ដោយសារតែរឿងស្រីញី កេរ្តិ៍ឈ្មោះ និងឆ្នាំងបាយសិល្បៈរបស់តារាប្រុសអាស៊ី ៥ រូបត្រូវរលាយ

2021-12-28 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងអាស្រូវស្ថិតក្នុងពិភពសិល្បៈអាស៊ីនៅឆ្នាំ ២០២១ នេះ ពេញដោយភាពរញ៉េរញ៉ៃបន្តកន្ទុយគ្នា តាំងពីស្ថិតក្នុងប្រទេសកូរ៉េ និងចិន។ ក្នុងចំណោមរឿងអាស្រូវទាំងអស់ មានតារា ៥រូប ដែលធ្វើឲ្យគ្រប់គ្នាភ្ញាក់ផ្អើលខ្លាំងនឹងព័ត៌មានរបស់ពួកគេ ដោយសាររឿងរ៉ាវទាំងនោះ ពិតជាប៉ះពាល់ទាំងស្រុងដល់អាជីពសិល្បៈ រហូតខ្លះត្រូវបង្ខំចិត្តលាឈប់តែម្ដង។

១. Kris Wu

ឆ្នាំ ២០២១ កំពូលតារាប្រុសចិន Kris Wu បានបង្កឲ្យគ្រប់គ្នាដែលជាអ្នកគាំទ្រភ្ញាក់ផ្អើលមិនធម្មតា ពេលនារីវ័យក្មេងម្នាក់អះអាងថាលោកបានបោកប្រាស់ចិត្តនាង ដោយកុហកថាសន្យានឹងនាំនាងចូលសម្ដែងក្នុងវីដេអូបទចម្រៀងជាតួឯកស្រី ប៉ុន្តែវាគ្រាន់តែជាល្បិចបោកប្រាស់។

Du Meizhu

ក្រៅពីនេះក៏ធ្លាយដំណឹងបន្ថែមទៀតថា Kris បានធ្វើបាប(ផ្លូវភេទ) ទៅលើនារីមិនតិចទេដែលមានអាយុក្រោម ១៨ ហើយក្នុងនោះមានម្នាក់អាយុ ១៤ឆ្នាំទៀតផង។ អាស្រូវស្រោចខ្លួនបែបនេះហើយ ទើបគណនីបណ្ដាញសង្គមផ្លូវការទាំងប៉ុន្មានដែលពាក់ព័ន្ធនឹងលោកត្រូវលុបចោលខ្ទេច ហើយបណ្ដាញសង្គមផ្សេងទៀតមាន Weibo, Douyin, Toutiao, Tieba Fandom, Tencent Video ក៏ត្រូវលុប Content ទាំងអស់ដែលមានរូបលោកក្នុងនោះដែរ។

២. Wang Leehom

តារាប្រុសរូបនេះត្រូវបានគេចាត់ទុកថាជា និមិត្តរូបប្រចាំវិស័យសិល្បៈ ដោយសារកេរ្ត៍ឈ្មោះដែលលោកបានសាងទាំងក្នុងប្រទេសចិន និងអាស៊ីទាំងមូលពិតជាសុសសាយមិនធម្មតាទេ។ ប៉ុន្តែទោះជាយ៉ាងណា ថ្មីៗភាពក្រអូបឈ្ងុយនៃឈ្មោះលោក ត្រូវប្រែប្រួលទាំងស្រុង។នៅថ្ងៃទី១៥ ខែធ្នូ Wang Leehom បានប្រកាសថាខ្លួន និងប្រពន្ធ សម្រេចលែងលះគ្នាហើយ ក្រោយរួមរស់ជាមួយគ្នាជាង ៨ឆ្នាំ។ ពីរថ្ងៃក្រោយ Lee Jinglei ដែលជាភរិយារបស់តារាចម្រៀងរូបនេះក៏បានបង្ហោះលិខិតមួយច្បាប់ និយាយពីរឿងរ៉ាវជីវិតប្ដីប្រពន្ធរយៈពេលនៅជាមួយគ្នាកន្លងមក។

Wang Leehom និងអតីតភរិយា

Jingfei បាននិយាយថាអតីតប្ដីនាង បានបង្ខំឲ្យយកកូនឲ្យបានច្រើន ហើយនេះក៏ជាហេតុផលមួយបណ្ដាលឲ្យសុខភាពនាងប្រែជាមិនល្អដែរ។ អ្វីដែលកាន់តែភ្ញាក់ផ្អើល មានការឲ្យដឹងទៀតថាតារាប្រុសរូបនេះល្មោភកាមណាស់ ព្រោះស្របពេលប្រពន្ធកំពុងពពោះកូន លោកថែមទាំងទិញឧបករណ៍ស៊ិចមកបម្រើចំណង់របស់ខ្លួនទៀត។

មានការឆ្លើយឆ្លងគ្នាទៅមកជាច្រើនលើកពីភាគីទាំងសង្ខាង ប៉ុន្តែចុងក្រោយ Wang Leehom បានត្រឹមនិយាយថាខ្លួនមិនបដិសេធទេ ហើយក៏សុំទោសចំពោះប៉ាម៉ាក់របស់លោក Lee Jinglei និងកូនៗទាំង ៣ផងដែរ។

៣. Lucas (NCT)

តារាប្រុសរូបនេះក៏ធ្វើឲ្យអ្នកគាំទ្រស្រងាកចិត្តមួយរយៈធំដែរ ពេលបែកធ្លាយព័ត៌មានថាលោកបោកប្រាស់ផ្លូវចិត្តនារីៗ ៣នាក់ ឲ្យលង់ចិត្ត និងផ្គាប់ចិត្តលោកគ្រប់យ៉ាង តែចុងក្រោយបែរខាងប្រុសដោះដៃ។ ព័ត៌មានក្រោយមកទៀត ក៏បែកធ្លាយទៀតថា Lucas អស់ភាពកំលោះតាំងពីអាយុ ១៣ឆ្នាំ ដែលកាន់តែធ្វើឲ្យចំនួនអ្នកប្រតិកម្មនឹងចរិតលោក សម្ដែងការមិនពេញចិត្តសោះ។ ក្រោយកើតរឿងនេះ Lucas ក៏បានចេញមុខសុំទោសនូវអ្វីដែលបានកើតឡើង ប៉ុន្តែមិនបានបកស្រាយលម្អិតថា វាជាការពិតឬយ៉ាងណានោះទេ។ លោកត្រូវសំងំលាក់មុខ លាក់មាត់យ៉ាងយូរចេះពីពិភពសិល្បៈទាំងក្នុងប្រទេសកូរ៉េ និងចិន។

៤. Kim Jisoo

អំឡុងដើមឆ្នាំ ២០២១នេះ Jisoo មានការងាររវល់ជាច្រើន ពិសេសការងារថតរឿង ប៉ុន្តែដោយសារអាស្រូវផ្ទាល់ខ្លួន រាល់ការងារទាំងឡាយ ត្រូវម្ចាស់គម្រោងលុបចោលកុងត្រាជាមួយលោកចោលគ្មានសល់។

ព័ត៌មានរបស់លោកនោះគឺ ទាក់ទងនឹងចរិតមើលងាយដែលលោកបញ្ចេញកាលពីនៅរៀន ដោយធ្វើបាបទៅលើមិត្តរួមថ្នាក់ ។ បន្ថែមពីលើនេះ កាលនោះ Jisoo ថែមទាំងធ្វើបានរាងកាយដាក់អតីតមិត្តស្រី ហើយហ៊ានធ្វើទង្វើមិនសមរម្យក្នុងថ្នាក់ទៀត។ ជាទីបញ្ចប់ សាមីខ្លួនក៏បានចេញមុខទទួលកំហុស និងសុំទោសរាល់អ្វីដែលខ្លួនបានសាងទាំងមិនបានគិតគូរវែងឆ្ងាយកាលពីក្មេង។

៥. Park Yoochun

សមាជិកក្រុម JYJ រូបនេះត្រូវបានគេស្គាល់ថាជាតារាប្រុសដែលជោគជាំដោយរឿងអាស្រូវជុំទិស តាំងពីករណីផ្លូវភេទ និងគ្រឿងញៀនជាដើម។ ឆ្នាំនេះក៏មិនស្ងាត់ព័ត៌មានរបស់លោកដែរ ព្រោះកាលពីខែសីហា ក្រុមហ៊ុនរបស់លោកគឺ Re:Cielo បានលើកឡើងថា Park Yoochun រំលោភលើកុងត្រាជាមួយនឹងក្រុមហ៊ុន ហើយចុះកុងត្រាជាមួយនឹងក្រុមហ៊ុនជប៉ុនមួយទៀត ព្រមទាំងចែកចាយព័ត៌មានមិនពិតថា CEO របស់ Re:Cielo បោកលុយ។

មិនអស់ទេ តារាប្រុសរូបនេះនៅបានប្រើលុយក្រុមហ៊ុន យកទៅទិញខោអាវ Brand ថ្លៃៗឲ្យសង្សារ ដល់ថ្នាក់សរុបជាទឹកប្រាក់អស់ដល់ទៅខ្ទង់ ១០០លានវ៉ុន (ខ្ទង់ ៨៤ ២០២ដុល្លារ) ទៀត។

ដោយសារបញ្ហាជុំទិសរហូតឡើងដល់តុលាការ ទើបតុលាការសម្រេចពិន័យ Park Yoochun និងសម្រេចហាមមិនឲ្យមានវត្តមានរបស់ Park Yoochun ចេញមុខក្នុងពិភពសិល្បៈតទៀតដាច់ខាត ក្នុងនោះរួមមានទាំងការចេញបទចម្រៀង វីដេអូ ការផ្សព្វផ្សាយផ្សេងៗ ពិសេសការបង្ហាញមុខលើទូរទស្សន៍៕

ប្រភព៖ Kenh14