ជាអ្នកដឹកជញ្ជូនអាហារឱ្យភ្ញៀវ មិនថាមេឃក្ដៅ ត្រជាក់ ភ្លៀងខ្លាំងប៉ុណ្ណាក៏ដោយ គឺនៅតែពុះពារតស៊ូ ធ្វើយ៉ាងណាដឹកជញ្ជូនរបស់ឱ្យដល់គោលដៅ។ ជាពិសេស ពេលមេឃកំពុងភ្លៀង គ្មានអ្នកណាចង់ធ្វើដំណើរតាមផ្លូវនោះទេ ប៉ុន្តែ ជាអ្នកដឹកជញ្ជូនគឺ ត្រូវជិះកាត់ភ្លៀង ផ្គរ រន្ទះ និងខ្យល់ជាដើម។

តួយ៉ាងដូច​ជា អ្នកស្រី ព្រហ្ម ដាវ៉ាន់ មានអាយុ ៣២ ឆ្នាំ ជាភ្នាក់ងារដឹកជញ្ជូនរហ័ស​ម្នាក់របស់ក្រុមហ៊ុន foodpanda ដោយលោកស្រីបានចាប់អាជីពជាអ្នកដឹកជញ្ជូនអស់រយៈពេលជាងមួយឆ្នាំកន្លះមកហើយ។ ក្នុង​ការ​ងារ​ប្រចាំ​ថ្ងៃ​របស់​អ្នក​ស្រី ជាទូទៅក្នុងមួយថ្ងៃអ្នកស្រី អាចដឹកបានពីចន្លោះ៨ ទៅ ៩ម៉ោងឯណោះ។

អ្នក​ស្រី ព្រហ្ម ដាវ៉ាន់ បាន​កត់សម្គាល់​ឃើញ​ថា ក្នុងរដូវ​វស្សា​នេះ មាន​ការកុម្ម៉ង់ច្រើន​ពី​អតិ​ថិ​ជន អ្នក​ស្រី​ពិតជា​រីក​រាយ​​ក្នុងការបម្រើ​សេវាដល់ដៃ​អតិថិជន ព្រោះ​ការ​ដឹក​ជញ្ជូន​ឱ្យ​ភ្ញៀវ​បាន​កាន់​តែ​ច្រើន អ្នក​ស្រី​ក៏​អាច​រក​បាន​ចំណូល​ច្រើន​ផង​ដែរ។

អ្នក​ស្រី​បាន​ឱ្យដឹង​ថា៖ «នៅក្នុងរដូវវស្សានេះ ចំនួននៃការកុម្ម៉ង់អាហារពីអតិថិជនតាមរយៈអេប foodpanda កាន់តែច្រើនជាងមុន ព្រោះថាភាគច្រើនគេមិនចង់ចេញក្រៅ ពិបាកទិញរបស់ញ៉ាំ ដូច្នេះកុម្ម៉ង់តាមអេបងាយស្រួលជាង»។

អ្នក​ស្រីបានបន្ថែមទៀតថា៖ «ការកុម្ម៉ង់នៅក្នុងរដូវវស្សាមានកំណើនកើនឡើងច្រើនជាងមុន ធ្វើឱ្យខ្ញុំអាចរកចំណូលបានច្រើនទៅតាមនឹងដែរ មួយវិញទៀតថ្ងៃណាហេងមានភ្ញៀវខ្លះឱ្យលុយធីប ផងដែរ»។

ប៉ុន្ដែយ៉ាងណាមិញ អ្នកស្រីក៏បានជួបផលវិបាកមួយចំនួនព្រោះថា ជាអ្នកដឹកត្រូវការមើលទូរសព្ទតាមដងផ្លូវ ដើម្បីរកមើលទីតាំងរបស់ភ្ញៀវ ពេលខ្លះត្រូវឈប់ម៉ូតូភ្លាមៗ។

នៅពេលមានភ្ញៀវកុម្ម៉ង់ ហើយស្របពេលមេឃកំពុងភ្លៀងផងដែរនោះគឺ ខ្លាចរន្ទះ ផ្លូវរអិល និងសុវត្ថិភាពតាមផ្លូវ ពេលខ្លះទៀត យកអីវ៉ាន់ទៅយឺត ភ្ញៀវក៏មានអារម្មណ៍មិនសូវល្អ មិនសប្បាយចិត្តទៅតាមនឹងដែរ។

ជាការពិត​ណាស់ ការងារអ្វីក៏មិនស្រួលនោះដែរ តែ​ជាមនុស្សស្រី ត្រូវមកធ្វើការងារនៅលើដងផ្លូវច្រើន គ្រួសារតែងតែបារម្ភពីសុវត្ថិភាព ពេលធ្វើដំណើរ និងបារម្ភពីសុខភាព​ ព្រោះថាត្រូវជិះកាត់ថ្ងៃ កាត់ភ្លៀងរាល់ថ្ងៃ។

យ៉ាងណាមិញអាជីពជាអ្នកដឹកជញ្ជូនអាហារនេះ អាចជួយឱ្យអ្នកស្រីមានប្រាក់ចំណូលផ្គត់ផ្គង់គ្រួសារ និងកូនឱ្យមានជីវភាពល្អប្រសើរជាងមុន។

ចាប់តាំងពី​ចាប់អាជីពមួយនេះ អ្នកស្រី ព្រហ្ម ដាវ៉ាន់ ពិតជាស្រឡាញ់ការងាររបស់អ្នក​ស្រីខ្លាំងណាស់ ហើយគាត់បានប្រាប់ទៀតថាទៅថ្ងៃអនាគត បើទោះបីជាអាចបើកអាជីវកម្មខ្លួនឯងក៏ដោយ ក៏មិនឈប់ពីការងារជាអ្នកដឹកជញ្ជូននេះដែរ ព្រោះថានេះជាការងារដែលអាចរកចំណូលជួយផ្គត់ផ្គង់គ្រួសារបាន ព្រមទាំងអាចផ្លាល់ប្ដូរពេលដឹកបានគ្រប់ពេល និយាយរួមគឺទំនេរពេលណា គឺអាចដឹកបានពេលនោះ មិនប្រកាន់ពេលវេលានោះទេ។

ជាក់ស្ដែងបច្ចុប្បន្ននេះ foodpanda មានដៃគូដឹកជញ្ជូនជាស្រ្ដីកាន់តែច្រើន ទាំងទីក្រុង និងតាមបណ្ដាខេត្ត។ ត្រឡប់មកវិញ ការធ្វើការងារ ប្រក​បរបររកស៊ី សុទ្ធតែមិនងាយស្រួលនោះទេ ហេតុនេះការតស៊ូព្យាយាមជារឿងមួយដ៏ចម្បងសម្រាប់មនុស្សម្នាក់ៗ៕

អត្ថបទ៖ សុខុន សុម៉ាភាវី