AIA បានក្លាយជាដៃគូឧបត្ថម្ភដល់ការប្រកួតបាល់ទាត់ជើងឯកវិទ្យាល័យ រយៈពេល៣ឆ្នាំ

2023-02-23 08:45:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនធានារ៉ាប់រង AIA បានក្លាយជាដៃគូឧបត្ថម្ភដល់ព្រឹត្តិការណ៍ប្រកួតបាល់ទាត់ជើងឯកវិទ្យាល័យ រយៈពេល៣ឆ្នាំចាប់ពីឆ្នាំ២០២៣ដល់២០២៥។

ពិធីចុះអនុស្សរណៈនៃការយោគយល់គ្នារវាងសហភាពសហព័ន្ធយុវជនកម្ពុជា រាជធានីភ្នំពេញ ក្លឹបបាល់ទាត់បឹងកេត និងក្រុមហ៊ុន អេ អាយ អេ ខេមបូឌា នៅព្រឹកថ្ងៃព្រហស្បតិ៍ ទី២៣ ខែកុម្ភៈ ឆ្នាំ២០២៣ នាអគារខេមរានី។ ក្នុងឱកាសនោះដែរ លោកស្រី ពុធ ធីតា ប្រធានក្លឹបកីឡាបាល់ទាត់បឹងកេត បានសម្ដែងការសប្បាយចិត្តក្នុងការសហការ ជាមួយក្រុមហ៊ុនធានារ៉ាប់រង AIA ក្នុងការលើកស្ទួយវិស័យកីឡានៅកម្ពុជា ជាពិសេសការប្រកួតជើងឯកវិទ្យាល័យក្នុងរយៈពេល៣ឆ្នាំនេះ។ ព្រឹត្តិការណ៍នេះ នឹងជួយដល់ប្អូនៗវិទ្យាល័យបានបញ្ចេញនូវទេពកោសល្យ កសាងសមត្ថភាព ដើម្បីរួមចំណែកក្នុងវិស័យកីឡា ក្រោមពាក្យស្លោក ពលរដ្ឋម្នាក់លេងកីឡាមួយប្រភេទយ៉ាងតិចប្រចាំជីវិត។

ដោយឡែកឯកឧត្តម ឃុត ចាន់ដារ៉ា អនុប្រធានសហភាពសហព័ន្ធយុវជនកម្ពុជារាជធានីភ្នំពេញក៏បានអះអាងដែរថា សសយក បានសហការរៀបចំព្រឹត្តិការណ៍ ជើងឯកវិទ្យាល័យ ចំនួន២លើកមកហើយ និងទទួលបានការគាំទ្រជាច្រើនតាមបណ្ដាវិទ្យាល័យ។ ខណៈដែលវត្តមានរបស់ក្រុមហ៊ុន AIA មកចូលរួមសហការទៀត នោះនឹងធ្វើឱ្យការប្រកួតបាល់ទាត់មួយនេះកាន់តែជក់ចិត្តមិនខាន។ ឯកឧត្តម ពិតជាអរគុណយ៉ាងជ្រាលជ្រៅដល់ក្រុមហ៊ុន AIA ដែលបានជួយគាំទ្រទឹកប្រាក់១០ម៉ឺនដុល្លារដល់ការរៀបចំការប្រកួតជើងឯកវិទ្យាល័យរដូវកាលទី៣នៅឆ្នាំ២០២៣នេះ។

សម្រាប់ក្រុមហ៊ុនធានារ៉ាប់រង AIA Cambodia វិញ លោក Andrew Loh ដែលជា CEO នៅកម្ពុជា បានបង្ហាញចំណាប់អារម្មណ៍ដែរថាការសហការគ្នានេះនឹងមានកម្មវិធីរហូតដល់ទៅ៣ឯណោះ។ AIA High School League ដែលពីមុនឈ្មោះជើងឯកវិទ្យាល័យ នឹងចាប់ផ្ដើមពីខែមិថុនាដល់សីហាឆ្នាំ២០២៣ក្នុងកម្រិត U18 ។ ពានរង្វាន់ទី២គឺ AIA Children’s Day Tournament ដែលជាព្រឹត្តិការណ៍ធ្វើឡើង១ថ្ងៃប៉ុណ្ណោះក្នុងកម្រិត U15 និងពានរង្វាន់ទី៣នោះគឺ AIA Corporate Cup ដែលបើកឱ្យភាគីចូលរួម។ គោលដៅដែលក្រុមហ៊ុន AIA សហការក្នុងវិស័យបាល់ទាត់នេះ គឺចង់លើកស្ទួយទៅលើយុវជន ជាពិសេសទៅលើការធានារ៉ាប់រងសុខភាពរបស់ពួកគេផ្ទាល់តែម្ដង៕