ដល់តែតាមបានដឹងថា ខៀវ សានសាណា ចូលមកដល់អាជីពនេះ មិនមែនលំៗទេ!

2021-09-22 03:49:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីការិនីទូរទស្សន៍ CTN ខៀវ សានសាណា ដែលគេស្គាល់ថាអ្នកពូកែវោហាស័ព្ទ និងចំណេះដឹងទូលំទូលាយម្នាក់នោះ តាមពិតឆ្លងកាត់ការបណ្ដុះបណ្ដាលខ្ពង់ខ្ពស់មិនធម្មតា មុនពេលអាចចូលមកកាន់អាជីពបច្ចុប្បន្ននេះ។

តាមព័ត៌មានដែលទទួលបាន សាណា គឺជាអតីតសិស្សដេប៉ាតឺម៉ង់នៃប្រព័ន្ធផ្សព្វផ្សាយ និងសារគមនាគមន៍ ហៅកាត់ថា "DMC" ដែលអាចនិយាយបានថា គឺជាពិធីការិនីទូរទស្សន៍តែម្នាក់នៅកម្ពុជាដែលបញ្ចប់ការសិក្សានៅគ្រឹះស្ថានអប់រំធំមួយនេះ។ នាងធ្លាប់ឆ្លងកាត់ការបណ្ដុះបណ្ដាលអស់រយៈពេល៤ឆ្នាំ មុនពេលនាងអាចផ្លាស់ប្ដូរមកកាន់អាជីពជាអ្នកអត្ថាធិប្បាយដូចសព្វថ្ងៃ។

បើតាមសាមីខ្លួន បានឲ្យដឹងថា នាងបានបញ្ចប់ការសិក្សាដោយទទួលបានសញ្ញាប័ត្រទុតិយភូមិ ឬបាក់ឌុបនៅក្នុងឆ្នាំ ២០០២ ហើយភ្លាមៗនាងក៏បានចូលសិក្សានៅ DMC ភ្លាមដែរ។ សាណា បានជ្រើសរើសជំនាញនេះ ដោយមិនបានពិចារណាជំនាញទូទៅដែលសាកសមជាមួយនឹងស្ត្រីដូចជា គណនេយ្យ ពាណិជ្ជកម្មឡើយ។

តាមហេតុផល គឺដោយសារនាងមានឪពុកជាអ្នកសារព័ត៌មានជើងចាស់ គឺលោក ខៀវ កូឡា ជាអ្នករុញច្រាន ដូច្នេះនាង ក៏បានមកកាន់វិថីនេះ ដោយមិនរារែក ហើយ រយៈពេល៤ឆ្នាំ DMC សាណាមានឱកាសរៀនសូត្រជាច្រើន មិនថាជំនាញលើប្រព័ន្ធផ្សព្វផ្សាយ ចំណេះដឹងភាសាបរទេស និងចំណេះដឹងទូទៅ។

"រៀននៅទីនោះ ខ្ញុំឧស្សាហ៍បានទៅអឺរ៉ុបដូចជាអាឡឺម៉ង់ បារាំង ហូឡង់ ព្រោះ DMC មានទំនាក់ទំនងជាមួយអង្គការជាដៃគូច្រើន ដែលអាចឲ្យសិស្សរៀននៅទីនោះ ឧស្សាហ៍បានទៅក្រៅប្រទេស"។ នេះរាប់ថាជាកម្មសិក្សាពិសេសមួយ ដែលធ្វើនាងរៀនបានច្រើនពីសកលភាវូបនីយកម្ម និងចំណេះដឹងទូទៅជាច្រើន រាប់ជាទុនដ៏សំខាន់មួយសម្រាប់ការងារដូចជានាងនាពេលបច្ចុប្បន្ន។

ខៀវ សានសាណា បានបញ្ចប់ការសិក្សានៅ DMC ក្នុងឆ្នាំ ២០០៦។ ប៉ុន្តែរឿងដែលអស្ចារ្យនោះ គឺនាងផ្ដើមមានការងារល្អធ្វើតាំងពីសិក្សាឆ្នាំទី១មកម្ល៉េះ។ "គ្រូខ្ញុំ និងបងនាយកនៅ CTN ជាមិត្តភ័ក្តិគ្នា ហើយគ្រូណែនាំទៅ បងនាយកថា បើចង់បានបុគ្គលិកធ្វើការឲ្យមកមើលនៅ DMC មក ហើយខាង CTN ក៏មក ហើយចុងក្រោយបានរើសយកខ្ញុំ អីចឹងហើយខ្ញុំមានការងារធ្វើតាំងឆ្នាំទី១ម្ល៉េះបង!”។

សាណា បញ្ជាក់ថា សិស្សសិក្សានៅ DMC ក្រោយរៀនចប់ អាចចូលធ្វើជាអ្នកសារព័ត៌មាន ឬក៏ធ្វើជាការងារផ្នែកទូរទស្សន៍ ហើយនាងទទួលយកផ្នែកទូរទស្សន៍នេះ។ បច្ចុប្បន្ន ខៀវ សានសាណា គឺជាពិធិការិនី និងជាអ្នកផលិតកម្មវិធីនៅ CTN។ នាងគឺជាបុគ្គលិកពេញសិទ្ធិមានកុងត្រា ដូច្នេះហើយ ទើបគេឃើញនាងមិនមានមុខនៅបណ្ដាស្ថានីយផ្សេងនោះទេ៕

អត្ថបទ៖ ទារិកា