អរជំនួស ចម្រៀង Cover រហូតល្បីខ្លាំង ឥឡូវ សួ វិចិត្រ មានខាងអាមេរិកផង កូរ៉េផងទាក់ទងហើយ

2021-07-08 04:05:58
ចំនួនមតិ 0 | ចំនួនចែករំលែក 0

ចន្លោះមិនឃើញ

សួ វិចិត្រ ដែលដើមឡើយអ្នកចម្រៀងនៅក្នុងក្លឹបកម្សាន្តមួយនៅខេត្តពោធិសាត់នោះ ពេលនេះ បានក្លាយជាតារាចម្រៀងពេញនិយមមួយរូប ដោយការច្រៀង Cover និងបទផ្ទាល់ខ្លួនជាច្រើន រហូតដល់មានម្ចាស់ឧបត្ថម្ភក្រៅប្រទេសទាក់ទងមកហូរហែហើយ។

នេះអាចនិយាយបានថាជា តារាចម្រៀង Cover ទី១ដែលល្បីឈ្មោះខ្លាំងរហូតដល់ម្ចាស់ឧបត្ថម្ភនៅក្រៅប្រទេសបានមើលឃើញ។ តាមសាមីខ្លួនបានឲ្យដឹងថា មានម្ចាស់ឧបត្ថម្ភចំនួន២ ក្នុងនោះ១នៅអាមេរិក និងមួយទៀតនៅប្រទេសកូរ៉េខាងត្បូង បានចាប់អារម្មណ៍នាំយករូបគេទៅច្រៀងបំពេរអារម្មណ៍បងប្អូនខ្មែរដែលនៅប្រទេសទាំងពីរនេះ។

ចាប់ផ្ដើមជីវិតយ៉ាងលំបាកលំបិន ដោយ រកតែបាយហូបសឹងមិនបាន វិចិត្រ ប្រាប់ថា លោកមិនដែលស្រមៃសោះឡើយ អាចមានការហៅទៅច្រៀងនៅបរទេសបែបនេះ។ ដូច្នេះហើយសម្រាប់លោក នេះគឺជារឿងនឹកស្មានមិនដល់ទាល់តែសោះ។ វិចិត្រ បានចាប់ផ្ដើមច្រៀង Cover ដាក់លើយូធូបដំបូងកាលពីប្រមាណជាង១ឆ្នាំមុនប៉ុណ្ណោះ។

ធ្វើបែបនេះ លោកថា ដើមឡើយ គឺគ្រាន់តែរកប្រាក់ពី Youtube រំដោះខ្លួនពីភាពទ័លក្រប៉ុណ្ណោះ ព្រោះមិនដឹងថាត្រូវធ្វើអ្វី ដោយមិនរំពឹងបានល្បីឈ្មោះអីនោះទេ។ ប៉ុន្តែក្រោយពីលោកបានច្រៀង Cover បទ "ឧបសគ្គស្នេហ៍" របស់តារាចម្រៀង ហាក់ រីខត ដាក់លើ TikTok ផ្ទុះខ្លាំងមក លោកក៏ចាប់ផ្ដើមមានគេស្គាល់ និងគាំទ្រខ្លាំងៗឡើងៗ។

សួ វិចិត្រ មានសំឡេងល្អ ធ្ងន់ និងចេះប្រើសំឡេងបានល្អ។ បន្ថែមពីលើគុណសម្បត្តិទាំងនេះ លោកថែមទាំងអាចច្រៀងបានស្ទើរគ្រប់ប្រភេទបទចម្រៀងកម្ររកបាន ក្នុងនោះលោកអាចច្រៀងបានទាំងប្រភេទបទយុវវ័យ បទប្រជាប្រិយ និងអាចច្រៀងបទប្រភេទតុងខ្ពស់ៗបានយ៉ាងល្អថែមទៀត។ ដោយសារបែបនេះ បូកផ្សំនឹងអត្តចរិតឬកពាកសុភាព និយាយស្ដីដឹងខុសត្រូវ ចេះឱនលំទោន វិចិត្រ ទទួលបានការគាំទ្រ និងចូលចិត្តយ៉ាងច្រើន។

ស្ថានភាពបែបនេះ លោកថា ការងារកាន់តែអំណោយផល ដោយក្នុងនោះលោកត្រូវបានម្ចាស់កម្មវិធី ការ ខួបកំណើត និងកម្មវិធីទូរទស្សន៍មួយចំនួនហៅលោកឡើងច្រៀងហូរហែ ដែលធ្វើលោកអាចរកប្រាក់បានកាន់តែច្រើនជាងមុន។ រឹតតែពិសេស គឺមានបងប្អូនខ្មែរនៅបរទេសក៏ស្រឡាញ់ចូលចិត្ត រហូតមានម្ចាស់ឧបត្ថម្ភចង់នាំយកលោកទៅច្រៀងថែមទៀត។

តាម វិចិត្រ ម្ចាស់ឧបត្ថម្ភនៅអាមេរិក និងកូរ៉េ បានទាក់ទងមកលោកថ្មីៗ ក្នុងបំណងនាំលោកទៅច្រៀងនៅប្រទេសទាំងពីរ។ យ៉ាងណា លោកមិនទាន់សម្រេចចិត្តបែបណានៅឡើយ។ លោកថា លោករីករាយខ្លាំងនឹងឱកាសនេះ ប៉ុន្តែអ្វីដែលកំពុងគិត គឺស្ថានភាពកូវីដ១៩ ដែលធ្វើឲ្យស្ទាក់ស្ទើរ និងមិនទាន់ហ៊ានសម្រេចចិត្ត។

“ខ្ញុំសប្បាយចិត្តណាស់បង គ្រាន់តែមានគេទាក់ទងមក តែអ្វីដែលកំពុងគិតគឺរឿង កូវីដ១៩...ពិបាកណាស់បង...លឺថាទៅគេឃុំ ១៤ថ្ងៃ មកគេឃុំ ១៤ថ្ងៃ ហឺ...ខាងកូរ៉េ លឺថា គេដឹងតែឃុំហើយ តែអាមេរិកអត់ទាន់ដឹងថាម៉េច...ដល់អីចឹងពិបាកណាស់បង ខ្ញុំអត់ទាន់ដឹងថាម៉េចទេ!”។

ថ្មីៗនេះ គេឃើញ សួ វិចិត្រ បានស្វះស្វែងរកកន្លែងធ្វើលិខិតឆ្លងដែន។ ចំណុចនេះ វិចិត្រ ប្រាប់ថា លោកធ្វើទុកឲ្យហើយ ប្រសិនបើអ្វីៗល្អប្រសើរ លោកនឹងឆ្លើយអូខេភ្លាមៗទៅម្ចាស់ឧត្ថម្ភទាំងកូរ៉េ និងអាមេរិក។ តាមតារាចម្រៀង ប្រសិនបើកូវីដ១៩ មិនរាំងស្ទះ ក្នុងរង្វង់ខែ តុលា ២០២១ ខាងមុខ លោកអាចចេញទៅច្រៀងនៅកូរ៉េជាលើកទី១។ ដោយឡែក អាមេរិក ក៏អាចទៅនៅតំណាក់កាលបន្ទាប់ប្រសិនបើស្ថានភាពកូវីដបានធូរស្រាលដែរ៕

អត្ថបទ៖ ទារិកា