អង្គុយនិយាយសុខៗ Sandara Park យំហ៊ូ ពេលគិតថាខ្លួន «អត់ប្រយោជន៍ជាងគេ» ក្នុងក្រុម 2NE1

2021-12-28 06:33:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងពេលបង្ហាញមុខក្នុងកម្មវិធី Video Star តារាស្រីមុខមិនចេះចាស់ Sandara Park បានសម្រេចទម្លាយការពិតមួយចំនួន ទាក់ទងនឹងពេលវេលាលំបាកនានាក្នុងជីវិត។

ផ្ដើមភ្លាម Dara ស្រាប់តែអួលដើមករតែម្ដង ដោយនាងបានសារភាពថា ពេលដែលក្រុមត្រូវរំសាយ នាងជួបវិបត្តិផ្លូវចិត្តច្រើនណាស់ ព្រមទាំងបារម្ភពីអនាគតខ្លួនទៀត។ ពេលនេះ នាងមិនមានសមាជិក ៣នាក់ទៀតនៅជិតទេ នាងបារម្ភថា មិនដឹងអាចឈរតែឯងបានឬយ៉ាងណាទេ។

«នៅពេលយើងបំបែកក្រុម ហើយខ្ញុំត្រូវឈរតែឯង ពេលនោះខ្ញុំរងនូវសម្ពាធផ្លូវចិត្តយ៉ាងខ្លាំង ពេលបារម្ភខ្វល់ថា តើគួរធ្វើយ៉ាងណា? ហ្នឹងហើយ ពេលនោះហើយដែលពិបាកបំផុតសម្រាប់ខ្ញុំ»។ - Sandara Park។

តារាស្រីរូបនេះនៅបានបន្តទៀតថា «នៅពេលយើងនៅជុំគ្នា ខ្ញុំតែងគិតថា ខ្ញុំអត់ប្រយោជន៍ខ្លាំងណាស់សម្រាប់ក្រុម ព្រោះសមាជិកម្នាក់ៗ គេសុទ្ធតែមានទេពកោសល្យរៀងខ្លួនៗ ហើយខ្លាំងៗទៀត។ ខ្ញុំគិតថា បើខ្ញុំច្រៀងកន្លែងច្រើនពេកក្នុងបទ នោះវានឹងធ្វើឲ្យក្រុមយើងកាន់តែយ៉ាប់ ហើយខ្ញុំក៏មិនសប្បាយចិត្តដែរ»។

Dara នៅបានឲ្យដឹងទៀតថា រយៈពេល ២-៣ឆ្នាំក្រោយបំបែកក្រុម គំនិតអវិជ្ជមានតែងផុសចូលក្នុងខួរក្បាលនាងជានិច្ច ហើយកម្លាំងចិត្តធ្លាប់មានក៏ធ្លាក់ចុះជាលំដាប់។ មនុស្សដែលធ្លាប់តែទាក់ទងមកពីមុន ក៏ឈប់ទាក់ទងនាងហូរហែ ដូច្នេះ Dara ត្រូវរស់នៅក្នុងពិភពងងឹតអស់ជាង ២ឆ្នាំ។

អ្វីគ្រប់យ៉ាងត្រូវក្លាយជាមេរៀនជីវិត ព្រោះក្រោយព្យុះភ្លៀងរំលងទៅ តារាស្រីរូបនេះក៏ពង្រឹងស្មារតី និងរឹងមាំឡើងវិញ ហើយជាលទ្ធផលនាងបានស្គាល់ថាអ្នកណាជាមិត្តល្អពិតប្រាកដរបស់នាង។ មកទល់ពេលនេះនាងសប្បាយចិត្តណាស់៕