រត់ប្រណាំងពាក់កណ្តាលម៉ារ៉ាតុង និងប្រណាំងកង់លើភ្នំបូកគោ យកថវិកាជួយមន្ទីរពេទ្យ គន្ធបុប្ផា

2022-11-28 07:01:31
ចំនួនមតិ 0 | ចំនួនចែករំលែក 0

ចន្លោះមិនឃើញ

សណ្ឋាគារ ឋានសួគ៌ សុខា បានរៀបចំព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់ លើកទី៧ នៅលើភ្នំបូកគោ រយៈពេល២ថ្ងៃ ដើម្បីស្វែងរកមូលនិធីជួយដល់មន្ទីរពេទ្យគន្ធបុប្ជា ខណៈអ្នកចូលរួមប្រកួតទាំងអស់បានបង្ហាញក្តីរីករាយ គាំទ្រយ៉ាងពេញទំហឹង ដោយពួកគាត់បានចូលរួមចំណេញទាំងសុខភាព និងជួយធ្វើសកម្មភាពសប្បុរសធម៌។

លោក កែវ សិទ្ធ នាយកផ្នែកលក់នៃសណ្ឋាគារ សុខា គូសបញ្ជាក់ថា ការរៀបចំព្រឹត្តិការណ៍ដ៏ធំប្រចាំឆ្នាំលើភ្នំបូកគោ រយៈពេល២ថ្ងៃនេះមានអ្នកស្នេហាកីឡាចូលរួមសរុបប្រមាណ៧០០នាក់ ក្នុងនោះអ្នកចូលរួមរត់ប្រណាំងជាង៥០០នាក់ និងអ្នកចូលរួមប្រណាំងកង់ជាង១០០នាក់។ ក្រៅពីជនជាតិខ្មែរ ក៏មានជនជាតិបរទេសចូលរួមច្រើននាក់ផងដែរ ដើម្បីគាំទ្រដល់កម្មវិធីនេះបានប្រព្រឹត្តទៅដោយរលូន និងជោគជ័យ ប្រកបដោយបរិយាកាសសប្បាយរីករាយ មិត្តភាព សាគ្គីភាព និងបង្កប់នូវអនុស្សាវរីយ៍ល្អៗមិនអាចបំភ្លេចបានផងដែរ។

លោក កែវ សិទ្ធ បន្ថែមទៀតថា នេះជាកម្មវិធីសប្បុរសធម៌ប្រចាំឆ្នាំ ហើយទឹកប្រាក់ដែលទទួលបានពីព្រឹត្តិការណ៍នេះនឹងត្រូវបរិច្ចាគជូនទៅមន្ទីរពេទ្យ គន្ធបុប្ផា។ ព្រឹត្តិការណ៍ការនេះរួមមានកម្មវិធីសប្បាយៗជាច្រើន ក្នុងនោះក៏មានការប្រគំតន្រ្តីដ៏ធំ ការរត់ពាក់កណ្តាលម៉ារ៉ាតុង រួមមាន៖ ចម្ងាយ ២១គីឡូម៉ែត្រ ១០គីឡូម៉ែត្រ ៥គីឡូម៉ែត្រ និងការរត់បែបកម្សាន្តលក្ខណៈគ្រួសារ ៣គីឡូម៉ែត្រ ព្រមទាំងការប្រណាំងកង់ ៣២គីឡូម៉ែត្រ ដែលជាឱកាសដ៏ល្អឥតខ្ចោះ ដើម្បីបង្កើតនូវអនុស្សាវរីយ៍ ដែលមិនអាចបំភ្លេចបានជាមួយមិត្តភក្តិ និងក្រុមគ្រួសាររបស់អ្នកចូលរួមនានា។ ការចូលរួមក្នុងព្រឹត្តិការណ៍នេះមិនត្រឹមតែផ្តល់នូវភាពសប្បាយរីករាយ និងសុខភាពប៉ុណ្ណោះទេ ប៉ុន្តែថែមទាំងជួយគាំទ្រដល់សកម្មភាពសប្បុរសធម៌ដ៏មានអត្ថន័យថែមទៀតផង។

ក្នុងព្រឹត្ដិការណ៍ដ៏អស្ចារ្យនេះ ក៏មានសកម្មភាពកម្សាន្តផ្សេងៗជាមួយ និងការប្រគំតន្រ្តីផ្ទាល់ រួមនិងស្តង់លក់អាហារ និងភេសជ្ជៈនៅបរិវេណខាងក្រៅសណ្ឋាគារ ក្រោមរាត្រីដ៏សែនមនោរម្យ។ ភ្ញៀវចូលរួមអាចជ្រើសរើសក្នុងការស្នាក់នៅសណ្ឋាគារប្រណីត ឋានសួគ៌ សុខា ឬសណ្ឋាគារ ឡឺ បូកគោ ផាឡេស ជាមួយនឹងការផ្តល់ជូនតម្លៃពិសេស ឬទទួលយកបទពិសោធន៍ពីការបោះតង់ផងដែរ។

កម្មវិធីនេះ ប្រារព្ធឡើងនៅលើភ្នំបូកគោ ស្ថិតក្នុងខេត្តកំពត ដែលជាគោលដៅទេសចរណ៍ប្រវត្តិសាស្រ្តដ៏ល្បីល្បាញនៅក្នុងប្រទេសកម្ពុជា ជាមួយនឹងទេសភាពដ៏ស្រស់ត្រកាល និងតំបន់ទេសចរជាច្រើន ដែលអ្នកចូលរួមអាចស្វែងយល់ និងកម្សាន្តជាមួយនឹងការផ្សងព្រេងផ្សេងៗ។

ក្រោយបញ្ចប់ការប្រកួតរត់ប្រណាំង និងប្រណាំងកង់ កីឡាករ កីឡាការិនីបានបង្ហាញនូវក្តីសប្បាយរីករាយ ចំពោះការចូលរួម ក្រោមការរៀបចំរបស់គណៈកម្មការបច្ចេកទេសប្រកបដោយភាពសុក្រិតយុត្តិធម៌ រៀបចំបានល្អប្រសើរ ប្រកបអាកាសធាតុបរិសុទ្ធលើកំពូលភ្នំបូកគោ។ កីឡាករ កីឡាការិនីបានកោតសរសើរ និងវាយតម្លៃខ្ពស់ចំពោះអ្នករៀបចំព្រឹត្តិការណ៍ដំណើរការដោយរលូន ហើយពួកគាត់ក៏បានសំណូមពរឲ្យរៀបចំឲ្យបានច្រើនលើក ក្នុង១ឆ្នាំផងដែរ។

ចំពោះលទ្ធផលជ័យលាភី រួមមាន៖ ផ្នែករត់ប្រណាំងពាក់កណ្តាលម៉ារ៉ាតុង ២១គីឡូម៉ែត្រ លេខ១ កីឡាករ ម៉ា វីរ៉ូ លេខ២ កីឡាករ ម៉ឺន ឯម និងលេខ៣ កីឡាករ សម រចនា។ ១០គីឡម៉ែត្របុរស លេខ១ កីឡាករ កាង ធឿន លេខ២ កីឡាករ ហ៊ុយស៊ាង លេខ៣ សួស សេរីរដ្ឋា។ ១០គីឡូម៉ែត្រ ផ្នែកនារី កីឡាការិនី ស្នូត រីដា លេខ២ លាង ចន្ធី និងលេខ៣ កីឡាការិនី សូយ សុភា។ ក្រៅពីនេះក៏មានជ័យលាភី ៥គីឡូម៉ែត្រ និង៣គីឡូម៉ែត្រ ដែលទទួលបានរង្វាន់លើកទឹកចិត្ត និងវត្ថុអនុស្សាវរីយ៍ផងផងដែរ។

ជ័យលាភីផ្នែកប្រណាំងកង់ វិញ្ញាសា ELIT លេខ១ កីឡាករ សាន ណាម៉ាវ លេខ២ កីឡាករ សីហា និងលេខ៣ កែវ សុផា ខណៈជ័យលាភីលើវិញ្ញាសា Open និង Master ក៏ត្រូវបានរកឃើញពីលេខ១ដល់លេខ៥ដូចៗគ្នាផងដែរ៕