ថ្ងៃនេះដំណឹង​ដ៏គួរ​ឲ្យតក់ស្លុតមួយ​បាន​ចេញ​ផ្សាយជា​ច្រើន ទាក់ទងនឹង​មរណភាពរបស់ Moonbin សមាជិកក្រុម ASTRO ដែលជាព័ត៌មានគ្រប់គ្នាទទួលយកមិនចង់បានឡើយ។

ផលិតកម្ម Fantagio ដែលជាអ្នកគ្រប់គ្រងរបស់ Moonbin ក៏ដូចជា ASTRO បានចេញសេចក្ដីរាយការណ៍ថា៖ «នៅថ្ងៃទី១៩ ខែមេសា សមាជិក ASTRO គឺ Moonbin បាន​ចាកចេញពីពួកយើងភ្លាមៗ ក្លាយជាផ្កាយលើមេឃហើយ។ ទោះយើងមិនអាចធៀបទុក្ខសោករបស់យើងទៅនឹងទុក្ខសោកដែលគ្រួសាររបស់លោកដែលកំពុងមានក៏ដោយ ការដែលបាត់បង់កូនប្រុស និងបងប្អូនជាទីស្រឡាញ់, សមាជិក ASTRO, មិត្តរួមផលិតកម្ម Fantagio, នាយកប្រតិបត្តិក្រុមហ៊ុន និងបុគ្គលិកទាំងអស់កំពុងកាន់ទុក្ខលោកដោយទុក្ខសោក និងតក់ស្លុតយ៉ាងខ្លាំង»។

ជាមួយគ្នានោះ ទោះបីជាពុំមែនជា Idol របស់ខ្លួន ប៉ុន្តែក្រោយព័ត៌មាន​នៃមរណភាពរបស់តារាប្រុសរូបនេះផ្សព្វផ្សាយពាសពេញអ៊ីនធើណិត ក៏ឃើញ​មានអ្នកគាំទ្រជាច្រើនក្នុងពិភព K-Pop សម្ដែង​ការកាន់ទុក្ខ និងសោកស្ដាយជា​ខ្លាំង​ចំពោះការបាត់បង់នេះ។

ជាមួយគ្នានោះ​ការចាកចេញរបស់ Moonbin ក៏បាននាំអ្នកគាំទ្រជា​ច្រើននាក់ ប្រមូលពាក្យសម្ដីមាន​ន័យរបស់លោក ដែលធ្លាប់លួងលោមគ្រប់គ្នាកន្លងមក ទាំងដែលខ្លួនកំពុងមាន​វិបត្តិផ្លូវចិត្ត ពិសេសពេលលោកនិយាយថា ៖ «អ្នកស្រក់ទឹកភ្នែកដោយគ្មានមូលហេតុ! តើខ្ញុំលួងលោមអ្នកបាន​ទេ?»

បន្ថែមពីលើពាក្យនេះ ក៏នៅមាន Post មួយដែលត្រូវ​បាន​បង្ហោះ​កាលពីពេល​ថ្មីៗ ដែលជារូបផ្កា​និងភ្ជាប់ជាមួយនឹង Caption «Roha, ពួកវាជាគ្រាប់ពូជ dandelion!!! វាជាគ្រាប់ពូជ dandelion ~ វាផាត់តាមខ្យល់ហើយហើរទៅឆ្ងាយ!»។

តាមភាសានៃផ្កា Dandelion គឺតំណាងឲ្យក្តីសង្ឃឹម ការលូតលាស់ និងការព្យាបាល ដែលជាសញ្ញានៃការបន្តដើរទៅមុខ ទោះបីកំពុងស្ថិតក្នុងស្ថានភាពដែលពិបាក។ ផ្កានេះក៏តំណាងឲ្យព្រះអាទិត្យ ព្រះច័ន្ទ និងផ្កាយ ដែលជានិមត្តិសញ្ញា ៣ យ៉ាង របស់ ASTRO និង AROHA (អ្នកគាំទ្ររបស់ ASTRO)។

សូមវិញ្ញាណក្ខន្ធរបស់ Moonbin អ្នកដែលអ្នកគាំទ្រឲ្យឈ្មោះថាជា Angel ទៅកាន់ទីដែលស្ងប់សុខ៕