ក្រោយមានរឿងលែងលះជាមួយភរិយានៅអូស្រ្តាលី ស៊ុក សុភា មកប្រទេសកំណើតវិញហើយ!

2021-10-22 08:06:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាសម្ដែងល្បីឈ្មោះក្នុងរឿង "រសជាតិជីវិត" លោក ស៊ុក សោភា ត្រូវបានគេដឹងថា បានមកដល់ប្រទេសកំណើតរបស់លោកវិញហើយ ក្រោយមានរឿងលែងលះជាមួយភរិយានៅប្រទេសអូស្ត្រាលី។

តាមដំណឹង លោកបានដល់កម្ពុជាប្រមាណជា ២ថ្ងៃមុននេះ ស្របពេលមុនយន្តហោះចុះចត លោកបានថតជាវីដេអូឃ្លិបបង្ហាញពីទិដ្ឋភាពរាជធានីភ្នំពេញថតពីលើអាកាសទៀតផង ដោយនៅក្នុងនោះលោកបានសរសេរថា "សូមអញ្ជេីញទស្សនាវីដេអូ នៃទឹកដីកំណេីតរបស់ខ្ញុំគឺជា «ខ្លាសេដ្ឋកិច្ចថ្មីនៃអាស៊ី» ដែលថតពីលេីយន្ដហោះដែលត្រូវបានចុះចតនៅក្នុងប្រលានយន្ដហោះពោចិនតុង ភ្នំពេញ កម្ពុជា ”.

ដំណើរមកកាន់ប្រទេសកំណើតលើកនេះ គេមិនឃើញមានសាច់ញាតិទៅទទួលច្រូងច្រាងនៅព្រលានយន្តហោះនោះទេ។ ជាមួយគ្នា គេក៏មិនដឹងថា លោកមកកម្ពុជាក្នុងគោលបំណងអ្វី មកលេងសាច់ញាតិក្នុងរយៈពេលណាមួយ ឬក៏ស្នាក់នៅរហូត។ ចំណុចនេះ បាន និងកំពុងធ្វើឲ្យមានមន្ទិលក្នុងចំណោមមិត្តភក្តិ រួមទាំងអ្នកគាំទ្ររបស់លោក ដោយពួកគេបានចោទជាសំណួរចំពោះរឿងនេះជាច្រើន។ ប៉ុន្តែគេមិនឃើញតារាប្រុស ឆ្លើយតបនោះឡើយ។

ក៏ដូចគ្នាដែរ sabay នៅមិនទាន់អាចទាក់ទងសាមីខ្លួនតារាប្រុស ដើម្បីធ្វើការស្រាយបំភ្លឺនៅឡើយ។ លោក ស៊ុក សុភា ត្រូវបានគេដឹងថា បានចាកចេញពីកម្ពុជាឆ្ពោះទៅកាន់ទឹកដីអូស្ត្រាលីរស់នៅជាមួយអតីតភរិយាអ្នកនាង លុយ សារីណា អស់រយៈពេលជិត ១០ឆ្នាំមកហើយ។ ក្រោយពីបានសាងភាពផ្អែមល្ហែមជាមួយគ្នាអស់កាលជាច្រើនឆ្នាំ គូស្វាមី១គូនេះស្រាប់បែករឿងលែងលះគួរឲ្យភ្ញាក់ផ្អើល។

អ្នកនាង សារីណា បានបង្ហោះផ្ដាច់ចំណងទាក់ទងជាស្វាមី ភរិយា ជាមួយលោក ស៊ុក សុភា កាលពីចុងខែសីហា។ ភ្លាមៗ អ្នកដែលស្គាល់ពួកគេទាំងពីរ មិនជឿថានោះជាការពិតនោះទេ ពោលគឺពួកគេគិតថា អ្នកនាង សារីណា លេងសើច។ ប៉ុន្តែក្រោយមក ភាគីខាងស្រី ក៏បានបញ្ជាក់ប្រាប់ច្បាស់ៗ អ្នកនាងមិនយករឿងគ្រួសារមកលេងសើចលើហ្វេសប៊ុកនោះទេ ពោលគឺអ្វីដែលប្រិយមិត្តបានឃើញ គឺជាការពិត។

ចំពោះមូលហេតុនៃការបែកបាក់ អ្នកនាង លុយ សារីណា បញ្ជាក់ថា ដោយសារមានពាក់ព័ន្ធពីក្រុមគ្រួសាររបស់ ស៊ុក សុភា។ ប៉ុន្តែនាងមិនបានអធិប្បាយលម្អិតថាសាច់រឿងយ៉ាងណានោះទេ គ្រាន់តែថា រយៈកាលកន្លងមក គឺអ្នកនាងជាអ្នកទ្រាំតែម្នាក់ឯង ធ្វើអី្វីក៏ខុស គឺខុសរហូត។ ដូច្នេះដល់ពេលហើយ ដែលនាងសម្រេចចិត្តឈប់ទ្រាំចំពោះរឿងទាំងនោះទៀត។

ដោយឡែកលោក ស៊ុក សុភា គេមិនឃើញមានការបកស្រាយចំៗលើមូលហេតុលែងលះនោះទេ។ ប៉ុន្តែក្រោយធ្លាយដំណឹងបាក់បែកគ្រួសារប្រមាណ ២ខែមកនេះ គេស្រាប់តែឃើញលោកបានមកដល់កម្ពុជាវិញ។ ដូច្នេះហើយគេមិនដឹងថា ជាការចែកចាន ចែកឆ្នាំង ចែកផ្លូវជាមួយអូស្ត្រាលីរហូតហើយ ឬក៏មកលេងសាច់ញាតិមួយរយៈណានោះទេ៕