ប្រមុខ​រាជរដ្ឋាភិបាល បានបង្ហាញ​ពីភាពរីករាយ​ និង​ក្តីសង្ឃឹម​ជា​មុនរួច​ស្រេចហើយថា ព្រឹត្តិការណ៍អង្គរសង្ក្រាន្ត​​ឆ្នាំ២០២៣នេះ នឹងបង្កើត​ការសប្បាយរីករាយយ៉ាងខ្លាំង​សម្រាប់​ប្រជាពលរដ្ឋខ្មែរ បន្ទាប់ពីខកខាន​រយៈពេល៣ឆ្នាំមក។

​ក្នុង​ពិធី​ប្រគល់សញ្ញាបត្រ​ជូននិស្សិត​សាកលវិទ្យាល័យ​ភូមិន្ទភ្នំពេញ​នាព្រឹក​ថ្ងៃទី២៤ ខែកុម្ភៈ ឆ្នាំ២០២៣ សម្តេចតេជោ បាន​មានប្រសាសន៍ថា «ជិតដល់ចូលឆ្នាំហើយ អង្គរសង្ក្រាន្ត​សប្បាយណាស់​ឆ្នាំនេះ កុំសូវពេក ចាំមើលៗ»។

សម្តេចបន្តថា ក្រោយធ្វើពិធីបើកព្រឹត្តិការណ៍​នេះរួចរាល់ហើយ សម្តេច​នឹង​​អញ្ជើញទៅលេងអង្គរវត្ត។ «ឆ្នាំនេះ ខ្ញុំគិតថា ដើរលេងអង្គរវត្តឱ្យណាណីម្តង ព្រោះអត់សូវបានដើរ» ។

សូមជម្រាប​ថា ព្រឹត្តិការណ៍​អង្គរសង្ក្រាន្ត​ដែលធ្វើឡើង​នៅថ្ងៃចូលឆ្នាំខ្មែរ​ខាងមុខនេះ ធ្វើឡើងក្រោម​ប្រធានបទ «ក្ដីស្រមៃ និងក្ដីសង្ឃឹម» ដេីម្បីជាការលើកយកនូវកេរ្តិ៍តំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមកធ្វើការរំលេចឡើងជាផ្ទាំង នៃទស្សនីយភាពវប្បធម៌ជាច្រើនដូចជា ល្បែងប្រជាប្រិយ របាំបុរាណ របាំប្រពៃណី និងរបាំប្រជាប្រិយ ការបង្ហាញពីជីវភាពរស់នៅរបស់ប្រជាជនកម្ពុជានៅតាមតំបន់ និង សិល្បៈទស្សនីយភាពជាច្រើនទៀត។

អង្គរសង្ក្រាន្តនៅក្នុងឆ្នាំនេះនឹងមានលក្ខណៈកាន់តែលេចធ្លោ​ធំជាងបណ្ដា​ឆ្នាំមុនៗ ដោយមានការប្រមូលផ្ដុំនូវកម្មវិធី ព្រឹត្តិការណ៍ និងតួអង្គនិមិត្តរូបសំខាន់ៗ (តាមឆ្នាំនីមួយៗនៃអង្គរសង្រ្កាន្ត) ក៏ដូចជាវត្ថុពិសេសៗ (វត្ថុយក្ស) មកជួបជុំគ្នា ដែលឆ្លុះបញ្ចាំងតាមរយៈកម្មវិធីចំនួន៤៤កម្មវិធី (កើនចំនួន៣៣ កម្មវិធីប្រៀបធៀបក្នុងឆ្នាំ២០១៣) នៅតាមទីតាំង ឬតំបន់ចំនួន ៦ ផ្សេងគ្នា (កើនចំនួន៤ទីតាំង ប្រៀបធៀបក្នុងឆ្នាំ២០១៣) និងមានកំណើនយុវជនស្ម័គ្រចិត្តជាច្រើនចូលរួម (២៣២៤នាក់ នៅឆ្នាំ២០១៣ និង៤២៤៩នាក់ នៅឆ្នាំ២០១៨។ នេះបើតាម​ការបង្ហោះ​របស់​ផេកហ្វេសប៊ុក «ព្រឹត្តិការណ៍​អង្គរសង្ក្រាន្ត»៕

អត្ថបទ៖ សំភី