ហង្ស ឈា ឡើងផ្ទះថ្មីលើភ្នំ និមន្តព្រះតេជគុណ គូ សុភាព ពីស្រុកខ្មែរទៅ?

2022-06-17 05:06:17
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហង្ស ឈា បានបង្ហោះរូបភាព ដែលបានពីការសន្ទនាតាមទូរស័ព្ទជាមួយព្រះតេជគុណ គូ សុភា នៅលើបណ្ដាញសង្គមព្រឹកនេះ ដោយបានបញ្ជាក់ថា លោកបាននិមន្តព្រះតេជគុណ មកផ្ទះរបស់លោកឆាប់ៗនេះ ដោយធ្វើឲ្យមានការចាប់អារម្មណ៍។

ដំណឹងនេះ ក្រោយពីថ្មីៗ គេបានដឹងថា លោកទើបនឹងបានទិញផ្ទះធំថ្មីមួយ ជាប្រភេទផ្ទះនៅលើភ្នំ ដែលប្រមូលផ្ដុំដោយអ្នកដែលមានជីវភាពខ្ពស់រស់នៅ។ លោកបាបានទិញផ្ទះនោះ តាំងពីនៅដីទទេ ក្រោយមកបានសាងសង់ តាមគំនិចរចនារបស់លោកផ្ទាល់អស់រយៈពេលជាង១ឆ្នាំមកហើយ។ មកដល់បច្ចុប្បន្ន គេជឿថាផ្ទះនោះរួចរាល់ជាស្ថាបពរហើយ ខណៈគេឃើញថៅកែតែគុជ Boba Tea នាំគ្រួសារចូលទៅរស់នៅតាំងពីប៉ុន្មានខែមុនម្ល៉េះ។

លុះនៅថ្ងៃនេះ លោកបង្ហោះរូបភ្ជាប់ជាមួយព្រះតេជគុណ គូ សុភាព និងបានបញ្ជាក់ថា ព្រះសង្ឃខ្មែរដ៏ល្បីអង្គនេះ នឹងនិមន្តមកផ្ទះរបស់លោកនៅប៉ុន្មានថ្ងៃទៀតនោះ នាំឲ្យមានចម្ងល់ថា តើលោក ហង្ស ឈា ឡើងផ្ទះថ្មីនោះ ដោយនិមន្តព្រះតេជគុណ គូ សុភាព ទៅពីស្រុកខ្មែរផ្ទាល់ ឬយ៉ាងណា?

ចំពោះបញ្ហានេះ ម្ចាស់គេហដ្ឋានលើភ្នំក្នុងទីក្រុង Lynn បានឆ្លើយប្រាប់តាមសារអេឡិចត្រូនិកថា លោកពិតជាបាននិមន្តព្រះតេជគុណ គូ សុភាព មកផ្ទះរបស់លោកមែន។ ប៉ុន្តែនោះមិនមែនជាពិធីឡើងធំអ្វីនោះទេ។ លោកថា ព្រះតេជគុណ បច្ចុប្បន្នកំពុងគង់នៅសហរដ្ឋអាមេរិកស្រាប់ មិនមែននិមន្តមកពីស្រុកខ្មែរមកផ្ទាល់នោះទេ។

ដូច្នេះហើយ គាប់ជួននឹងព្រះអង្គមកដល់ទឹកដីសហរដ្ឋអាមេរិកស្រាប់ហើយ ហើយផ្ទះលោកទើបនឹងរួចរាល់ការសាងសង់ ទើបលោកសម្រេចនិមន្តព្រះអង្គ មកកាន់គេហដ្ឋានថ្មីរបស់លោកតែម្ដង។ ព្រះតេជគុណ គូ សុភាព នឹងនិមន្តមកគេហដ្ឋានថ្មីលោក ហង្ស ឈា នៅថ្ងៃអាទិត្យចុងសប្ដាហ៍នេះ។ ដូច្នេះហើយ គាប់ជួនល្អបែបនេះ លោកថា ពិធីប្រោះព្រំតិចតួចនឹងមាន ដើម្បីលើករាសី និងផ្ដល់ភាពចម្រុងចម្រើនដល់គ្រួសារ រួមទាំងមុខរបររបស់លោកផង។

ផ្ទះថ្មីរបស់លោក ហង្ស ឈា និងគ្រួសារ ស្ថិតក្នុងទីក្រុង Lynn រដ្ឋម៉ាស្សាឈូសេត សហរដ្ឋអាមេរិក។ តាមដំណឹង ទីនោះ មានផ្ទះប្រភេទនេះ តែ ១១ល្វែងតែប៉ុណ្ណោះ និងមួយៗ មានតម្លៃដល់ទៅប្រមាណ ១លានដុល្លារអាមេរិកឯណោះ។ យ៉ាងណា ហង្ស ឈា បានព្យាយាមមិនឆ្លើយពីករណីនេះឡើយ ក្នុងបទសម្ភាសន៍កន្លងមក៕

អត្ថបទ៖ ទារិកា