ល្អមើល! Avatar FC វាយបកយកឈ្នះ 12 Happy ឈ្នះជើងឯកពាន Dana Try Charity Cup 2022

2022-04-04 02:05:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ Dana Try Charity Cup 2022 បានបញ្ចប់ហើយកាលពីថ្ងៃសុក្រកន្លងទៅនេះ ក្រោយពីធ្វើការប្រកួតគ្នារយៈពេល១ខែពេញមក។

ក្រុមចូលរួមសរុប៨ក្រុម បានធ្វើការប្រកួតគ្នានៅតារាងបាល់ទាត់ Western ដើម្បីស្វែងរកជើងខ្លាំងឈ្នះពានរង្វាន់ខាងលើ។ ជាចុងបញ្ចប់ ក្រុម Avatar FC ដែលត្រូវក្រុម 12 Happy នាំមុខរហូតនោះ បានធ្វើល្អវិញនៅចុងម៉ោងរកបានគ្រាប់បាល់ស្មើក្នុងលទ្ធផល ៣-៣ ឯណោះ។ ដោយសារតែស្មើគ្នានេះហើយ ទើបតម្រូវឱ្យការប្រកួតនេះ ត្រូវកាត់សេចក្ដីដោយបាល់១១ម៉ែត្រតែម្ដង។ ចុងបញ្ចប់ ក្រោមក្រសែភ្នែកអ្នកគាំទ្ររាប់រយនាក់ Avatar FC ជាអ្នកធ្វើបានល្អជាង ឈ្នះក្នុងលទ្ធផល ៤-៣ នៅវគ្គប៉េណាល់ទី។

ជាមួយការគ្រងតំណែងជើងឯកពានរង្វាន់សប្បុរសធម៌ រដូវកាលទី១ ខាងលើនេះ ក្រុមជយលាភី ក៏ទទួលបានប្រាក់រង្វាន់លើកទឹកចិត្តពីលោកស្រី ទ្រី ដាណា សម្រាប់ក្រុមជើងឯក Avatar FC ទទួលបាន ១ពាន់ដុល្លារ ខណៈក្រុមចំណាត់ថ្នាក់លេខ២ 12 Happy ទទួលបាន ៥០០ដុល្លារ និងក្រុមចំណាត់ថ្នាក់លេខ៣ ស្ទួន ក៏ទទួលបានថវិកាលើកទឹកចិត្ត ៣០០ដុល្លារក្នុងមួយក្រុមផងដែរ។

ពានសប្បុរសធម៌នេះបានចាប់ផ្ដើមការប្រកួតកាលពីថ្ងៃទី២៧ ខែកុម្ភៈ ក្នុងគោលបំណងស្វែងរកថវិកា ដើម្បីជួយដល់មណ្ឌលកុមារកំព្រាខ្វះខាតមួយកន្លែង នៅខេត្តកំពង់ស្ពឺ ហើយក៏ដើម្បីរួមចំណែកលើកកម្ពស់ និងការអភិវឌ្ឍវិស័យកីឡាបាល់ទាត់កម្ពុជាផងដែរ៕