គ្រោះថ្នាក់ចរាចរណ៍វេលាម៉ោង ៣ ទៀបភ្លឺ ថ្ងៃទី២៥ ខែធ្នូ ឆ្នាំ២០២១ នេះ​បាន​ឆក់យកជីវិតយុវជនម្នាក់​ដែល​គេ​ស្គាល់ច្បាស់ថា​ជា​ តារា​ចម្រៀង​វ័យ​ក្មេង នាង​ ប្រាក់សុគន្ធ និង​ដែលត្រូវបងប្រុសរបស់តារា​ចម្រៀង​ប្រចាំផលិតកម្ម Sunday គឺកញ្ញា នាង គន្ធា។

មរណភាពក្នុងមួយពព្រិចភ្នែករបស់ **សុគន្ធ** ពិតជា​បង្កជាការភ្ញាក់ផ្អើល និងតក់ស្លុតពន់ពេក​ចំពោះតារា​រួមអាជីព ក៏ដូចជាក្រុមគ្រួសារ មិត្តភ័ក្តិ ព្រោះ​ការបាត់បង់នេះ​វាពិតជា​មាន​ទំហំធំធេង និង​លឿនពេកហើយ។

ពេលបានដឹងដំណឹងដ៏សែន​ក្រៀមក្រំ​នេះ ក៏មាន​តារា​ជា​ច្រើននាក់បាន​បង្ហោះសាររំលែកទុក្ខ និង សោកស្ដាយឥតឧបមា មិននឹកស្មានថាយុវជន​ចរិតស្លូតបូតម្នាក់​នេះ​ត្រូវ​អស់ជីវិតទាំងវ័យក្មេង ដោយសារគ្រោះថ្នាក់វេលាទៀបភ្លឺ។ អ្នកដែល​ចូលរួមបង្ហាញការ​ស្ដាយស្រណោះទាំងនោះមានលោក​ប៉ែន ចំរ៉ុង លោក ហ្វៃ សំអាង កញ្ញា ទឹម រដ្ឋា នាយ កណ្ដុរ លោក ជ័យ សុវ៉ាត សឹម សុភ័ណ្ឌ បាន មុន្នីលក្ខណ៍ ពៅ លីដា ផន ស្រីខួច ថន លក្ខិណា ស៊ូ ស៊ីរីកា ជា វិបុល សៅ ឧត្តម ប៊ីប៊ី ម៉ង់ ចាន់កញ្ញា លី ជីវលី សួ វិចិត្រ និងតារាៗជាច្រើនរូបទៀត។ ជាមួយគ្នានោះ បន្ថែមពីលើការរំលែកទុក្ខ គ្រប់គ្នាក៏សូមឲ្យ នាង គន្ធា ដែលជាប្អូន ឲ្យរឹងមាំឡើង ហើយពួកគេនឹងនៅជាកម្លាំងចិត្តនាងជានិច្ច៕

អត្ថបទ៖ យី សុធារី