ស្ដាយណាស់ ក្រុមគោព្រៃកណ្ដាលម៉ាប់ឆ្វេង លែងបានបង្ហាញមុខក្នុងពាន Slamball ទៀតហើយ!
- 2022-12-09 03:00:31
- ចំនួនមតិ 0 | ចំនួនចែករំលែក 0
ស្ដាយណាស់ ក្រុមគោព្រៃកណ្ដាលម៉ាប់ឆ្វេង លែងបានបង្ហាញមុខក្នុងពាន Slamball ទៀតហើយ!
ចន្លោះមិនឃើញ
ការប្រកួតដណ្ដើមពានរង្វាន់បាល់ទះ Anchor Slamball លើកដំបូងក្នុងឆ្នាំ២០២២នេះ មាន៨ក្រុមខ្លាំងៗចូលរួមដូចជាក្រុមត្រីឆ្លាំងភ្នំពេញ ក្រុមគោព្រៃកណ្ដាល ក្រុមនាគព្រៃវែង ក្រុមពង្រូលកំពង់ស្ពឺ ក្រុមខ្លាពពកបាត់ដំបង ក្រុមដំរីសៀមរាប ក្រុមមាន់ជល់កំពង់ចាម និងក្រុមត្រីឆ្លាមកំពត។ ប៉ុន្តែក្នុងចំណោម៨ក្រុមនេះ ក្រុមគោព្រៃកណ្ដាលដែលគេស្គាល់ជាក្រុមរបស់កីឡាករ គ្រឹល ម៉ាប់ ហៅសឺវីសឥតស្រមោលម៉ាប់ឆ្វេង ស្មាត់ស្ដាំ ផេន វណ្ណៈ ហៅស្មាត់ជ័យ ស្មាត់ស្ដាំ ម៉ាត់ សុខគ្រី ហៅម៉ាប់ស្ដាំ កីឡាករអាងលិក ហៅលិកម៉ាទីអូ និង នាក់ រតនៈ ហៅឌីប៉ះសេ បានធ្លាក់ចេញពីកម្មវិធីប្រកួតដណ្ដើមពានរង្វាន់នេះហើយ ក្រោយពួកគេចាញ់ពីរប្រកួតជាប់ៗគ្នា។
ការប្រកួតលើកទីមួយរបស់ក្រុមមកពីភូមិជ្រៃលាស់ ឃុំជ្រៃលាស់ ស្រុកពញាឮ ខេត្តកណ្ដាលកាលពីថ្ងៃទី២៣ ខែវិច្ឆិកា ឆ្នាំ២០២២ បានចាញ់ក្រោមថ្វីដៃរបស់ក្រុមពង្រូលកំពង់ស្ពឺដែលមានស្មាត់ល្បីៗ ទុយ កុសល ហៅយុនស្រែស្រែ ទុយ រាជ ហៅអធិរាជប្រអប់ស្មាត់រាជ ផាត សុភ័ក្រ្ត ហៅទូចអង្គរក្ស កីឡាករដេញបាល់លឿន កែវ សុធារិទ្ធ និងអ្នកប៉ះសេឆ្នើម នួន វិចិត្រ ក្នុងលទ្ធផលពីរសិតទល់នឹងមួយសិតនៅទឹកដីខ្លួនឯង។
ចាំបានថាការប្រកួតក្នុងសិតទីមួយ ក្រុមគោព្រៃកណ្ដាល ពិតជាសហការគ្នាបានយ៉ាងល្អទាំងការម៉ាត់ ការចែកបាល់ ការការពារ និងការធ្វើរនាំងជាដើម ដោយបានយកឈ្នះក្រុមភ្ញៀវនៅសិតទីមួយនេះ។ ចូលដល់សិតទីពីរ ក្រុមពង្រូលកំពង់ស្ពឺដែលដឹកនាំដោយលោកគ្រូ សៅ សាមីត ហាក់លេងសង់តង់គ្នានិងបានដាក់សម្ពោធយ៉ាងខ្លាំងទៅលើក្រុមម្ចាស់ផ្ទះវិញ រហូតទទួលបានជ័យជម្នៈពិន្ទុ២៥មុនវិញ។
ការប្រកួតសិតទីបីដែលជាសិតកាត់សេចក្ដី១៥ពិន្ទុ បានធ្វើឲ្យប្រិយមិត្តដែលស្នេហាវិស័យកីឡាបាល់ទះនៅទីលានផ្ទាល់រាប់រយនាក់ និងអនឡានប្រមាណជិត១ម៉ឺននាក់ មានអារម្មណ៍រន្ធត់តក់ស្លុតជាខ្លាំង ដ្បិតពួកគេចង់អោយក្រុមដែលខ្លួនស្រលាញ់ពេញចិត្តឡើងទៅវគ្គបន្តទៀត។ ការប្រកួតបានប្រព្រឹតទៅយ៉ាងស្វិតស្វាញ និងបញ្ចប់ដោយរលូន ហើយទីបំផុតក្រុមពង្រូលកំពង់ស្ពឺធ្វើបានល្អជាងដោយយកបានពិន្ទុ១៥មុន ឈ្នះពីរសិតទល់នឹងមួយសិតលើក្រុមដឹកនាំដោយលោកគ្រូបង្វឹក ហ៊ន កកដ្ដា។
ការប្រកួតលើកទី២កាលពីថ្ងៃទី ០៣ ខែធ្នូ ឆ្នាំ២០២២ ក្រុមគោព្រៃកណ្ដាលបានធ្វើដំណើរទៅសួរសុខទុក្ខក្រុមម្ចាស់ផ្ទះត្រីឆ្លាំងភ្នំពេញ នៅតារាងបាល់ទះ MS GYM II។ នៅសិតទីមួយ ក្រុមម្ចាស់ផ្ទះដែលមានធន់ធានកីឡាករក្មេងៗ និងមានបទពិសោធន៍ជោគជាំក្នុងការប្រកួតបាល់ទះផ្លូវការទាំង៤ស្មើនិង៦ស្មើ មកពីក្លឹបក្រសួងមហាផ្ទៃ ធីម៉េងហួង ហៅកូននាគស្លាបហង្ស លីប្រូឈួន ប្រសិទ្ធ ស្មាត់វ័យក្មេង មឿន ម៉េងឡាយ ស្មាត់ឆ្វេងកំពុងឡើង ខុម ហុងទ្រី និងអ្នកប៉ះសេចាស់វស្សា ប៊នណារិទ្ធ ធ្វើបានល្អយកឈ្នះដោយឡើងពិន្ទុ២៥មុន។ ទោះបីជាយ៉ាងណាក្នុងសិតទី២ ក្រុមម្ចាស់ផ្ទះហាក់បង្ករកំហុសច្រើនក្នុងការប្រកួតរបស់ខ្លួន (ឡាក់) ជាហេតុនាំអោយក្រុមម៉ាប់ឆ្វេង ឆ្មក់ឱកាសបាននិងដាក់សម្ពោធកាន់តែខ្លាំងរហូតយកពិន្ទុតាមស្មើ និងនាំមុខ និងទីបំផុតបានយកឈ្នះនៅសិតនេះតែម្ដង។ ឈ្នះមួយសិតម្នាក់បែបនេះបានធ្វើអោយអារម្មណ៍អ្នកទស្សនាពុះកញ្ជ្រោលចង់ដឹងលទ្ធផល ដូច្នេះក្រុមត្រីឆ្លាំងភ្នំពេញដឹកនាំដោយលោកគ្រូ អ៊ូ សុផល និងក្រុមគោព្រៃកណ្ដាលដឹកនាំដោយលោកគ្រូ ហ៊ន កក្ដដា ត្រូវប្រកួតយកចាញ់ឈ្នះនៅសិតទីបីដែលជាការប្រកួតកាត់សេចក្ដី។
នៅសិតទីមរណៈនេះ នៅដើមសិតក្រុមភ្ញៀវម៉ាប់ឆ្វេងបានបង្ហាញអនុភាពដ៏អស្ចារ្យរបស់ខ្លួនដោយមានពិន្ទុនាំមុខ ប៉ុន្តែពួកគេមិនធ្វើអ្វីម្ចាស់ផ្ទះបានឡើយ ហើយទីបំផុតបានត្រឹមហាលអាវនាំគ្នាត្រឡប់ទៅផ្ទះវិញប៉ុណ្ណោះ។ ប៉ុន្តែគួរអោយកត់សម្គាល់ឃើញថា ក្រុមពង្រូលកំពង់ស្ពឺ និងក្រុមត្រីឆ្លាំងភ្នំពេញ សុទ្ធតែជាក្រុមបិះទៅភ្នំក្រោមថ្វីដៃរបស់ក្រុមគោព្រៃកណ្ដាលទៅហើយ។
២ប្រកួតកន្លងមកនេះរបស់ក្រុមគោព្រៃកណ្ដាល បុរសសម្ដីផ្អែមម៉ាប់ឆ្វេង ត្រូវបានគេមើលឃើញថាធ្វើបានល្អ និងហត់នឿយជាងគេ។ សូម្បីអ្នកប៉ះសេឆ្នើមរបស់ក្រុមត្រីឆ្លាំងភ្នំពេញលេងតំណាងអោយក្លឹបបាល់ទះ MS GYM ll ក៏កោតសរសើរសមត្ថភាពរបស់ស្មាត់ឆ្វេងមកពីខេត្តកំពតរូបនេះដែរ។
ពាក់ព័ន្ធចំណុចនេះការខំប្រឹងប្រែង និងហត់នឿយខ្លាំងនេះដែរ ម៉ាប់ឆ្វេង ដែលលេងតំណាងអោយក្លិបបាល់ទះម្លប់ត្នោតជ្រៃលាស់ បានប្រាប់មកកាន់ Sdap Keila News ថា គឺដើម្បីជួយក្រុមនិងកេរ្តិ៍ឈ្មោះក្រុម។
ទោះបីជាធ្លាក់ចេញពីការប្រកួតក៏ដោយ ជាចុងក្រោយម៉ាប់ឆ្វេងបានអរគុណដែលក្រុមហ៊ុនស្រាបៀរ Anchor បង្កើតអោយមានការប្រកួតបាល់ះ Slamball ដ៏ធំនេះឡើង ហើយបើមានរដូវកាលបន្តបន្ទាប់ទៀត គេមិនស្ទាក់ស្ទើរក្នុងការដាក់ពាក្យចូលរួមប្រកួតប្រជែងឡើយ ព្រោះកម្មវិធីនេះបានលើកស្ទួយដល់វិស័យកីឡាបាល់ទះនៅកម្ពុជា។
គួរបញ្ជាក់ថា ការប្រកួតដណ្ដើមពានរង្វាន់បាល់ទះ Slamball ឆ្នាំ២០២២ បានចាប់ផ្ដើមការប្រកួតដំបូងរបស់ខ្លួននៅថ្ងៃទី ០៥ ខែវិច្ឆិកា ឆ្នាំ២០២២។ ការប្រកួតធ្វើឡើងតាមទម្រង់ Double Elimination មានន័យថាក្រុមឈ្នះប៉ះក្រុមឈ្នះ (ស្តិតក្នុងតារាង Upper Bracket) ឡើងទៅវគ្គបន្ទាប់រហូតដល់វគ្គផ្ដាច់ព្រ័ត្រ និងក្រុមចាញ់ប៉ះក្រុមចាញ់ (ស្ថិតក្នុងតារាង Lower Bracket) ហើយក៏មានឱកាសឡើងទៅវគ្គបន្ទាប់រហូតដល់វគ្គផ្ដាច់ព្រ័ត្រដូចគ្នាដែរ។
ការប្រកួតមានចំនួនបីសិត ក្រុមឈ្នះ២សិតចាត់ទុកថាឈ្នះ ប៉ុន្តែឡើងដល់វគ្គបួនក្រុមចុងក្រោយ ការប្រកួតមានចំនួន៥សិត ក្រុមឈ្នះបីសិតចាត់ទុកថាឈ្នះ ខណៈសិតទីបីនិងទី៥មាន១៥ពិន្ទុដូចគ្នា។
កាន់តែពិសេសក្រៅពីប្រាក់រង្វាន់លេខ១បានមេដាយមាស១ពាន១និងទឹកប្រាក់ ៥,០០០ដុល្លារ លេខ២បានទឹកប្រាក់ ៣,០០០ដុល្លារ និងលេខ៣បាន ១,៥០០ដុល្លារ។ មិនតែប៉ុណ្ណោះក្រុមនីមួយៗក៏ទទួលបានប្រាក់ថ្លៃធ្វើដំណើរ ស្នាក់នៅ ហូបចុកពីក្រុមហ៊់ុន Anchor ដែរ។ កាន់តែពិសេសមិនធ្លាប់មានក្រុមណាមួយដែលឈ្នះមួយប្រកួតនឹងទទួលបានប្រាក់ឧបត្ថម្ភលើកទឹកចិត្តបន្ថែមចំនួន ៥០០ដុល្លារពីលើទៀតផង៕