ក្រុមហ៊ុន BKA Entertainment បាន​ប្រកាស​នៅ​ថ្ងៃ​នេះ​ថា ការ​ប្រឡង​រាំ​ដ៏​អស្ចារ្យ​សម្រាប់​យុវវ័យ​ហៅ​ថា “Love To Dance Season 2” បាន​ចាប់​ផ្ដើម​ហើយ បន្ទាប់​ពី​ជោគជ័យ​កាល​ពី​រដូវ​កាល​ទី​១​ឆ្នាំ ២០១៣។

 

លោក​ជំទាវ ញ៉ែម មរកត ប្រធាន​សហព័ន្ធ​កីឡា​រាំ​កម្ពុជា

លោក ប៊ុនកើដ អគ្គនាយក​របស់ BKA Entertainment ការ​ចាប់​ផ្ដើម​រដូវ​កាល​ទី​២​នេះ គឺ​ដើម្បី​បើក​ឱកាស​ជា​ថ្មី​ឲ្យ​យុវជន​យុវនារី​ខ្មែរ បាន​បញ្ចេញ​សមត្ថភាព និង​ទេពកោសល្យ​លើ​របស់​ពួក​គេ ខណៈ​ពិភព​លោក​កំពុង​មាន​ការ​រីក​ចម្រើន​លើ​ផ្នែក​នេះ។ "មិន​ត្រឹម​ប៉ុណ្ណឹង Love To Dance គឺ​ជា​សកម្មភាព​មួយ​ដែល​ទ្រទ្រង់​សង្គម​ក្នុង​ចលនា​ដ៏​ល្អ​មួយ ដោយ​ជួយ​បញ្ចៀស​ពួក​គេ​ពី​អំពើ​អបាយមុខ​មួយ​ចំនួន ងាក​មក​ប្រើ​ពេល​វេលា​ទំនេរ​ពី​ការ​សិក្សា​ក្នុង​ទិសដៅ​ល្អ និង​បង្កើត​ថ្មី"។

 

ខុស​ពី​ឆ្នាំ​ទី​១ Love To Dance ឆ្នាំ​ទី​២​នេះ ទទួល​បាន​ការ​គាំទ្រ​ពេញ​ទំហឹង​ពី​សហព័ន្ធ​កីឡា​រាំ​កម្ពុជា ដែល​ទើប​បង្កើត​ថ្មី​ថ្មោង​ដែរ។ លោក ជំទាវ ញ៉ែម មរកត ជា​ប្រធាន​សហព័ន្ធ​ក្មេង​ខ្ចី​នេះ ថ្លែង​ថា លោក​ជំទាវ​ផ្ដល់​ការ​គាំទ្រ​ភ្លាម បន្ទាប់​ពី​ទទួល​បាន​លិខិត​ស្នើ​សុំ​គាំទ្រ​ពី BKA Entertainment តែ​ប៉ុន្មាន​ថ្ងៃ​មុន​នេះ​ប៉ុណ្ណោះ។

 

"កីឡា​រាំ​ពិត​ជា​មាន​សារសំខាន់​ណាស់ វា​ជួយ​យើង​សប្បាយ​រីករាយ ឃ្លាត​ឆ្ងាយ​ពី​អំពើ​អបាយ​មុខ​មួយ​ចំនួន និង​មាន​សុខភាព​ល្អ​មាំ​មួន​ថែម​ទៀត។ និយាយ​តាម​ត្រង់ ខ្ញុំ​អត់​ដឹង​សោះ​ថា​មាន​ការ​ប្រឡង​រាំ ហើយ​ខាង​ក្រុម​ហ៊ុន ក៏​មិន​ដឹង​ថា​មាន​សហព័ន្ធ អីចឹង​ពេល​នេះ យើង​គាំទ្រ​សកម្មភាព​នេះ ព្រោះ​សហព័ន្ធ​ក៏​ចង់​លើក​កម្ពស់​កីឡា​រាំ​នេះ​នៅ​ស្រុក​យើង​ឲ្យ​រីក​ចម្រើន​ដូច​នៅ​បរទេស​ដែរ"។

 

 

លោក ជំទាវ បន្ត​ថា សហព័ន្ធ​កីឡា​រាំ​របស់​លោក​ជំទាវ មាន​ផែនការ​យុទ្ធសាស្ត្រ​មួយ​ចំនួន ដើម្បី​ជំរុញ​ឲ្យ​មាន​កីឡា​ប្រភេទ​នេះ​តំណាង​ប្រទេស​ចេញ​ទៅ​ប្រកួត​ជាមួយ​អន្តរជាតិ ដូច្នេះ​សូម​ឲ្យ​យុវជន យុវនារី​ខ្មែរ​យើង​ចូល​រួម​គាំទ្រ​ទាំង​អស់​គ្នា។ លោក ជំទាវ​សង្កត់​ធ្ងន់​ថា រាំ​ក៏​អាច​ជា​អាជីព​ដ៏​ភ្លឺ​ស្វាង​មួយ​សម្រាប់​ខ្លួន​យើង​ដែរ "តើ​ដែល​ដឹង​ទេ ការ​ប្រកួត​រាំ​នៅ​អន្តរជាតិ​ខ្លះ ពាន​រង្វាន់​មាន​ប្រាក់​រង្វាន់​ដល់​ទៅ​១​លាន​ដុល្លារ​ឯណោះៗ!"។

 

ការ​ប្រឡង​រាំ​ដ៏​អស្ចារ្យ​ហៅ​ថា Love To Dance Season 2 នឹង​ធ្វើ​ការ​ប្រឡង​លើ​ក្បាច់​រាំ​ចម្រុះ​មាន​ដូច​ជា តុងហ្គោ ឆាតឆាតឆា ហ្សាំបា និង​ម៉ុមបា ជា​ដើម។ មក​ទល់​ថ្ងៃ​នេះ កម្មវិធី​រើស​បាន​បេក្ខជន​ចំនួន​ចំនួន ១៨​ក្រុម​ក្នុង​នោះ​មាន​ជា​ទម្រង់​ទោល គូ និង​ក្រុម​ជា​ដើម។ បេក្ខជន​នឹង​ត្រូវ​ឆ្លង​កាត់​ចំនួន​២​វគ្គ ដោយ​មួយ​វគ្គ​មាន ៩បេក្ខភាព។ ការ​ប្រកួត​នឹង​ចាក់​ផ្សាយ​លើក​ទី​១​តាម​កញ្ចក់​ទូរទស្សន៍ MyTV នា​ថ្ងៃ​ព្រហស្បតិ៍​ទី ២៧ វិច្ឆិកា ២០១៤។ ឯ​កម្មវិធី​ផ្ដាច់​ព្រ័ត្រ​នៅ​ថ្ងៃ​ទី ២៥ ធ្នូ ២០១៤។

ក្រុម​រាំ Ninja Top ម្ចាស់​ជយលាភី Love To Dance រដូវ​កាល​ទី​១

Love To Dance Season 2 ទទួល​បាន​ការ​គាំទ្រ​ដោយ​ក្រុមហ៊ុន​មួយ​ចំនួន​ដូច​ជា ស្រាបៀ​អង្គរ ទឹក​អប់ Cologne និង Roll On 12Plus ភេសជ្ជៈ Pepsi ទឹក​បរិសុទ្ធ Angkor Puro ផលិតផល​សាប៊ូ គីរិ គីរិ ស្ករ​កៅស៊ូ Extra Parrot ព្រម​ទាំង​ចូល​រួម​សហការ​ពី​ផ្សារ​ទំនើប​ផារ៉ាហ្គន និង i-Friend Sdudio។

 

កាល​ពី​ឆ្នាំ​ទី​១ ក្រុម​រាំ Ninja Top គឺ​ជា​ម្ចាស់​ជយលាភី។ ក្នុង​សន្និសីទ​ប្រមាណ​១​ម៉ោង​មុន ក្រុម​នេះ​ក៏​បាន​បង្ហាញ​ខ្លួន​ជា​កិត្តិយស​ដែរ។ ពួក​គេ​បាន​បង្ហាញ​ក្បាច់​រាំ​ Hip Hop ដ៏​រស់​រវើក​តាម​ចង្វាក់​ភ្លេង​មួយ​បទ។ តោះ​ទស្សនា​ទាំង​អស់​គ្នា...!!!

  http://youtu.be/cA8zZaSfHO4  

អត្ថបទ៖ ទារិកា