វិសាខាមានខ្សែប្រយុទ្ធល្អៗច្រើន សារ ទី ថានឹងធ្វើឱ្យគេកាន់តែខំប្រឹងខ្លាំង

2022-01-18 06:47:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធវ័យក្មេងនិងលេចធ្លោរ សារ ទី ត្រូវបានក្លឹបវិសាខាទិញយកផ្ដាច់កុងត្រាពីក្លឹបអគ្គិសនីកម្ពុជាកាលពីពេលថ្មីៗនេះ ដើម្បីត្រៀមការប្រកួតដណ្ដើមពានលីគកំពូលកម្ពុជានៅរដូវកាលនេះ។

ខ្សែប្រយុទ្ធ សារ ទី កាន់អាវក្លឹបបាល់ទាត់វិសាខា

ក្លឹបវិសាខាត្រូវបានគេស្គាល់ថាជាក្លឹបសំបូរធន់ធាន និងកីឡាករល្អៗជាពិសេសកីឡាករមានឈ្មោះក្នុងក្រុមជម្រើសជាតិកម្ពុជា។ កាន់តែពិសេសក្លឹបទៅទៀតក្លឹបមានខ្សែប្រយុទ្ធខ្មែរបរទេសសំបូរបទពិសោធច្រើនតួយ៉ាង កែវ សុខផេង, រឹង ប៊ុនហៀង និងស៊ិនកក្តដាជាដើម។ ហេតុនេះមានសំណួរសួរថាតើ សារ ទី នឹងអាចមានឱកាសបង្ហាញខ្លួនច្រើនដូចកាលនៅអគ្គិសនីកម្ពុជាដេរឬយ៉ាងណា?

ទាក់ទងនឹងសំណួរខាងលើអតីតខ្សែប្រយុទ្ធសាលាបាល់ទាត់ជាតិបាទី បានប្រាប់ថារូបនេះនឹងខំប្រឹងប្រែង ដើម្បីមានឱកាសបង្ហាញខ្លួនឱ្យក្លឹបថ្មីរបស់ខ្លួន។ សារ ទី បញ្ជាក់ថា ៖«បាទបង! រំពឹង [បង្ហាញខ្លួន] ច្រើន [ការមានកីឡាករល្អច្រើន] អាចធ្វើឱ្យយើងមានការប្រឹងប្រែងឱ្យខ្លាំង ដើម្បីប្រកួតប្រជែងខ្ពស់»។

ខ្សែប្រយុទ្ធជម្រើសជាតិកម្ពុជាជឿជាក់ថាការមករួមរស់ជាមួយក្លឹបវិសាខានឹងធ្វើឱ្យសមត្ថភាពគេរីកចម្រើន ព្រោះក្លឹបមួយនេះប្រមូលផ្ដុំដោយកីឡាករខ្មែរបរទេសល្បីៗនិងមានការប្រកួតប្រជែងខ្លាំង។

យុវជនបានពន្យល់ថា ៖«ជាមួយក្លឹបថ្មីនឹងធ្វើឱ្យសមត្ថភាពខ្ញុំរីកចម្រើនមួយកម្រិតទៀត ដោយសារយើងហាត់ជាមួយកីឡាករដែលមានបទពិសោធច្រើនដូចជាបរទេសអី ជាមួយគ្រូដែលមានបទពិសោធច្រើនគ្រូល្អៗច្រើន ធ្វើឱ្យយើងស្គាល់កម្រិត Professional អីអ៊ីចឹង»។

បើនិយាយពីគ្រូបង្វឹកវិញក្រុមវិសាខាបានតែងតាំងលោក Lee Tae-Hoon ជាគ្រូបង្គោលដឹកនាំការប្រកួតសម្រាប់រដូវកាលថ្មីនេះ។

គួរបញ្ជាក់ថា ក្លឹបបាល់ទាត់អគ្គិសនីកម្ពុជាត្រូវធ្លាក់ទៅលេងលីគ២រដូវកាលឆ្នាំ២០២២នេះ ខណៈសារទីនៅសល់កុងត្រាមួយឆ្នាំទៀត ហើយក៏ត្រូវវិសាខាទិញផ្ដាច់កុងត្រាតែម្ដង៕

អត្ថបទ៖ អ៊ុំ សុភក្តិ