តារាសម្ដែងប្រុសសម្បូរសាច់ដុំ និងពេញសមត្ថភាពទាំងនេះ សុទ្ធតែមានឈ្មោះក្នុងជួរកងកម្លាំងបម្រើជាតិ

2021-07-26 09:40:54
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករ-សិល្បការិនីខ្មែរស្ទើរគ្រប់ជំនាន់ នៃការប្រឡងចូលសិល្បៈ ឬបោះជំហានចូលវិស័យសិល្បៈ តែងតែមានមុខរបរ ឬក្របខ័ណ្ឌរដ្ឋមួយបន្ថែមពីលើអាជីពរបស់ពួកគេរៀងៗខ្លួន។ តារាៗដែលមានមុខជំនួញ ឬក្របខ័ណ្ឌរដ្ឋ អាចមានច្រើន ប៉ុន្តែមិនត្រូវបានសាមីខ្លួនបញ្ចេញឲ្យដឹងជាសាធារណៈទេ។ ថ្ងៃនេះSabayចាប់អារម្មណ៍លើតារាសម្ដែងប្រុស៣ដួង។

នៅចុងឆ្នាំ២០២១ នេះ តារាសម្ដែងប្រុស៣ដួង បង្ហាញខ្លួនកាន់តែលេចធ្លោ និងចាប់ផ្ដើមមានទីផ្សារសិល្បៈឡើងវិញបើទោះបីជាកម្ពុជានៅតែបន្តញាំញីដោយវិបត្តិជំងឺកូវីដ-១៩។ តារាសម្បូរសាច់ដុំ និងរូបសម្បត្តិស្រស់សង្ហាទាំងនោះសុទ្ធតែកំពុងបម្រើការងារនៅក្នុងវិស័យសន្តិសុខជាតិ គឺមានដូចជា៖ លោក ភុល សុណ្ណដានីន លោក ប៉ែន ភ័ក្រសុធារិទ្ធ និងលោក ជាកែវ សុវណ្ណ ហៅជា សុវណ្ណនរាហ៍។

១/ បើនិយាយពីតារាសម្ដែងប្រុស ភុស សុវណ្ណដានីន លោក គឺជាតារាសម្ដែងវ័យកណ្ដាលដ៏មានប្រជាប្រិយភាពទាំងការសម្ដែងក្នុងខ្សែភាពយន្តភាគ ភាពយន្តខ្នាតធំ និងរឿងអប់រំ ព្រមទាំងស្ពតពាណិជ្ជកម្មផ្សេងៗ។ លោកមានឋានន្តរសក្ដិជាវរសេនីយ៍ទោ និងមានតួនាទីជានាយរងការិយាល័យ នាយកដ្ឋានកិច្ចការប៉ុស្តិ៍នគរបាលរដ្ឋបាល នៃអគ្គស្នងការនគរបាលជាតិ។

២/លោក ប៉ែន ភ័ក្ដ្រសុធារិទ្ធ។ តារាសម្ដែងដែលគិតត្រឹមឆ្នាំ២០២១ នេះ មានវ័យ៣០ឆ្នាំ កំពុងមានទីផ្សារខ្ពស់ល្អក្នុងវិស័យភាពយន្តខ្មែរ បន្ទាប់ពីលោកឈានជើងចូលសិល្បៈដំបូងក្នុងឆ្នាំ២០១០ តាមរយៈការដើរម៉ូត។ បច្ចុប្បន្នក្រៅពីអាជីពសម្ដែងលោកក៏មានឈ្មោះនៅក្នុងក្របខ័ណ្ឌរដ្ឋមួយដែរ។

តារាសម្ដែងរូបនេះធ្លាប់ប្រាប់Sabay ថា លោកបានសម្រេចនូវក្ដីប្រាថ្នារបស់ប៉ា ក៏ដូចជាខ្លួនឯងដែលបានប្រឡងជាប់ជាមន្ត្រីនគរបាល។ បើតាមការបង្ហើបរបស់សុធារិទ្ធ លោកជាមន្ត្រីនគរបាលម្នាក់នៅការិយាល័យចរាចរណ៍ផ្លូវគោក នៃអគ្គស្នងការដ្ឋាននគរបាលជាតិ ក្រសួងមហាផ្ទៃ។

៣/លោក ជា សុវណ្ណនរាហ៍ មានឈ្មោះពិតថា ជាកែវ សុណ្ណ។ តារាសម្ដែងរូបនេះត្រូវបានមហាជនស្គាល់កាន់តែច្រើនតាមរយៈការសម្ដែងខ្សែភាពយន្តភាគ និងភាពយន្តខ្នាតធំរបស់ផលិតកម្ម អិល ឌី គឺរឿង"ជួបស៊យ" ដោយលោកបានដើរជាតួបងប្រុសបង្កើត"អាស៊យ" សម្ដែងដោយនាយគ្រឿន។ នៅពីក្រោយភាពល្បីល្បាញនេះ គេមិនសូវដឹងឡើយថាលោកមានតួនាទីអ្វីបន្ថែមពីលើអាជីពសម្ដែងនោះទេ។ តាមពិតលោក ជាមន្ត្រីកងកម្លាំងម្នាក់ នៃក្រសួងការពារជាតិ។

តារាសម្ដែងរូបស្រស់សង្ហានេះធ្លាប់បង្ហើបថា ក្រៅពីអាជីពសម្ដែងលោកមានឈ្មោះក្នុងក្របខ័ណ្ឌរដ្ឋមួយដែរ គឺជាមន្ត្រីយោធាកំពុងធ្វើការងារនៅការិយាល័យមួយក្នុងទីស្ដីការក្រសួងការពារជាតិ។ លោកក៏មានបងប្អូនធ្វើការនៅក្រសួងជាមួយគ្នាដែរ ខណៈបងប្រុសបង្កើតម្នាក់កំពុងបម្រើការងារនៅក្រសួងព័ត៌មាន ប៉ុន្តែក្នុងចំណោមបងប្អូនលោក គឺមានតែលោកម្នាក់គត់ដែលជាមន្ត្រីរាជការផង និងចាប់យកអាជីពសិល្បៈផង ហើយការងារទាំងពីរអាចធ្វើបានជាធម្មតា៕

អត្ថបទ៖ ជិន សុភ័ក្ដ្រ