Soccer League 2023 កាន់តែប្លែក ព្រោះមានក្រុមនារីចូលរួមជាលើកដំបូង

2022-12-20 03:54:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ Soccer League 2023 នឹងមានក្រុមចូលរួមសរុបដល់ទៅ៧៤ក្រុមឯណោះ ដោយមានការកើនឡើងជាងលើកមុនទៅទៀត ហើយអ្វីដែលពិសេសគឺមានក្រុមនារីចូលរួមផងដែរ។

កាលពីថ្ងៃទី ១៨ខែធ្នូឆ្នាំ២០២២កន្លងទៅ គណៈកម្មការរៀបចំការប្រកួតពានរង្វាន់ខាងលើបានអញ្ជើញក្រុមតំណាងទាំងអស់មកចូលរួមសិក្ខាសាលាមួយស្ដីពីបទបញ្ជាការប្រកួត និងការចុះបញ្ជីចូលរួមការប្រកួតតាមរយៈ Online ផងដែរនៅមជ្ឈមណ្ឌលជាតិហ្វឹកហ្វឺនកីឡា។ ដោយក្នុងនោះក្រុមដែលនឹងមានវត្ដមានលេងក្នុងការប្រកួត Soccer League នឹងមានរហូតដល់ទៅ៧៤ក្រុមឯណោះ។

លោក ខៀវ ភារិទ្ធ ប្រធានប្រតិបត្តិរៀបចំការប្រកួតបាល់ទាត់ពានរង្វាន់ Soccer League លើកទី៦ ឆ្នាំ២០២៣ បានអះអាងថាការប្រកួតនៅឆ្នាំនេះមានក្រុមចូលរួម រហូតដល់ ៧៤ក្រុម ដែលកើនឡើង ២ក្រុម បើធៀបនឹងបេក្ខភាពក្រុមចូលរួម កាលពីឆ្នាំ២០១៩ មុនផ្អាករៀបចំ ដោយសារជំងឺរាតត្បាតជាសកលកូវីដ-១៩។ អ្វីដែលគួរឲ្យកត់សម្គាល់ គេឃើញមានក្រុមថ្មីៗប្រមាណ ៦០%ចូលរួម ហើយកាន់តែពិសេស ថ្នាក់ដឹកនាំ ស.ស.យ.ក គឺបានជំរុញឲ្យមានការប្រកួតបាល់ទាត់នារីលើកដំបូង ដើម្បីជាការរួមចំណែកអភិវឌ្ឍន៍វិស័យបាល់ទាត់នារី ជាមួយសហព័ន្ធទៀតផង ។

គណៈកម្មការរៀបចំពានរង្វាន់ ដែលផ្ដួចផ្ដើមបង្កើតឡើងដោយលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) បានបញ្ជាក់ទៀតថាពានរង្វាន់ពាក់កណ្ដាលអាជីពនេះ មិនផ្ដោតសំខាន់តែលើការប្រកួតប្រជែងយកឈ្នះចាញ់ ឬប្រាក់រង្វាន់នោះទេ អ្វីដែលជាគោលដៅសំខាន់ គឺការចូលរួមដើម្បីសុខភាព មិត្តភាព និងសាមគ្គីភាព រវាងក្រសួង-ស្ថាប័ននីមួយៗ ក៏ដូចជាការផ្ដល់ឱកាសសម្រាប់យុវជនផងដែរ ។

ពានរង្វាន់ Soccer League លើកទី៦ នឹងចាប់ផ្ដើមការប្រកួតពីថ្ងៃទី០៧ ខែមករា ដល់ថ្ងៃទី០៥ ខែកុម្ភៈ ឆ្នាំ២០២៣ ខាងមុខ ដោយគ្រោងប្រើប្រាស់ទីលានចំនួន ៨។ សម្រាប់ប្រាក់រង្វាន់ជ័យលាភី ផ្នែកបុរស លេខ១ ទទួលបានពាន អមប្រាក់រង្វាន់ ២៥លានរៀល, លេខ២ ទទួលបាន ១០លានរៀល និងលេខ៣ ទទួលបាន ៥លានរៀល ។ ឯផ្នែកនារី លេខ១ នឹងទទួបានពាន អមប្រាក់រង្វាន់ ១០លានរៀល, លេខ២ ទទួលបាន ៥លានរៀល និងលេខ៣ ទទួលបាន ៣លានរៀល ៕

អត្ថបទ៖ ប្រុស យុទ្ធ