ក្លឹបអគ្គិសនីធ្វើបានល្អនៅលីគ២ខ្សែបម្រើ ឃុន សេងថៃ ថាមកពីចំណុចទាំងនេះ

2022-08-18 04:16:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតនៅជម្រើសជើងឯកលីគ២ឆ្នាំ២០២២នេះ ក្លឹបបាល់ទាត់អគ្គិសនីកម្ពុជាធ្វើបានល្អខ្លាំង ដោយមាន៣៥ពិន្ទុក្រោយឆ្លងកាត់១៥ប្រកួតគិតត្រឹមសប្ដាហ៍ទី១៥ តាមពីក្រោយដោយកោះកុងអេហ្វស៊ី និងអាយ អេស អាយ ដង្កោរសែនជ័យ មាន៣២ពិន្ទុដូចគ្នា។

កីឡាករ ឃុន សេងថៃ

ធ្វើបានល្អឈ្នះ១១ប្រកួត ចាញ់២ប្រកួត និងស្មើ២ប្រកួតនេះដែរ ខ្សែបម្រើដ៏លេចធ្លោប្រចាំក្រុមអគ្គិសនីកម្ពុជា ឃុន សេងថៃ បានឱ្យ Sabay ដឹងថាមកពីមានការខំប្រឹងប្រែង និងជម្រុញលើកទឹកចិត្តពីថ្នាក់ដឹកនាំក្លឹប គ្រូបង្វឹក មិត្តរួមក្រុម និងអ្នកគាំទ្រ។

អតីតសមាជិកយុវជនរបស់ក្លឹបបាល់ទាត់បឹងកេត បានពន្យល់ថា ៖«កត្តាដែលធ្វេីឱ្យពួកយេីងធ្វេីបានល្អនោះមកពីគ្រូជម្រុញទឹកចិត្តនិងម្នាក់ៗខំប្រឹងប្រែងហ្វឹកហាត់ក៏ដូចជាពេលប្រកួតនិងការៀបចំក្រុមបានល្អទៀតនោះ ទេីបពួកយេីងធ្វេីបានលទ្ធផលបែបនេះ»។

កំពុងដឹកនាំកំពូលតារាងលីគ២ ក្រុមបាល់ទាត់ដឹកនាំដោយលោកគ្រូបង្គោល ទុំ សារ៉ាយ ដែលគេស្គាល់ថាជាអតីតកីឡាករដ៏ឆ្នើមរបស់ក្រុមជម្រើសជាតិកម្ពុជា នឹងឡើងទៅកាន់លីគកំពូលកម្ពុជា Cambodian Premier League បានវិញនៅរដូវកាលក្រោយ។ ទោះបីជាយ៉ាងណា កីឡាករដែលជាសរសៃឈាមក្រុម ឃុន សេងថៃ មិនទាន់ជឿជាក់ខ្លាំងពេកទេពោលគឺត្រឹម ៥០/៥០ ព្រោះជុំទីពីរនេះគេមេីលឃេីញថា ក្រុមដទៃទៀតរៀបចំបានល្អជាងជុំទីមួយ។ ដូច្នេះហើយគេនិងក្រុមទាំងមូលនឹងខិតខំប្រឹងប្រែងឱ្យបានល្អ ដេីម្បីឱ្យក្រុមទទួលបានលទ្ធផលល្អនៅលីគ២នេះ។

គួរបញ្ជាក់ថា មិនត្រឹមតែធ្វើបានល្អនៅលីគ២ទេ ថ្មីៗនេះក្លឹបបាល់ទាត់អគ្គិសនីកម្ពុជាក៏មានសមត្ថភាពមិនធម្មតាដោយបានទម្លាក់ក្រុមលីគកំពូលកម្ពុជាគិរីវង់សុខសែនជ័យឡើងទៅវគ្គ៨ក្រុមចុងក្រោយ ក្នុងពានសម្ដេចអគ្គមហាសេនាបតីតេជោ ហ៊ុន សែន ឆ្នាំ២០២២នេះផងដែរ៕

អត្ថបទ៖ អ៊ុំ សុភក្តិ