លោក អ៊ូ ផាន់ណារិទ្ធ ជា​ប្រធាន​នាយកដ្ឋាន​សន្ដិសុខ​បច្ចេកវិទ្យា​គមនាគមន៍និង​ព័ត៌មាន ​នៃ​ក្រសួង​ប្រៃសណីយ៍​និង​ទូរគមនាគមន៍ បានចែក​រំលែក​ពី​​គន្លឹះខ្លះៗទាក់​ទង​ទៅ​នឹង​ប្រធានបទវិធីសាស្ត្រនៃហេគឃីង ហើយ​លោក​ក៏ជា​បុគ្គល​ឆ្នើម​ម្នាក់​ដែល​ធ្លាប់​មាន​បទពិសោធន៍ជាច្រើន​ឆ្នាំ​លើ​​​​ការ​ស្រាវជ្រាវ​​​ប្រធាន​បទ​មួយ​នេះ​។

តាម​រយៈ​ទំព័រ​ផ្លូវការ​​របស់​លោក​បាន​សរសេរថា​៖ “តើអ្នកជា ​Ethical Hacker ឬក៏គ្រាន់តែជាអ្នកប្រើប្រាស់ Tools (Script Kiddies?)” សំណួរក្នុងថ្ងៃនេះគឺថា តើធ្វើដូចម្តេចដើម្បីក្លាយខ្លួនជា Ethical Hacker (អ្នកវាយប្រហារមានក្រមសីលធម៌) ឬហៅថា White Hat hacker? តើការសិក្សាវគ្គខ្លីទាក់ទងទៅនឹងការវាយប្រហារ, វាយលុក ឬការហេគចូលប្រព័ន្ធ អាចធ្វើឱ្យអ្នក ក្លាយទៅជាអ្នកវាយប្រហារបានដែរឬទេ? ដំបូងឡើយ អ្នកត្រូវយល់ដឹងអំពីទស្សនាទាន (concept) ឲ្យបានច្បាស់ថា ការប្រើប្រាស់នូវកម្មវិធីដែលមានស្រាប់ៗ គឺមិនធ្វើឲ្យអ្នកក្លាយទៅជាហេគឃ័របានឡើយ។ ការសិក្សាអំពីវិធីសាស្ត្រនៃហេគឃីង Hacking គឺមិនមែនងាយស្រួលឡើយ តែបើសិនជាអ្នកមាននូវចំណាប់អារម្មណ៍នៅក្នុងការហេគនោះអ្នកនឹងអាចសិក្សាទៅមុខបានលឿន។ វាអាស្រ័យទៅលើខ្លួនអ្នក ថាតើអ្នកត្រូវចាប់ផ្តើមយ៉ាងដូចម្តេច ក្នុងការសិក្សាអំពី HACKING ។

នេះគឺជាជំហានខ្លះៗដែលអ្នកអាចធ្វើតាមដើម្បីក្លាយខ្លួនទៅជាហេគឃ័រប្រកបដោយ សមត្ថភាព និងប្រកបការងារដោយ​ទំនុកចិត្ត៖

១. សិក្សារាល់មូលដ្ឋានគ្រឹះនៃកុំព្យូទ័រ (ចាប់ផ្តើមពីប្រតិបត្តិការ តើវាដំណើរការយ៉ាងដូចម្តេច ...)

២. សិក្សាអំពីមូលដ្ឋានគ្រឹះនៃបណ្តាញ (network)

៣. សិក្សាទៅលើប្រព័ន្ធប្រតិបត្តិការឲ្យបានច្រើនជាងមួយ (ដូចជា Linux ជាដើម)

៤. ចាប់ផ្តើមសិក្សាអំពីការសរសេរកម្មវិធី (ចាប់ផ្តើមជាមួយនឹង C Programming)

៥. រៀន PHP សម្រាប់ការវាយប្រហារទៅលើវិបសាយ (វាក៏ជួយអ្នកក្នុងការអភិវឌ្ឍន៍វិបសាយផងដែរ)

៦. សិក្សាភាសាសរសេរកម្មវិធីផ្សេងៗទៀត (Java, C++, C#, ...)

៧. សិក្សាអំពី Scripting language (JavaScript, Phyton, ...)

៨. អានរាល់ព័ត៌មាននៃការវាយប្រហារថ្មីៗ ដឹងអំពីពាក្យថ្មីៗ ដឹងអំពីមេរោគថ្មីៗ

៩. យ៉ាងហោចណាស់ ធ្វើការមុខកុំព្យូទ័រពី ៥ ទៅ ៦ម៉ោងក្នុង១ថ្ងៃ

១០. ព្យាយាមយល់ដឹងថាតើ hacking tool ធ្វើការងារយ៉ាងដូចម្តេច?

១១. ព្យាយាមបង្កើតកម្មវិធីដោយខ្លួនឯង ដោយប្រើប្រាស់ Python ឬភាសាផ្សេងៗទៀត

១២. ស្វែងរកនូវចំនុចខ្សោយថ្មីៗនៅក្នុងវិបសាយ

១៣. ជាពិេសសគឺ រៀនអំពីវិធីសាស្ត្រការពារខ្លួន

១៤. អនុវត្តន៍ឲ្យបានច្រើន បើសិនជាអ្នកមិនមានចំណេះដឹងអំពីសន្តិសុខផ្ទាល់ខ្លួន (own security) ខ្លួននោះទេ ចូរកុំព្យាយាមធ្វើការវាយប្រហារឲ្យសោះ វាគឺជាហានិភ័យខ្ពស់ណាស់។ តើអ្នកក្លាយខ្លួនទៅជា ethical hacker ពិតប្រាកដហើយឬនៅ?

អត្ថបទ៖ រក្សា