អ្នកចាំទីដៃទី១ក្លឹបបាល់ទាត់ព្រះខ័នរាជស្វាយរៀង អាំ សុវណ្ណរ៉ាត់ បានឱ្យ​ដឹងថ្ងៃនេះថា ការចែកគ្នា​ម្នាក់មួយ​ពិន្ទុ​ជាមួយភ្នំពេញក្រោនមិនអាក្រក់ពេកទេ ប៉ុន្តែគេ​សោកស្ដាយដ្បិតត្រូវការពិន្ទុចាំបាច់ ដើម្បីប្រជែងកំពូលតារាង ខណៈពេលក្រុម​ខ្លួន​បើកការនាំមុខ ២-០ មុនទៅហើយនោះ។

ក្នុងជំនួបក្រៅដីនៃក្របខ័ណ្ឌលីគកំពូលកម្ពុជាម្សិលមិញ អ្នកចាំទីឆ្នើមរូបនេះ ជួយសង្រ្គោះបាល់គ្រោះថ្នាក់បានច្រើន ស្របពេលក្រុមសិង្ហក្រហម ស៊ុតចំគោលដៅដល់ទៅ១១ជើង ចំណែកព្រះខ័នរាជស្វាយរៀងស៊ុតចំគោលដៅតែ៥ជើងប៉ុណ្ណោះ។

សុវណ្ណរ៉ាត់ បានបញ្ជាក់ប្រាប់ Sabay ថា ៖«សប្បាយចិត្តដែរ ដែលខ្ញុំបានបំពេញតួនាទីនិងសង្គ្រោះបាល់បានច្រើន ហើយយើងដឹងហើយថាភ្នំពេញក្រោនឆ្នាំនេះ ខ្សែប្រយុទ្ធគេគឺល្អៗខ្លាំងជាងឆ្នាំមុនច្រើន ការរៀបចំរបស់គេក៏ប្រសើរជាងមុន។ អ៊ីចឹងសប្បាយចិត្តដែរដែលជួយសង្គ្រោះបានច្រើន តែយ៉ាងណាក៏នៅតែស្ដាយដោយសាររបូតដល់ទៅ៣គ្រាប់។ ស្ដាយ! ចំពោះលទ្ធផលវិញ បើយើងនិយាយទៅវាមិនអាក្រក់ពេកទេសម្រាប់ទទួលបានមួយពិន្ទុ ប៉ុន្តែយើងដឹងហើយថាការប្រកួតនីមួយៗ យើងដាច់ខាតយើងចង់បានលទ្ធផល៣ពិន្ទុ ដើម្បីប្រជែងកំពូលតារាង»។

ម្ចាស់ផ្ទះភ្នំពេញក្រោន បានដាក់សម្ពាធខ្លាំងមកលើក្រុមជើងឯកលីគកំពូលកម្ពុជា២សម័យកាល និងធ្វើបានល្អជាង ជាពិសេសកីឡាករវ័យក្មេង លឹម ពិសុទ្ធ រកបានពីរគ្រាប់តាមស្មើ (45’+2, 62’) បន្ទាប់ពី Privat របស់ព្រះខ័នរាជស្វាយរៀង រកបានពីរគ្រាប់នាំមុខមុន​នៅតង់ទីមួយ (39’, 45’)។ យ៉ាងណានៅជើងទី២ខាងមុខ នៅកីឡដ្ឋានស្វាយរៀង សុវណ្ណរ៉ាត់ ជឿជាក់ក្រុមរបស់ខ្លួននឹង​ធ្វើបានល្អជាងនៅ​ Smart RSN និងព្យាយាមមិនឱ្យ​របូតគ្រាប់បាល់ច្រើនដូចប្រកួតនេះឡើយ។

បីគ្រាប់របស់ព្រះខ័នរាជស្វាយរៀង រកបានដោយខ្សែប្រយុទ្ធ Privat (39’, 45’) និង Lopes Mendy (80’) ចំណែកក្រុមជើងឯកលីគកំពូលកម្ពុជា ៦សម័យកាលភ្នំពេញក្រោន ធ្វើបានសម្រេចដោយ លឹម ពិសុទ្ធ (45’+2, 62’) និង ប្រាក់ ធីវ៉ា (73’)៕

តារាង​ចំណាត់​ថ្នាក់​បណ្ដោះ​អាសន្ន

អត្ថបទ៖ អ៊ុំ សុភក្តិ