Soccer League រដូវកាលទី៦រកឃើញជើងឯកដោយ ក្រោយ ក្រុម ស.ស.យ.ក បំបាក់គូប្រកួត ២ ទល់០

2023-02-13 03:32:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការប្រកួតដ៏តានតឹងពេញ ៩០នាទី នៅទីបំផុតក្រុមបាល់ទាត់ស.ស.យ.ក. ខេត្តកណ្ដាល បានក្លាយជាម្ចាស់ជើងឯកពានរង្វាន់ Soccer Leagueរដូវកាលទី៦ ហើយក្រោយពីបានយកឈ្នះលើក្រុមហនុមានអគ្គលេខាធិការដ្ឋានក្រសួងការពារជាតិនៅវគ្គផ្ដាច់ព្រ័ត្រក្នុងលទ្ធផល ២-០ នៅលើទីលានស្មាត RSN កាលពីថ្ងៃទី១១ កុម្ភៈ។

ជាមួយគ្នា ក្រុមសុភីណាអេហ្វស៊ី ក៏បានក្លាយជាជើងឯកនារីក្នុងពានរង្វាន់តែមួយនេះដែរ។ សម្រាប់ការប្រកួតរវាងក្រុមបាល់ទាត់ផ្នែកបុរស រវាងក្រុមបាល់ទាត់ស.ស.យ.ក. ខេត្តកណ្ដាល និងក្រុមហនុមានអគ្គលេខាធិការដ្ឋានក្រសួងការពារជាតិ នៅតង់ទី១ ក្រុមទាំងពីរ មានឱកាសទៅវិញទៅមកក្នុងការរកបាល់សម្រាប់ក្រុមរៀងខ្លួន។

យ៉ាងណាក៏ដោយ ក្រុម ស.ស.យ.ក ខេត្តកណ្ដាល ហាក់ដាក់សម្ពាធលើដៃគូ និងមានឱកាសនាំបាល់ចូលប្រអប់ទីរបស់ ហនុមាន ច្រើនជាង ប៉ុន្តែមិនអាចរកគ្រាប់បាល់បាន។ ក្រុមទាំងពីរបានបញ្ចប់វគ្គទី១ក្នុងលទ្ធផល ០ៈ០។

ចូលដល់វគ្គទី២ ក្រុម ស.ស.យ.ក នៅតែមានឱកាសច្រើននៅមុខទីរបស់ក្រុម ហនុមាន ប៉ុន្តែការវាយបកម្ដងៗរបស់ ហនុមាន ក៏បានធ្វើឲ្យក្រុម ស.ស.យ.ក ខេត្តកណ្ដាល លស់ព្រលឹង១សារៗដែរ ខណៈក្រុមអ្នកគាំទ្រទាំងសងខាងស្រែកហ៊ោយ៉ាងកងរំពង។ ការប្រកួតនៅតែស្វិតស្វាញ រហូតមកដល់ចុងម៉ោងទៅហើយ ទើបក្រុម ស.ស.យ.ក ខេត្តកណ្ដាលបំបែកពងមាន់បាន ដែលរកគ្រាប់បានដោយកីឡាករពាក់ស្លាកលេខ ៦៦ ជាប្រធានក្រុម។

ប៉ុន្មាននាទីមកទៀត ក្រុមស.ស.យ.ក ពាក់ឯកសណ្ឋានពណ៌ផ្កាឈូក បានរកបាល់ថែមបាន១គ្រាប់ទៀត នាំឲ្យបញ្ចប់ ៩០នាទី ក្រុម ស.ស.យ.ក ខេត្តកណ្ដាល បានយកឈ្នះលើ ក្រុមហនុមានអគ្គលេខាធិការដ្ឋានក្រសួងការពារជាតិនៅវគ្គផ្ដាច់ព្រ័ត្រក្នុងលទ្ធផល ២-០ ក្លាយជាជើងឯក Soccer League រដូវកាលទី៦។

ការប្រកួតបាល់ទាត់ជើងឯកពានរង្វាន់ Soceer Leagueរដូវកាលទី៦ឆ្នាំ២០២៣ មានក្រុមបាល់ទាត់សរុបចំនួន ៧៤ក្រុមបានចូលរួម ក្នុងនោះផ្នែកបុរសមាន៦៤ក្រុម និងផ្នែកនារីមាន១០ក្រុម។តាមគណៈកម្មការរៀបចំការប្រកួត ក្រុមដែលដណ្ដើមបានតំណែងជាម្ចាស់ជើងឯកទទួលបានពាន១ ប្រាក់រង្វាន់ចំនួន២៥លានរៀល ជើងឯករងទទួលបានប្រាក់រង្វាន់១០លានរៀល និងចំណាត់ថ្នាក់លេខ៣ទទួលបាន៥លានរៀល៕