀល​ និងសម្ភារៈឧបភោគបរិភោគ ដែលជាអំណោយដ៏ថ្លៃថ្លារបស់ ​សម្តេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្ត្រីនៃព្រះរាជាណាចក្រកម្ពុជា​ ក្រោយលោកយាយ បានស្ម័គ្រចិត្តចាក់វ៉ាក់សាំងកូវីដ-១៩​ នៅសាលាបឋមសិក្សាចតុមុខ៕