Jimin និង V ធ្លាប់ដំឡើងសរសៃកឈ្លោះគ្នា ដោយសារតែរឿងគ្រែដេក

2021-07-06 04:29:04
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលចូលរួមកម្មវិធី «You Quiz The Block» របស់ tvN សមាជិក BTS បានទម្លាយរឿងជាច្រើនទាក់ទងនឹងជីវិតសិល្បៈរបស់ពួកគេ។ ក្នុងនោះ Jimin ក៏បានបង្ហើបរឿងមួយដែរថា លោក និង V ធ្លាប់បានឈ្លោះគ្នាម្ដង ដោយសារតែរឿងគ្រែគេង។

អ្នកណាក៏ដឹងដែរថា Jimin និង V គឺជាមិត្តល្អនឹងគ្នា ហើយអាចហៅថាជាបងប្អូនល្អទៀតផង ប៉ុន្តែមានដឹងទេ ពួកគេក៏ធ្លាប់ឈ្លោះគ្នាញឹកដែរ ប៉ុន្តែពេលនេះ Jimin បានបង្ហើបរឿងមួយគឺពេលពួកគេដណ្ដើមគ្រែគ្នាគេង។

Jimin និយាយថា កាលពីមុនលោក, V និង J-Hope គឺជាមិត្តរួមបន្ទប់ជាមួយគ្នា។ ក្នុងបន្ទប់មាន គ្រែ ២ជាន់ ១ និងគ្រែធម្មតា ១។ ដោយសារក្នុងចំណោមពួកគេទាំង ៣នាក់ J-Hope មានអាយុបងគេ ដូចនេះ Jimin និង V ក៏ឲ្យបងរបស់ពួកគេគេងគ្រែធម្មតា។ ចំណែកពួកគេទាំង ២ត្រូវគេង គ្រែ ២ជាន់នោះ។

ពេលនោះ Jimin ឲ្យ V គេងខាងក្រោម ដោយគិតថាវាស្រួលជាងគេងខាងលើ។ ប៉ុន្តែក្រោយមក ៦ខែ Jimin ក៏បានប្រាប់ V ថាខ្លួនចង់គេងខាងក្រោមវិញ តែ V ក៏ប្រាប់ Jimin វិញថា៖ «ឯងអ្នកជ្រើសដេកនៅខាងលើហើយ ព្រោះឯងចូលចិត្តជាងដេកក្រោម»។

ពេល V និយាយហើយ ជម្លោះក៏ចាប់ផ្ដើមកើតមានតែម្ដង។ Jimin បានពន្យល់ថា គ្រែខាងលើ វាមិនស្រួលទេ ដោយសារតែម៉ាស៊ីនត្រជាក់នៅខាងស្ដាំ ហើយចំពីមុខ មុខរបស់លោក ដូចនេះពេលកម្លាំងខ្យល់បក់មក គឺចំកណ្ដាលមុខតែម្ដង។

Jimin ទ្រាំដេករយៈ ៦ខែ ដូចនេះពេល V និយាយថាមិនដូរជាមួយ Jimin ក៏ដាក់ទៅវិញទៅ V ថា៖ «ឆ្កួតមែន?»

ប៉ុន្តែពេលនោះពួកគេទាំង ២ក៏បានដោះស្រាយបញ្ហា និងមើលត្រលប់ទៅកាលពីមុនវិញ ទើប Jimin ភ្ញាក់ខ្លួនថា ដូចជាគ្មានអ្វីធំដុំទេ ហេតុអ្វីដល់ថ្នាក់ឈ្លោះគ្នា? Jimin ឲ្យដឹងទៀតថា ក្រោយមកពួកគេក៏នឹកឃើញ ខិតគ្រែគេងនោះឲ្យឆ្ងាយពីម៉ាស៊ីនត្រជាក់ ទើបគ្រប់យ៉ាងមានភាពងាយស្រួលវិញ៕