មិនបានហូបសាច់ថាំងចេងទេ តែតារា K-Pop ជំនាន់ទី ២ ទាំងនេះនៅតែក្មេងដូចកាលទើបចេញមុខ

2022-04-29 03:33:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមតារា K-Pop ជំនាន់ទី ២ ទាំងអស់ សង្កេតឃើញថា មាន ៨រូប ដែលត្រូវបានអ្នកគាំទ្រលើកសរសើរមិនដាច់ពីមាត់ ថាជាតារាប្រុសស្រីមានសម្រស់ស្រស់ស្អាតជាងគេនាពេលបច្ចុប្បន្ន។ មិនថាពេលវេលាកន្លងផុតទៅយូរឆ្នាំហើយក៏ដោយ ប៉ុន្តែតារាទាំងនេះ នៅតែសាច់ចាំ និងរក្សាសម្រស់ស្រស់ស្អាតឡើងៗ មិនអាចឲ្យអ្នកគាំទ្ររំលងភ្នែកបាននោះទេ។

១. Dara (2NE1)

ពេលក្រុម 2NE1 បានចេញមុខជាមួយនឹងបទ «FIRE» នៅឆ្នាំ ២០០៩ ពួកគេបានបង្ហាញមហាជននូវចំណីភ្នែក ចំណីអារម្មណ៍ថ្មី ដោយភាពក្លាហាន និងភាពលេចធ្លោរបស់ពួកគេ។ ក្នុងចំណោមសមាជិកទាំងអស់ គ្រប់គ្នាក៏មិនអាចរំលងបានពី Dara ដែរ ពិសេស Style សក់របស់នាង។

Dara នៅតែមិនខ្ចីចាស់ ទោះបីជារយៈពេលរំលងទៅមុខមិនចាំនាងក៏ដោយ ហើយស្ទើរមិនចង់ជឿថានាងគឺជាសមាជិកអាយុច្រើនប្រចាំក្រុម លំដាប់ទី២។ បច្ចុប្បន្ន Dara មានអាយុ ៣៧ឆ្នាំហើយ ដូច្នេះវាបានក្លាយជារឿងពិបាកបន្តិចក្នុងការជឿថានាងនៅតែក្មេងដូចយុវតីវ័យ១៨ឆ្នាំ។

២. Taeyeon (Girls’ Generation)

ក្រុមបានចេញមុខដំបូងនៅឆ្នាំ ២០០៧ ជាមួយនឹងបទ «Into The New World»។ មេក្រុម Taeyeon ត្រូវបានគេឲ្យរហស្សនាមថា «Kid Leader» ដោយសារសម្រស់វ័យក្មេង និងរាងតូចមាន់ចែ។

ឆ្នាំថ្មី Taeyeon ចូលវ័យ ៣៣ឆ្នាំហើយ ប៉ុន្តែនាងនៅតែជម្នះនឹងភាពចាស់ ដោយថែខ្លួនបានយ៉ាងល្អ នាំឲ្យនាងនៅតែក្មេង។

៣. Changmin (TVXQ)

Changmin បានចេញមុខដំបូងជាមួយនឹងក្រុម TVXQ កាលពីឆ្នាំ ២០០៣ ស្របពេលមានអាយុ ទើប ១៥ឆ្នាំ។ ឈានដល់ឆ្នាំ ២០២២ ប្អូនពៅរបស់ក្រុមមានអាយុ ៣៤ឆ្នាំ ហើយ ប៉ុន្តែក្នុងភ្នែក Fan លោកនៅតែក្មេងដូចមុនដដែល។

៤. Onew (SHINee)

ក្រោយ SM ជោគជ័យខ្លាំង ពេលបង្កើត TVXQ ក្រុមហ៊ុនក៏សម្រេចបង្កើតក្រុមបុរសថ្មីមួយទៀតដែលមានសមាជិក ៥ នាក់ និងជ្រើស Onew ជាមេក្រុម កាលពីឆ្នាំ ២០០៨។ គិតមកដល់ឆ្នាំ ២០២២ មេក្រុមរូបនេះមានអាយុ ៣២ និងឈានចូល ៣៣ឆ្នាំ នៅខែធ្នូខាងមុខហើយ ប៉ុន្តែ Onew នៅតែក្មេង មុខមិនចាស់ទៅណាសោះ។

៥. Bora (SISTAR)

នាងបានចេញមុខក្នុងក្រុម SISTAR នៅឆ្នាំ ២០១១ ជាមួយនឹងបទ «Push Push»។ ទោះជាយ៉ាងណា ក្រុមក៏ត្រូវបំបែកវិញនៅឆ្នាំ ២០១៧ ដោយសមាជិកម្នាក់ៗត្រូវដើរលើវិថីរៀងៗខ្លួន ចាប់យកអ្វីដែលពួកគេស្រឡាញ់ពិតៗ។ ចំណែក Bora វិញ ពេលនេះមានអាយុ ៣២ឆ្នាំ ហើយ ដោយនាងកំពុងមមាញឹកនឹងការងារសម្ដែង។

៦. Amber [f(x)]

ក្រុម [f(x)] បានបង្ហាញមុខដំបូងនៅឆ្នាំ ២០០៩ ហើយដ្បិតមកដល់ពេលនេះ ក្រុមមិនបានចេញបទថ្មី ក៏មិនទាន់មានការប្រកាសផ្លូវការថា ពួកគេបំបែកដែរ។ សមាជិកកើតឆ្នាំ ១៩៩២ ពេលនេះមានអាយុ ២៩ ឈានចូល ៣០ឆ្នាំ ឆាប់ៗនេះហើយ។

៧. Nana (After School)

Nana គឺជាសមាជិកម្នាក់ដែលមានរាងខ្ពស់ស្រឡូន និងមានមន្តស្នេហ៍បំផុត រហូតមានមុខជារឿយៗលើតារាងនារីដែលមានមុខស្អាតជាងគេប្រចាំពិភពលោក ស្រង់ដោយ TC Candler។ បច្ចុប្បន្ននាងមានអាយុ ៣០ឆ្នាំហើយ។

៨. Junho (2PM)

កាលពី Debut កាលពីឆ្នាំ ២០០៨ Junho ទើបនៅជាយុវជនវ័យ ១៨ឆ្នាំ ដែលបង្ហាញមុខជាមួយនឹងបទ «10 Out Of 10»។ មកទល់ពេលនេះ Junho មានអាយុ ៣២ឆ្នាំ ឯការងារសិល្បៈលោកនៅតែបន្តជាធម្មតា ប៉ុន្តែលោកហាក់រយាលពីការងារច្រៀង ដោយផ្ដោតខ្លាំងវិញលើការងារសម្ដែងរឿង ព្រមទាំងទទួលបានជោគជ័យមិនធម្មតា៕