ព្រះបរមរតនកោដិ អតីតព្រះប្រមុខរដ្ឋ សម្ដេច សីហនុ ធ្លាប់មានព្រះរាជឱង្ការ ចំពោះ ខ្លូត សាម៉េត យ៉ាងក្ដុកក្ដួល

2021-08-17 09:58:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់បទ"សារិកាកម្សត់" និងជាម្ចាស់ជយលាភីលេខ១ ផ្នែកចម្រៀងសម័យនាទស្សវត្ស៦០ គឺតារាចម្រៀងស្រី ខ្លូត សាម៉េត បានបង្កើតឲ្យមហាជនចាប់អារម្មណ៍ជាថ្មី។ តារាចម្រៀងរូបនេះ បានបង្ហាញវត្តមានជាថ្មី តាមរយៈបទសម្ភាសន៍ដ៏កម្រមួយជាមួយអ្នកស្រាវជ្រាវខាងសិល្បករចាស់ៗ គឺក្រុមព្រះសុរិយា។

បន្ទាប់ពីបាត់មុខឈឹងពីសិល្បៈជាច្រើនទសវត្ស ឥឡូវនេះអ្នកស្រី ខ្លូត សាម៉េត កំពុងស្ថិតនៅក្នុងវ័យជរា ហើយពុំមានអ្នកណាម្នាក់បាននឹកនាពីឈ្មោះ ជីវប្រវត្តិ និងស្នាដៃរបស់អ្នកស្រីឡើយ។ ថ្ងៃនេះSabay សូមលើកយកជីវប្រវត្តិរបស់តារាចម្រៀងល្បីឈ្មោះកាលពីទស្សវត្ស៦០ និងដើមទស្សវត្ស៧០ ខ្លូត សាម៉េច មកបង្ហាញជូនប្រិយមិត្តដោយផ្នែកលើប្រភពក្រុមព្រះសុរិយាដូចតទៅ៖

"ស្ថានភាពគ្រួសារ" លោកស្រី ខ្លូត សាម៉េត កើតនៅថ្ងៃទី១ ខែកញ្ញា ឆ្នាំ១៩៥៣ នាថែវព្រះបរមរាជវាំង ក្នុងសង្កាត់លេខ៦ រាជធានីភ្នំពេញ ដោយមានឪពុកឈ្មោះ សំ មិន ជាទាហានហ្លូង និងជាតន្ត្រីករប្រចាំក្រុមតន្ត្រីភិរម្យ។ រីឯម្ដាយឈ្មោះ ស ណែម ជាអ្នកបម្រើព្រះមហាក្សត្រក្នុងរជ្ជកាលព្រះបាទព្រះនរោត្ដមសីហនុ។ លោកស្រី ខ្លូត សាម៉េត ជាកូនទី២ ក្នុងចំណោមបងប្អូនចំនួន៦រូប ក្នុងនោះរួមមាន៖ បងប្រុសច្បងឈ្មោះ ខ្លូត សាម៉ុន ប្អូនស្រីទី៣ឈ្មោះ ខ្លូត សាមុំ ប្អូនប្រុសទី៤ ឈ្មោះ ខ្លូ សាមាន ប្អូនស្រីទី៥ឈ្មោះ ខ្លូត ស៊ីថាច និងប្អូនស្រីពៅ ឈ្មោះខ្លូត ស៊ីថុល។

"ប្រវត្តិសិក្សាចំណេះដឹងទូទៅ និងសិល្បៈ" នៅអាយុ៧ឆ្នាំ ឪពុករបស់អ្នកស្រី ខ្លួត សាម៉េត បានសង់ផ្ទះ១ខ្នងនៅម្ដុំវត្តសន្សំកុសល គ្រួសារគាត់ផ្លាស់ទៅរស់នៅទីនោះ ហើយអ្នកស្រីក៏បានចូលរៀននៅសាលាបឋមសិក្សាផ្សារដើមថ្កូវ។ នៅអំឡុងឆ្នាំ១៩៦៣ ក្នុងវ័យ១០ឆ្នាំ អ្នកស្រីបានចូលរៀនផ្នែកតន្ត្រី និងចម្រៀងនៅសាលាតូយ៌តន្ត្រីលោក ម៉ៅ វីណា ដែលមានទីតាំងនៅក្បែរសាលាបឋមសិក្សាទួលគោក។

នៅទីនោះ អ្នកស្រី បានរៀនសូត្រអក្សរភ្លេង និងការច្រៀងជាមួយអ្នកគ្រូ អ៊ុំ សាវយុទ្ធ និងលោក កុល សែម។ ដោយមានទេពកោសល្យខ្ពស់ និងមាននិស្ស័យពីកំណើត នៅឆ្នាំ១៩៦៧ ពោលគឺនៅក្នុងវ័យ១៤ឆ្នាំ លោកស្រី ខ្លូត សាម៉េត បានចេញច្រៀងក្នុងវង់តន្ត្រីកំពង់ត្រាំ ដែលពេលនោះវង់តន្ត្រីនេះនិយមចម្រៀងបទល្បីៗដែលចេញផ្សាយតាមវិទ្យុ និងការប្រគំនៅក្នុងពិធីបុណ្យចូលឆ្នាំ និងពិធីបុណ្យភ្ជុំបិណ្ឌសម្រាប់រោងចក្រកំពង់ត្រាំតែម្ដង។

នៅចុងឆ្នាំ១៩៦៧ ក្រុមតន្រីរបស់អ្នកស្រីបានទទួលបេសកកម្មមួយទៅប្រគំអបអរសាទរព្រះរាជវត្តមានសម្ដេចព្រះនរោត្ដមសីហនុ ដែលយាងសម្ពោធសមិទ្ធផលរោងចក្រអំពៅ នៅខេត្តបាត់ដំបង។ ដោយវង់តន្ត្រីកំពង់ត្រាំ ត្រូវចូលលេងជាមួយវង់តន្ត្រីយោធាភិរម្យ។ នៅពេលនោះ អ្នកស្រី ខ្លូត សាម៉េត បានហាត់រៀនច្រៀងចម្រៀងថ្មីមួយ គឺបទ”សម្រស់កំពង់គល់”។ បទនេះ ត្រូវបានលោក កែវ សារ៉ាត់ យកមកច្រៀងដោយកែទំនុកច្រៀងថ្មី ដោយដាក់ថា"ខាវ អ៊ីដាងដួងចិត្ដ"។

ពេលសម្ដេចព្រះប្រមុខរដ្ឋបានយាងមកដល់ ស្នូរទះដៃអបអរសាទរ និងការប្រគំឡើងនូវបទ"សម្រស់កំពង់គល់" ដែលបកស្រាយដោយអ្នកស្រី ខ្លូត សាម៉េត បានបន្លឺឡើងព្រមគ្នា បានធ្វើឲ្យព្រះប្រមុខរដ្ឋសព្វព្រះរាជហឫទ័យ ដោយឈរនៅមុខវេទិកាប្រគំតន្ដ្រី ហើយក៏យាងឡើងលើឆាកប្រគំន្ដ្រីនោះ ព្រមទាំងមានព្រះរាជអង្គការទៅកាន់អ្នកស្រី ខ្លូត សាម៉េត ថា៖"កូន! កូនច្រៀងពីរោះណាស់...កូនគួរទៅប្រឡងច្រៀងនៅសមាជជាតិ"។ ដោយក្ដីរំភើបរកអ្វីប្រៀបផ្ទឹមពុំបាន ពេលនោះអ្នកស្រី ខ្លូត សាម៉េត បានឆ្លើយតបវិញថា៖"ព្រះពរ ខ្ញុំម្ចាស់នឹងទៅប្រឡង"។ សម្ដេចព្រះប្រមុខរដ្ឋទ្រង់ក៏បានយកព្រះហស្តទៅបោសអង្អែលក្បាលរបស់នាង ហើយព្រះអង្គក៏មានព្រះរាជអង្គការទៀតថា៖"អីចឹង...យើងជួបគ្នានៅសមាជជាតិណាកូន"។

ព្រះរាជឱង្ការនេះហើយដែលជំរុញឲ្យអ្នកស្រី ខ្លូត សាម៉េត កាន់តែមានទឹកចិត្តដាក់ពាក្យចូលប្រឡងក្នុងសមាជជាតិក្នុងឆ្នាំ១៩៦៨។ ក្នុងសមាជនោះ មានបេក្ខជន-បេក្ខនារីជាង៥០០នាក់នៅទូទាំងប្រទេសបានដាក់ពាក្យប្រឡង ហើយអ្នកស្រីបានលើកយកបទ"សារិកាកម្សត់" ដែលជាបទថ្មីរបស់វង់តន្ដ្រីសូរាកេរ្ដិ៍ខ្មែរ ជាស្នាដៃនិពន្ធបទភ្លេងដោយលោក ហាស់ សាឡន និងទំនុកច្រៀងដោយលោក ម៉ា ស៊ីម៉ុន។ នៅក្នុងរាត្រីប្រឡងនារាជធានីភ្នំពេញនោះ អ្នកស្រី ខ្លូត សាម៉េត ដែលកាលណោះមានវ័យ១៥ឆ្នាំ បានជាប់ចំណាត់ថ្នាក់លេខ១ ផ្នែកនារី ចំណែកជយលាភីលេខ១ផ្នែកបុរស គឺបានទៅលើលោក សាំង សេងអាន។

រូបថត និងប្រភព៖ ក្រុមព្រះសុរិយា

"ប្រវត្តិការងារ និងចូលសិល្បៈពេញលេញ" ក្រោយប្រឡងជាប់ភ្លាម អ្នកស្រី ខ្លូត សាម៉េត បានក្លាយជាតារាចម្រៀងប្រចាំនៅវង់តន្ដ្រីសូរាកេរ្ដិ៍ខ្មែរដែលដឹកនាំដោយព្រះអង្គម្ចាស់ស៊ីសុវត្ថិ ចរិយា។ ពេលនោះ អ្នកស្រី ខ្លូត សាម៉េត បានទទួលប្រាក់បៀវត្សប្រចាំខែចំនួន២២០០ប្រចាំខែ។ បន្ទាប់មកទៀត ពោលគឺនៅក្រោយរដ្ឋប្រហារទម្លាក់ព្រះនរោត្ដម សីហនុ ពីព្រះប្រមុខរដ្ឋ អ្នកស្រី ខ្លូត សាម៉េត នៅតែបន្ដអាជីពចម្រៀងតាមរាំងសាល ហើយបានថតចម្រៀងជាច្រើនបទផ្សាយតាមវិទ្យុជាតិ គឺមានដូចជា៖បទ"ទឹកចិត្តភរិយាទាហាន" បទ"នារីក្លាហាន" និងបទចម្រៀងជាច្រើនទៀតតែបាត់បង់គ្មានសល់។

"ជីវិតឆ្លងកាត់របបថ្មី និងចំណងអាពាហ៍ពិពាហ៍លើកទី១" លុះមកដល់ឆ្នាំ១៩៧១ អ្នកស្រី ខ្លូត សាម៉េត បានចូលបម្រើការងារនៅវង់តន្ត្រីកងពលតូចលេខ១៥។ ពេលនោះហើយដែលអ្នកស្រីបានភ្ជាប់ទំនាក់ទំនងស្នេហា និងបានរៀបការជាមួយលោក គង់ សោភ័ណ្ឌ ជាតន្ត្រីករ នៃវង់តន្ដ្រីឃីងប្លូ និងជាទាហានក្នុងកងពលថ្មើជើងលេខ១៥។ លោក គង់ សោភ័ណ្ឌ គឺជាកូនប្រុសរបស់ក្រឡាបញ្ជីខេត្ដតាកែវ។ អ្នកស្រី និងស្វាមី មានកូនប្រុស-ស្រីចំនួន៣នាក់ ជាចំណងដៃ ក្នុងនោះកូនស្រីច្បងឈ្មោះ គង់ សោភ័ណ្ឌនារី កូនទី២ឈ្មោះ គង់ វណ្ណៈ និងកូនទី៣ ឈ្មោះ គង់ សុភ័ក្ដ្រ។

"ស្ថានភាពគ្រួសារក្នុងរបបខ្មែរក្រហម" អ្នកស្រី ខ្លូត សាម៉េត បានបន្ដវិស័យសិល្បៈតាមអាជីពចម្រៀង និងសម្ដែងខ្លះផង រហូតដល់របបខ្មែរក្រហមចូលមកដល់។ ស្វាមី និងកូនៗទាំងអស់របស់អ្នកស្រី ត្រូវបានខ្មែរក្រហមសម្រាប់ចោលជាបន្តបន្ទាប់នៅភូមិត្រឡោក ខេត្ដកំពង់ធំ។ ក្រោយរបបខ្មែរក្រហមបញ្ចប់ទៅលោកស្រីបានត្រឡប់មករស់នៅភ្នំពេញវិញក្នុងនាមជាស្ដ្រីមេម៉ាយ ហើយចូលបម្រើក្នុងនាយកដ្ឋានសិល្បៈផ្នែកចម្រៀងដដែល។

"ជីវិតអាពាហ៍ពិពាហ៍លើកទី២" ប៉ុន្តែក្រោយមក គឺនៅឆ្នាំ១៩៨២ អ្នកស្រី ខ្លូត សាម៉េត បានរៀបមង្គលការម្ដងទៀតជាមួយលោក ញ៉ឹក ស៊ីដេត ជាមន្ដ្រីរាជការ។ អ្នកស្រី និងស្វាមីទី២នេះ បង្កើតបានកូនប្រុស-ស្រីចំនួន៦នាក់។ សព្វថ្ងៃនេះលោក និងស្វាមី រស់នៅក្នុងបុរីសន្តិភាព២ ក្នុងរាជធានីភ្នំពេញ៕

អត្ថបទ៖ ជិន សុភ័ក្ដ្រ