លោក គង់ បាវ កូនកសិករ រៀនតែតាម Youtube ឥឡូវទទួលបានការទុកចិត្តពីឧកញ៉ា និងមន្ត្រីជាច្រើន

2022-05-18 03:41:22
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក គង់ បាវ គឺជាអ្នកជំនាញខាងប្រព័ន្ធបណ្ដាញសង្គមមួយរូបដែលមានការទទួលស្គាល់នៅក្នុងប្រទេសកម្ពុជានាពេលបច្ចុប្បន្ន ប៉ុន្តែនៅមុនជំហាននេះ លោកតស៊ូ ក្រាញននៀលណាស់ ទើបមានការទទួលស្គាល់ និងទុកចិត្តពីអ្នកតូចអ្នកធំ និងមន្ត្រីជាច្រើន ទាំងដែលខ្លួនគ្មានអ្វីសោះ។

គង់ បាវ គឺជាអ្នកស្រុកចំការលើ ខេត្តកំពង់ចាម មានបងប្អូន ៤នាក់(ស្រី ២ ប្រុស ២) លោកជាកូនពៅ។ ត្បិតតែមានវាសនាបានកើតជាកូនពៅក្នុងគ្រួសារ ប៉ុន្តែជាគ្រួសារកសិករ លោកក៏មិនបានរស់នៅសុខស្រួលដែរ ពោលគឺជីវិតខ្វះមុខខ្វះក្រោយ។ ជាក់ស្ដែងក្រោយពេលជាប់បាក់ឌុប ឡើងមករៀនភ្នំពេញ ក៏លោកមិនអាចរៀនបានចប់ចុងចប់ដើមដែរ។

យុវជនមកពីកំពង់ចាម ប្រាប់ថា លោកបានចូលរៀនសាកលវិទ្យាល័យជំនាញ "វិស្វករ និងសំណង់" ប៉ុន្តែត្រូវបង្ខំចិត្តឈប់រៀនត្រឹមឆ្នាំទី២ប៉ុណ្ណោះ។ "កាលណោះ ក្រោយពីម្ដាយខ្ញុំស្លាប់ទៅ អស់អ្នកផ្គត់ផ្គង់ អត់លុយរៀន ខ្ញុំក៏បានបង្ខំចិត្តឈប់រៀនទៅ!"។ លោក បាវ ប្រាប់ថា លោកមិនចង់រំលឹកពីជីវិតផ្ទាល់ខ្លួនច្រើនទេ គ្រាន់តែនិយាយជារួមថា លោកលំបាកឆ្អែតហើយ។

ក្រោយពីបោះបង់ការសិក្សាមហាវិទ្យាល័យកណ្ដាលទី ផ្សំនឹងមិនមានលុយទៀត មានពេលមួយលោក ក៏ចាប់ផ្ដើមជក់ចិត្តនឹងបណ្ដាញសង្គម។ ដូច្នេះហើយលោកក៏ចាប់ផ្ដើមស្វែងយល់ និងរៀនពីវា។ បាវ ថ្លែងថា "តាំងពីដើមរហូតមក ខ្ញុំអត់ដែលបានទៅរៀនជាមួយគ្រូណាទេ គឺខ្ញុំរៀនតែតាមយូធូប និង Googleប៉ុណ្ណោះ"។

លោក គង់ បាវ បានចាប់ផ្ដើមការងារជាមួយនឹងការបង្កើតទំព័រហ្វេសប៊ុក(Page) តាំងពី ២០១៣-១៤ ជាមួយគ្នាក៏បានឆ្លៀតទៅរៀនកូរ៉េ ហើយក្រោយមកក៏បានធ្វើជាគ្រូកូរ៉េនៅសាលាឯកជនមួយ។ ឆ្នាំ ២០១៥ បាវ បានទៅធ្វើការនៅកូរ៉េរយៈពេល ៥ឆ្នាំ លុះដើមឆ្នាំ ២០២០ លោកក៏បានត្រឡប់មកវិញ។ "ក្រោយមកដល់ស្រុកវិញ ក៏ចាប់ផ្ដើមធ្វើការចែករំលែកចំណេះដឹងពីការងារពាក់ព័ន្ធនឹងអាជីវកម្ម និងឌីជីថល ហើយក៏បានជួយគេដោះស្រាយបញ្ហាជាច្រើនដែរ និយាយរួមគឺជួយតែម្ដងអត់មានបានយកលុយយកកាក់អីទេពេលនោះ!”។ គង់ បាវ ថ្លែង។

ក្រៅពីនោះ លោកក៏បានធ្វើជាគ្រូបង្រៀនវគ្គខ្លីនៅតាមស្ថាប័នមួយចំនួននៅកម្ពុជាដោយបណ្តុះបណ្តាល មុខវិជ្ជាពាក់ព័ន្ធទៅនឹងយុទ្ធសាស្ត្រនៃការគ្រប់គ្រង សហគ្រិនអន្តរជាតិ ការធ្វើផែនការបង្កើតអាជីវកម្ម សេដ្ឋកិច្ច មីក្រូសេដ្ឋកិច្ច ម៉ាក្រូសេដ្ឋកិច្ច ការបកប្រែប្រព័ន្ធផ្សព្វផ្សាយសិល្បៈនៃការការសេរសេរសេចក្តីប្រកាសព័ត៌មាន ការធ្វើទីផ្សារបែបទំនើប និងជំនាញផ្សេងៗទៀតដែលពាក់ព័ន្ធនឹងអាជីវកម្ម និងឌីជីថល។ លោកក៏បានបង្រៀនផ្នែកអាជីវកម្ម និងប្រព័ន្ធផ្សព្វផ្សាយឌីជីថលដល់ម្ចាស់សហគ្រាសខ្នាតតូចជាច្រើនទាំងនៅភ្នំពេញ និងនៅតាមបណ្ដាខេត្តជាច្រើនផងដែរ។

តាមរយៈកិច្ចការទាំងអម្បាលមាណ បច្ចុប្បន្ន លោក គង់ បាវ បានក្លាយជាអ្នកជំនាញផ្នែកនេះមួយរូបនាពេលបច្ចុប្បន្ននៅកម្ពុជាដែលមានការទទួលស្គាល់។ លោកបាន បង្ហើបថា បច្ចុប្បន្នក្លាយជាអ្នកនៅពីក្រោយជួយការងារគ្រប់គ្រង និងដោះស្រាយបញ្ហា Facebook Page ឲ្យឧកញ៉ា ឯកឧត្តមលោកជំទាវជាច្រើន ដោយមានលោកមានក្រុមការងារមួយក្រុម ដែលមានសមត្ថភាពខ្ពស់ អាចដោះស្រាយបញ្ហានានាពាក់ព័ន្ធ Social Media។

ជាដំបូន្មានសម្រាប់សហគ្រិន និងយុវជនជំនាន់ក្រោយដែលចាប់អារម្មណ៍ក្នុងការចាប់ផ្តើមអាជីវកម្ម ឬអាជីពនៅក្នុងប្រព័ន្ធឌីជីថល លោក Bav Kong បានលើកទឹកចិត្តឲ្យមានការប្តេជ្ញាចិត្តខ្ពស់ ដោយហេតុថា ការចាប់ផ្ដើមអាជីវកម្មណាមួយមិនងាយស្រួលនោះឡើយ ហើយថែមទាំងពិបាកជាងអ្វីដែលយើងបានធ្វើផែនការទៅទៀត។ ទន្ទឹមនឹងការលះបង់យើងត្រូវចេះច្នៃប្រឌិតនិងបង្កើតឱ្យបាននូវគុណតម្លៃ (value proposition) សម្រាប់អតិថិជន និងបុគ្គលដែលពាក់ព័ន្ធក្នុងអាជីវកម្មរបស់យើងផង៕

អត្ថបទ៖ ទារិកា