ក្រោយមាន​ការ​បែកធ្លាយ​រូបភាព​នៅលើ​បណ្តាញ​អនឡាញ​អំពីរូបរាង​រថយន្ត Range Rover 2022 ឥឡូវ​រថយន្ត​របស់​ក្រុមហ៊ុន Jaguar Land Rover ស៊េរីថ្មីនេះ ត្រូវគេ​លួចថត​បាន​ក្នុងអំឡុង​បើកបរ​តាមដងផ្លូវ មុនប្រកាស​ចេញជាផ្លូវការ​នៅ​ថ្ងៃទី២៦តុលាស្អែក។

យ៉ាងណាមិញ រូបភាព Range Rover ថ្មីនេះ គឺ​មិនឃើញ​រូបរាង​ច្បាស់​ពិតប្រាកដឡើយដោយ​វាត្រូវរុំបិទយ៉ាងជិត​ឃើញតែប៉ាណា និង​កាង តែប៉ុណ្ណោះ ដែល​ដូច​រូបភាព​បែកធ្លាយ​បេះបិទ។ ចំណែក​ផ្នែក​ខាងក្រោយគឺ​ឃើញ​តែពិលកាងក្រោយ ហើយផ្នែកស្តុប​ក៏ត្រូវបានរុំជិតដូចគ្នា ប៉ុន្តែបើតាមមើលសណ្ឋាន ក៏មិនខុសពីរូបបែកធ្លាយ​កន្លងមក​ដែរ។

គួរដឹងថា តាមរយៈរូបភាព​បែកធ្លាយនោះ គេឃើញ​ថា ការឌីហ្សាញ​ផ្នែក​ខាងមុខនៃរថយន្ត​ស៊េរីឆ្នាំ​២០២២នេះ គឺ​ខុសគ្នា​ពី​ស៊េរីឆ្នាំ​២០២១ ដូចជាត្រង់ប៉ាណា ចង្កៀង​ និង​ពិលកាង ប៉ុន្តែរក្សា​ទីតាំងអក្សរ​ Range Rover នៅដដែល។ ផ្នែកចំហៀង​រថយន្ត​នៅ​ទ្វារ​ខាងមុខ ដែលមានឆ្នូត​ ក៏រំលេចឡើង​ខុសគ្នាផងដែរ។

ចំណែក​ផ្នែកខាងក្រោយ​ នៃ​ Range Rover 2022 នេះរចនាឡើង​ទាក់ទាញជាងមុន ពិសេស​ផ្នែក​ចង្កៀងស្តុបក្រោយ​ដែលមាន​១ទ្រវែង នៅម្ខាងៗ ខុសប្លែកពីរថយន្តមុន​ដែលមាន​ ២ជាប់គ្នា នៅម្ខាងៗ។ ក្រៅពីនេះ គឺមាន​ការឌីហ្សាញ​ថ្មី​នៅជុំវិញ​កន្លែង​ពាក់ផ្លាកលេខ ប៉ុន្តែរក្សាទីតាំង​អក្សរ RANGE ROVER និង​ឡូហ្គូ Land Rover ដដែល។

ងាកមកមើល​ផ្នែក​ខាងក្នុង​នៃរថយន្ត​ថ្មីនេះ ក៏ត្រូវបាន​គេប្រទះឃើញថា ដៃចង្កូត​ គឺខុសគ្នាពីស៊េរីមុន ពោលគឺមិនឃើញប៊ូតុងឡើយ តែជំនួស​មកវិញដោយ​ការថាច់ស្គ្រីន ដោយមានអេក្រង់​សងខាង​ នៅស្នូល​កណ្តាល​ដៃចង្កូត។ ចំណែក​​ប្រព័ន្ធកម្សាន្តគឺមានអេក្រង់ធំមួយ (មិនបានបញ្ជាក់ទំហំ) គឺ​លានចេញ​ និងមិន​ដាក់លឹបចូលក្នុងផ្ទៃតាប្លូរថយន្តដូចស៊េរីចាស់​ដែលមាន​អេក្រង់២នោះទេ។

ចំពោះ​កម្លាំងម៉ាស៊ីន​របស់ Range Rover 2022 ត្រូវបាន​គេ​ដឹងថា វាប្រើម៉ាស៊ីន V8 turbocharge ចំណុះ ៤,៤លីត្រ និង​ប្រើប្រព័ន្ធ plug-in hybrid ទៀតផង ប៉ុន្តែមិនបាន​បង្ហាញឱ្យដឹងពីកម្លាំងសេះ និងកម្លាំង​រមួល​ឡើយ។

បើទោះបីជា Range Rover ស៊េរីថ្មីនេះ នៅតែរក្សា​ទំហំដដែល​ពោលគឺ​ប្រវែង ទទឹង កម្ពស់ និងគម្លាតពីកង់មុខ ទៅកង់ក្រោយ ប៉ុន្តែគេមិនរំពឹងថា វា​នឹង​មិនមានកៅអីលើសពី៥នោះទេ។

រថយន្តនេះ អាចមានតម្លៃ​ចាប់ពី ១០ម៉ឺនដុល្លារឡើងទៅ ដោយ​គ្រោងនឹងដាក់លក់​នៅ​អំឡុងត្រីមាសទី១ ឆ្នាំ​២០២២៕

ចង់បានរថយន្តថ្មី ប៉ុន្តែមិនមានប្រាក់គ្រប់គ្រាន់ សូមកុំបារម្ភ! លោកអ្នកអាចស្នើសុំឥណទាន រថយន្តរបស់ធនគារ CIMB ដែលផ្តល់ជូនអត្រាការប្រាក់ពិសេស ៨,៥% ទំហំឥណទានដល់ ៧០% និងរយៈពេលឥណទានដល់ ៥ឆ្នាំទៀតផង។ សម្រាប់ព័ត៌មានលម្អិតសូមជជែកជាមួយមន្ត្រីឥណទានរថយន្តរបស់ធនាគារ CIMB ដោយផ្ទាល់ តាមរយៈលេខទូរសព្ទ 096 669 2222 / 092 667 375៕

ប្រភព៖ Motor1   ប្រែ​សម្រួល៖ សំភី