រឿងរ៉ាវដែលនៅពីក្រោយ ក្រដាស១០០០រូពីរបស់នេប៉ាល់ ប្ដូរពីដំរី១ក្បាលទៅដំរីភ្លោះវិញ

2022-08-24 06:31:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាយូរណាស់មកហើយដែលមានការរិះគន់ជាបន្តបន្ទាប់ពីរូបដំរីនៅលើក្រដាសប្រាក់១០០០រូពីរបស់ប្រទេសនេប៉ាល់ ដែលផលិតចាប់តាំងពីឆ្នាំ១៩៨២មកម៉្លេះ។ មូលហេតុព្រោះនៅលើក្រដាសប្រាក់នេះបែរជាដាក់តាំងបង្ហាញពីរូបដំរីដែលមិនមែនមានដើមកំណើតនៅលើទឹកដីនេប៉ាល់នោះឡើយ។

បើតាមពិតទៅ រូបដំរី១ក្បាលនៅលើក្រដាសប្រាក់១០០០រូពីរបស់នេប៉ាល់គឺជាដំរីអាហ្វ្រិក នេះបើតាមការពិនិត្យឲ្យជាក់លាក់ពីអ្នកជំនាញផ្នែកសត្វព្រៃ។ ផ្អែកលើមូលហេតុនេះហើយទើបនៅចន្លោះឆ្នាំ២០១១ ដល់ឆ្នាំ២០១២ នេប៉ាល់បានសម្រេចបង្កើតគណៈកម្មាធិការកំណត់សម្គាល់ និងរចនាកាក់ប្រាក់ នៃធនាគារកណ្ដាលនេប៉ាល់ Rastra ដើម្បីពិចារណាលើការផ្លាស់ប្ដូររូបថ្មីសម្រាប់ក្រដាសប្រាក់១០០០រូពី។

លោក Megh Bahadur Pandey តំណាងឲ្យនាយកដ្ឋានឧទ្យានជាតិនិងអភិរក្សសត្វព្រៃនេប៉ាល់ បានធ្វើការជំទាស់ដាច់ខាតចំពោះការប្រើប្រាស់រូបភាពសត្វព្រៃបរទេសនៅលើក្រដាសប្រាក់ជាតិរបស់ខ្លួន។ សមាជិកនៃគណៈកម្មាធិការថ្មីខាងលើក៏យល់ស្របជាមួយមតិលោក Pandey ហើយក៏បោះឆ្នោតសម្រេចប្រើប្រាស់រូបភាពថ្មី។

លោក Pandey បានជួលអ្នកថតរូបម្នាក់ក្នុងការផ្ដិតយករូបសត្វដំរីថ្មី។ ជាចុងក្រោយ ពួកគេបានជ្រើសយករូបដំរីភ្លោះ២ក្បាលឈ្មោះ Ram និង Lakshman ដែលកើតនៅតំបន់ឧទ្យានជាតិ Chitwan នាឆ្នាំ២០០៩ មកធ្វើជារូបតាំងបង្ហាញលើក្រដាសប្រាក់១០០០រូពី។ ដំណើរការផ្លាស់ប្ដូរនេះទម្រាំបានចេញជាផ្លែផ្កាគឺចំណាយពេលអស់៨ឆ្នាំឯណោះ ពោលគឺក្រដាសប្រាក់១០០០រូពីថ្មីទើបផលិតហើយចរាចរនៅពាក់កណ្ដាលឆ្នាំ២០២០នេះទេ៕