ដឹងទេថាមកដល់ពេលនេះ មានប៉ុន្មានប្រទេសហើយ សម្រេចចូលរួមវិញ្ញាសារ គុនខ្មែរ នៅស៊ីហ្គេម

2023-02-27 03:55:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះជាមានការព្រមាន ពីភាគីថៃ ទៅប្រទេសដទៃដែលជាសមាជិក IFMA មិនឲ្យចូលរួម វិញ្ញាសារ "គុនខ្មែរ" ចូលទៅក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាម្ចាស់ផ្ទះ ប៉ុន្តែយ៉ាងនេះក្ដី មកដល់ពេលនេះ មាន ៥ប្រទេសហើយបានសម្រេចចូលរួមវិញ្ញាសារ "គុនខ្មែរ"។ នេះបើតាមឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអគ្នេយ៍ លើកទី៣២។

ឯកឧត្តមអគ្គលេខាធិការ បញ្ជាក់ថា មកពេលនេះ មានប្រទេសចំនួន ៥ ហើយដែលបានបញ្ជាក់ពីការចូលរួមវិញ្ញាសារ "គុនខ្មែរ" របស់យើង។ តាមឯកឧត្តម ប្រទេសដែលចូលរួមនោះមាន វៀតណាម ឡាវ ភូមា ហ្វីលីពីន និងឥណ្ឌូណេស៊ី។ ដោយឡែកប្រទេសដែលមិនបានចូលរួម មាន ប្រ៊ុយណេ ទីម័រ និងសិង្ហបុរី។ ការដែលប្រទេសទាំងនេះ មិនបានចូលរួម គឺដោយសារតែពួកគេ មិនមានប្រភេទកីឡានេះនោះទេ។

នៅមុននេះបន្តិច សហព័ន្ធអន្តរជាតិនៃសមាគម«Muay Thai»(IFMA) បានប្រតិកម្ម ជុំវិញកម្ពុជាបានសម្រេចដាក់បញ្ចូលវិញ្ញាសារ "គុនខ្មែរ" ទៅក្នុងព្រឹត្តិការណ៍កីឡាស៊ីហ្គេម ហើយថា ថៃនឹងមិនបញ្ជូនកីឡារបស់ខ្លួនប្រភេទនេះមកចូលរួមនោះទេ។ មិនត្រឹមប៉ុណ្ណឹង ពួកគេនៅបានព្រមាន សមាជិកដទៃទៀតមិនឲ្យចូលរួមដែរ បើពុំនោះទេ ពួកគេនឹងមិនត្រូវបានអនុញ្ញាតិឲ្យចូលរួមក្នុងព្រឹត្តិការណ៍ «Asian Indoor and Martial Arts Games» នៅប្រទេសថៃនាចុងឆ្នាំនេះទេ។

ប៉ុន្តែយ៉ាងនេះក្ដី បញ្ហាដែលកើតឡើង គឺមិនមានប៉ះពាល់ដល់ការរៀបចំរបស់កម្ពុជាលើវិញ្ញាសារ "គុនខ្មែរ"។ តាមឯកឧត្តម វ៉ាត់ ចំរើន វិញ្ញសារ ថ្លែងនៅក្នុងកម្មវិធី សន្និសីទសារព័ត៌មានស្ដីពីវឌ្ឍនភាពនៃការត្រៀម SEA GAMES-ASEAN Para Games 2023នៅ NOCCរៀបចំដោយក្លឹបអ្នកកាសែតកម្ពុជា កាលពីសប្ដាហ៍មុន បានឲ្យដឹងថា វិញ្ញាសារ "គុនខ្មែរ" នឹងអាចដំណើរការទៅបានតាមការគ្រោងទុក ដោយសារគ្រប់លក្ខខណ្ឌហើយ។

ឯកឧត្តម វ៉ាត់ ចំរើន ថ្លែងថា "តាមលក្ខខណ្ឌ ប្រសិនបើមានអ្នកចូលរួមចាប់ពី ៤ឡើងទៅ គឺយើងអាចធ្វើទៅបានហើយ តែនេះយើងបាន ៥ ប្រទេស បូកយើងកម្ពុជាយើងទៀត គឺ ៦ហើយ"៕

អត្ថបទ៖ ទារិកា