បុណ្យទន្លេ លើកទី៧ យប់ទី១ មានអ្នកចូលរួមខ្ទង់ ២ម៉ឺននាក់ស្របពេលផ្នែកកីឡាក៏ផុលផុស

2023-03-09 08:42:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីបុណ្យទន្លេ លើកទី៧ ក្នុងខេត្តកំពង់ធំ នៅយប់ថ្ងៃទី១ នេះមានប្រជាពលរដ្ឋមកចូលរួមទស្សនា ដើរកម្សាន្តខ្ទង់ ២ម៉ឺននាក់ ខណៈខាងផ្នែកកីឡាចាប់ផ្ដើមព្រឹកមិញលើការរត់ចម្ងាយ ៣-៤ Km។

ឯកឧត្ដម វ៉ាត់ ចំរើន

ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា នៅយប់ថ្ងៃទី៨ ម្សិលមិញនេះគឺមានប្រជាពលរដ្ឋច្រើនបានសម្រុកមកកម្សាន្តខ្ទង់ ២ម៉ឺននាក់នៃពិធីបុណ្យទន្លេ លើកទី៧ ក្នុងខេត្តកំពង់ធំនេះ។ នៅតាមដងផ្លូវមានមនុស្សម្នាច្រើនកុះករដើរតាមស្តង់លក់ឥវ៉ាន់ និងទស្សនាការសម្ដែងផ្សេងៗ។

ទិដ្ឋភាពព្រឹកមិញ

ចំណែកផ្នែកកីឡាដែលចូលរួមអបអរគឺព្រឹកមិញចាប់ផ្ដើមរត់ចម្ងាយរួចហើយ ដែលមានសិស្សៗចូលរួមជាច្រើនលើកម្មវិធីមួយនេះ។ ដោយឡែកនៅថ្ងៃនេះ និងថ្ងៃស្អែកគឺមានកីឡាបាល់ទះឆ្នេរខ្សាច់ បាល់ទាត់ឆ្នេរខ្សាច់ បាល់ទាត់លើតុ ប្រដាល់ និងប៉េតង់ ប្រកួតបន្តបន្ទាប់គ្នាដើម្បីផ្ដល់ភាពកម្សាន្តបង្កើតទស្សនីយភាពជូនពលរដ្ឋផងដែរ។

ទិដ្ឋភាពព្រឹកមិញ

រំលឹកដែរថា ពិធីបុណ្យទន្លេ លើកទី៧ ក្រោមប្រធាន «ទន្លេរបស់យើង ដើម្បីបច្ចុប្បន្ន និងអនាគត» នេះធ្វើឡើងនៅខេត្តកំពង់ធំ។ ពិធីនេះមានរយៈពេល ៣ថ្ងៃគឺចាប់ពីថ្ងៃទី៨ ដល់ ១០ ខែមីនា ឆ្នាំ២០២៣។ ដើម្បីជាការអបអរសាទរពិធីបុណ្យនេះមានជាចលនាកីឡា មានស្តង់លក់ឥវ៉ាន់ចម្រុះ ៣០០ និងមានការសម្ដែងសិល្បៈតន្រ្តីផងដែរ៕