គ្រប់គ្នាមិនទាន់រំលងការតាមដាន​នៅឡើយទេ ចំពោះ បេក្ខជន​ម្នាក់របស់កម្មវិធី Cambodian Idol គឺលោក ទុំ សុវត្ថិ ដែលខកឱកាស អានឈានទៅវគ្គបន្តនៃកម្មវិធីបាន។ ដោយក្ដី​អាណិត ឧកញ៉ា ខេមរៈ សិរីមន្ត ក៏បាន​ប្រកាសស្វែងរក ទុំ សុវត្ថិ ក្នុងបំណងផ្ដល់ឱកាសអ្វីមួយ។

ជាក់ស្ដែង បន្ទាប់ពី ឧកញ៉ា ខេមរៈ សិរីមន្ត ពេល​នេះ​ក៏មាន​ការ​ប្រកាសថ្មីមួយទៀតចេញ​ពី​តារាចម្រៀង ខាន់ ជែមស៍ ដោយ​បាន​បង្ហោះលើ ទំព័រហ្វេសប៊ុក​ថា​ ខ្លួន​នឹងជួយដល់ យុវជន​រូបនេះ​ ដោយផលិតជា បទ​ចម្រៀង​ថ្មីសន្លាង ព្រមទាំងចេញជា MV ឲ្យទៀត។

ក្រោយឆ្លងកាត់ព្យុះភ្លៀងច្រើន ហើយបរាជ័យផ្ទួនៗ ពេលនេះ​ ទុំ សុវត្ថិ មាន​សង្ឃឹមហើយ ដោយមានដៃជាច្រើន ហុចមកចាប់ស្ទួយលោកឡើងមកវិញ។ កាយវិការសប្បុរស ពេញដោយចិត្តអាណិតស្រឡាញ់របស់​ ឧកញ៉ា ខេមរៈ សិរីមន្ត និង​លោក ខាន់ ជែមស៍ នៅពេល​នេះ​ គឺ​ប្រៀបដូចជាបានផ្ដល់ជីវិតថ្មីឲ្យ យុវជន​ដែល​មាន​សមត្ថភាព​ពិសេសរូបនេះ​ អាចងើបឈរបន្តទៀតបានលើវិថីសិល្បៈនេះ។

ពីក្រោយការបង្ហោះនោះដែរ ក៏មាន​ការសាទរ និងគាំទ្រ ក៏ដូចជាសរសើរអស់ពីចិត្តពីមហាជន ចំពោះទឹកចិត្តរបស់ ខាន់​ ជែមស៍ នៅពេលនេះ ហើយម្នាក់ៗទប់ចិត្តមិនរំភើបមិនបានទេ៕