បង្ហាញឲ្យស្គាល់បុគ្គលម្នាក់នេះហើយ ធ្វើឲ្យ Emoji មានប្រើសព្វថ្ងៃ

2022-04-06 01:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Emoji អាចជួយបង្ហាញអារម្មណ៍ មានន័យលើសពីពាក្យប្រើធម្មតា។ បើអ្នកធ្លាប់ទាក់ទងនរណាម្នាក់តាមអ៊ីមែល ប្រាកដ ជាដឹងច្បាស់ថា ត្រឹមសារជាអក្សរធម្មតាមិនអាចធ្វើឲ្យការទំនាក់ទំនងមានប្រសិទ្ធភាពខ្លាំងនោះទេ។

លោក Shigetaka Kurita បានច្នៃប្រឌិត Emoji

នៅចុងឆ្នាំ ១៩៩០ យើងពឹងទាំងស្រុងលើពាក្យ ក្នុងការទំនាក់ទំនង តែគ្រប់យ៉ាងបានផ្លាស់ប្ដូរក្នុងឆ្នាំ ១៩៩៨ ពេលបុរសជនជាតិជប៉ុនម្នាក់ឈ្មោះ Shigetaka Kurita បានច្នៃប្រឌិត Emoji។

លោក Kurita ស្ថិតក្នុងក្រុមមួយទទួលខុសត្រូវបង្កើតប្រព័ន្ធ Mobile Internet ដំបូងឲ្យក្រុមហ៊ុន NTT DoCoMo។ ប្រព័ន្ធនេះ អាចឲ្យអ្នកប្រើប្រាស់ប្រើត្រឹម ២៥០អក្សរក្នុងសារ។ ដូច្នេះលោក Kurita មានគំនិតលើ Emoji ក្នុងការផ្ដល់វិធីឲ្យអ្នកប្រើប្រាស់ទំនាក់ទំនងកាន់តែងាយស្រួល ដោយប្រើទិន្នន័យតិច។

Emoji ដំបូងមានតែ ១៧៦ ប៉ុណ្ណោះ ទំហំរូបភាព 12 x 12p ដែលអាចបង្ហាញពីអារម្មណ៍ គំនិត អាកាសធាតុ ម្ហូប និងភេសជ្ជៈ។ លោក Kurita ទាញគំនិតទាំងនេះពីរឿងថ្លុកកំប្លែងរបស់ជប៉ុនហៅថា Manga និង គំនូសអក្សរចិន ដែលបានប្រើក្នុងប្រព័ន្ធសរសេររបស់ជប៉ុន (Kanji)។

ពាក្យថា Emoji មានន័យ Picture (e) Character (moji) ជារួមគឺអក្សរប្រើរូបភាព។ Emojis មានភាពខុសគ្នាទៅនឹង Emoticons ដោយមានគោលបំណងស្រដៀងគ្នា តែវិធីប្រើខុសគ្នា ដោយបន្សំអក្សរជំនួសវិញដូចជា :-)។

Emoji របស់លោក Kurita ល្បីខ្លាំងក្នុងប្រទេសជប៉ុន ហើយមិនយូរប៉ុន្មានត្រូវបានប្រើដោយក្រុមហ៊ុនបច្ចេកវិទ្យាជប៉ុនជាច្រើន ខណៈប្រើពេលយូរគួរសមដែរ ទម្រាំសាយភាយដល់ប្រទេសដទៃទៀត៕

ប្រភព៖ Wonderopolis