តំណាងក្រសួងអប់រំ៖ សរសើរភាពរីកចម្រើន និងការដឹកនាំរបស់សហព័ន្ធវាយកូនឃ្លីលើតុ

2022-11-30 02:38:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តំណាងក្រសួងអប់រំ យុវជន និងកីឡា បានសរសើរមិនដាច់ពីមាត់ពីភាពរីកចម្រើន និងការដឹកនាំរបស់ឯកឧត្ដម គៀត ច័ន្ទថារិទ្ធ ចំពោះសហព័ន្ធកីឡាវាយកូនឃ្លីតុពិសេសក្នុងព្រឹត្តិការណ៍កីឡាជាតិលើកទី៣នេះ។

រូបភាពផេក Cambodia 2023

ឯកឧត្ដម ព្រំ ប៊ុណ្ណយី ទីប្រឹក្សាក្រសួងអប់រំ បានឲ្យដឹងថា មន្ត្រីបច្ចេកទេសរបស់សហព័ន្ធវាយកូនឃ្លីលើតុគឺបានរៀបចំដឹកនាំការប្រកួតបានយ៉ាងល្អប្រសើរ និងមានភាពចាស់ទុំដែលទាំងនេះបង្ហាញពីការរីកចម្រើន។ ចំពោះការប្រកួតកីឡាជាតិលើកទី៣ នេះកីឡាវាយកូនឃ្លីលើតុគឺធ្វើបានល្អ និងទទួលបានជោគជ័យ។

រូបភាពផេក Cambodia 2023

តំណាងក្រសួងខាងលើបន្ថែមទៀតថា តាមភាពជាក់ស្ដែងតាំងពីឯកឧត្ដម គៀត ច័ន្ទថារិទ្ធ មកកាន់ជាប្រធានសហព័ន្ធវាយកូនឃ្លីលើតុមកគឺសហព័ន្ធមានភាពរីកចម្រើន និងខុសប្លែកពីមុនខ្លាំង។ ពោលមានការសកម្មភាពជាហូរហែ គណៈកម្មការប្រតិបត្តិមានការសាមគ្គីគ្នាល្អ ខណៈដែលប្រធានថ្មីមានការលះបង់គ្រប់បែបយ៉ាង ទាំងពេលវេលា ថវិកា និងស្មារតី នាំឲ្យសហព័ន្ធមានការរីកចម្រើនលឿន។

ឯកឧត្ដម គៀត ច័ន្ទថារិទ្ធ (រូបភាព Cambodia 2023)

រំលឹកដែរថា សហព័ន្ធកីឡាវាយកូនឃ្លីលើតុ ក៏បានចូលរួមក្នុងការប្រកួតកីឡាជាតិលើកទី៣ នេះផងដែរ។ ម្សិលមិញនេះសហព័ន្ធបានបិទបញ្ចប់ការប្រកួតរបស់ខ្លួនហើយបន្ទាប់ពីចំណាយពេល ៥ថ្ងៃកន្លងមកតាំងពីថ្ងៃទី៥ ខែវិច្ឆិកា ២០២២។ ពិធីបិទបញ្ចប់ការប្រកួតនេះធ្វើឡើងនៅទីលានប្រកួតរបស់សហព័ន្ធក្នុងពហុកីឡដ្ឋានជាតិ៕