អាចជាប្រផ្នូលល្អទេដឹង! ទើបចេញរឿងបេក្ខភាពជយលាភី MUC ជួបរឿងចៃដន្យ ស្ទើរមិនគួរឲ្យជឿ

2022-06-18 02:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រឡងសមត្ថភាព និងសម្រស់ Miss Universe Cambodia 2022 បានបញ្ចប់ទៅហើយកាលពីថ្មីៗនេះដោយកញ្ញា ហង្ស ម៉ានីតា កូនកាត់ខ្មែរ-បារាំង បានឈ្នះជយលាភី ប៉ុន្តែបើតាមដល់ បានដឹងថា ម្ចាស់ជយលាភីបានជួបរឿងចៃដន្យស្ទើរមិនគួរឲ្យជឿ។

រឿងចៃដន្យនេះ ទើបនឹងបើកកកាយក្នុងសន្និសីទសារព័ត៌មាន ដែលផ្ដួចផ្ដើមដោយហាងពេជ្រ CSNJ នារសៀលម្សិលមិញ។ ដើមឡើយ ហាងលក់គ្រឿងអលង្កការមួយនេះ បានឧបត្ថម្ភការផលិតមកុដ ដែលសាងឡើងដោយពេជ្រ និងត្បូងរតនៈគីរី មានតម្លៃដល់ទៅ ១៨ម៉ឺនដុល្លារអាមេរិក សម្រាប់បំពាក់ជូនម្ចាស់ជយលាភី។

ស្រាប់តែរឿងចៃដន្យ បានកើតឡើងក្នុងថ្ងៃផ្ដាច់ព្រ័ត្រនៃកម្មវិធី ដែលពេលនោះម្ចាស់ជយលាភីកញ្ញា ហង្ស ម៉ានីតា ជាបេក្ខភាពពាក់ផ្លាកលេខ ១៨ ដូចនឹងតម្លៃសាងមកុដនេះឡើង។ មកដល់ចំណុចនេះ លោក ជិន សំណាង ម្ចាស់ហាងពេជ្រខាងលើ ប្រាប់ក្នុងសន្នីសីទសារព័ត៌មានកាលពីយប់មិញថា លោកពិតជាភ្ញាក់ផ្អើល និងជារឿងចៃដន្យមិនគួរឲ្យជឿ។

“យើងគិតមើល វាដូចជាចៃដន្យមែនទែនណា មកុដយើងធ្វើមកអស់ ១៨ម៉ឺនដុល្លារ ស្រាប់តែបេក្ខនារីដែលឈ្នះ គឺពាក់ផ្លាកលេខ ១៨ទៀត យី...តិចមិនស្រួល យើងអាចឈ្នះជយលាភីអីទៀតទេដឹងអ្ហី(សើច)”។

លោក ជិន សំណាង បានលើកឡើងម្ដងហើយម្ដងទៀតថា លោកពិតជាចង់ឃើញមោទកភាពរបស់កម្ពុជា តាមរយៈកម្មវិធីខាងលើ ខណៈជាច្រើនឆ្នាំមកហើយ គ្រប់ការប្រកួតកម្មវិធីនេះ ឬកម្មវិធីស្រដៀងគ្នា កម្ពុជា បានត្រឹមតែកំដរឆាក ខណៈប្រទេសជិតខាងយើង គេបានសាងមោទកភាពជូនជាតិគេបន្តបន្ទាប់។

ស្ថានភាពនេះ នាំឲ្យលោកដិតដាមក្នុងចិត្ត ចង់ឃើញបេក្ខភាពកម្ពុជាសាងមោទកភាពជូនជាតិដែរ។ ដូច្នេះហើយទើបលោកសម្រេចជ្រើសយកការធ្វើអ្វីដែលលោកផ្ទាល់អាចធ្វើបាន គឺឧបត្ថម្ភមកុដតម្លៃ ១៨ម៉ឺនដុល្លារទុកសម្រាប់ម្ចាស់ជយលាភីតំណាងកម្ពុជាពាក់ឡើងប្រកួតលើឆាកអន្តរជាតិ។

លោកលើកឡើងថា បេក្ខភាពកម្ពុជាពី១ឆ្នាំទៅ១ឆ្នាំ មានការរីកចម្រើន ដូច្នេះហើយឆ្នាំនេះ លោកផ្ដើមមានអារម្មណ៍ថ្មីទៀត ពិសេសក្រោយរឿងចៃដន្យលើបេក្ខភាពពាក់ស្លាកលេខ១៨នេះ លោកផ្ដើមអារម្មណ៍ដិតដាមទៀតថា នោះអាចជាប្រថ្នូលល្អសម្រាប់ការប្រកួតនាពេលខាងមុខ។

លោក ម៉ែន និមលរតន៍ ប្រធានរៀបចំកម្មវិធី Miss Universe Cambodia 2022 បានលើកឡើងដូច នឹងម្ចាស់ហាងពេជ្រ CSNJ ដែរថា បេក្ខភាពកម្ពុជាពី១ទៅ១ឆ្នាំ កាន់តែរីកចម្រើន។ ស្ថានភាពនេះ មិនយូរទេ កម្ពុជានឹងធ្វើបាន ពិសេសក្នុងឆ្នាំនេះ លោកសង្ឃឹមថា បេក្ខភាពកម្ពុជានឹងទទួលបានលទ្ធផលល្អ។

កញ្ញា ហង្ស ម៉ានីតា ត្រូវបានប្រកាសជាម្ចាស់ជយលាភី Miss Universe Cambodia 2022 ក្នុងការប្រកួតផ្ដាច់ព្រ័ត្រកាលពីរាត្រីថ្ងៃពុធ ទី១៥។ បេក្ខភាពរូបនេះ ត្រូវបានគេមើលឃើញថា មានអំណោយផលទាំងព្រម ទាំងស្អាត មានចំណេះដឹងទូលំទូលាយ ព្រមអាចប្រើប្រាស់ភាសាអង់គ្លេសបានយ៉ាងស្ទាត់ជំនាញ ហើយទាំងនេះ ជាមូលហេតុនាងទទួលបានជយលាភី ក្រោមការគាំទ្រយ៉ាងច្រើន។

សាមីខ្លួន បានប្រាប់ថា ខ្លួននាងផ្ទាល់ រំភើបមិនដឹងយកអ្វីមកនិយាយ និងមានកិត្តិយសខ្លាំងណាស់ ដែលបានគ្រងមកុដតំណាងកម្ពុជាឡើងលើឆាកអន្តរជាតិ។ នាងថា នឹងប្រឹងប្រែងឲ្យអស់លទ្ធភាព ពិសេសត្រៀមបង្ហាញពិភពលោកនូវអ្វីដែលជាភាពអស្ចារ្យនៃសម្បត្តិវប្បធម៌ខ្មែរ។

ម៉ានីតា ត្រៀមនឹងតំណាងកម្ពុជាចេញទៅប្រកួតនៅអន្តរជាតិ ដែលគិតត្រឹមពេលនេះ មិនទាន់ដឹងថានៅទីណាច្បាស់នៅឡើយ។ ពាក់ព័ន្ធរឿងនេះ លោក ជិន សំណាង ព្រលយថា ប្រសិនបើការប្រកួតអន្តរជាតិនោះ ធ្វើនៅប្រទេសក្បែរខាងកម្ពុជា លោកអាចនឹងម៉ៅយន្តហោះ១គ្រឿងដឹកអ្នកគាំទ្រកម្ពុជាទៅលើកទឹកចិត្តបេក្ខភាពតំណាងកម្ពុជាដោយផ្ទាល់។

មិនត្រឹមប៉ុណ្ណឹង បុរសដែលដិតដាមស្មារតីជាតិនិយមជ្រាលជ្រៅរូបនេះ នៅនិយាយទៀតថា លោកនឹងយករថយន្ត Rolls Royce ទៅដង្ហែរបេក្ខភាពរបស់កម្ពុជាពីព្រលានយន្តហោះថែមទៀត ប្រសិនបើនាងសម្រេចបានមោទកភាពឲ្យកម្ពុជាបានទៀតនោះ៕