ត្រៀមខ្លួនថ្ងៃសុក្រនេះ #BeyondTheGames' Day នាំយកបេះដូងឯតទគ្គកម្ម សិល្បករអាស៊ាន និងការប្រគំតន្ត្រី មកកាន់វិមានឈ្នះឈ្នះ

2023-04-26 09:09:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងបំណងបង្កើតជាការជួបជុំរវាងមហាជន ជាមួយដៃគូសហការ និងដៃគូគាំទ្រនានា យុទ្ធនាការ #BeyondTheGames នៃសហភាពសហព័ន្ធយុវជនកម្ពុជា (ស.ស.យ.ក) នឹងរៀបចំកម្មវិធី #BeyondTheGames’ Day នៅវិមានឈ្នះឈ្នះ នៅថ្ងៃទី ២៨ ខែមេសា ឆ្នាំ២០២៣ ដោយស្វាគមន៍សាធារណជនចូលរួមជាមួយយុទ្ធនាការនេះដើម្បីសាទរភាពជាម្ចាស់ផ្ទះរបស់កម្ពុជា ក្នុងព្រឹត្តិការណ៍កីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២។

លោក សុខ សប្បាយណា ប្រធានប្រតិបត្តិនៃយុទ្ធនាការ #BeyondTheGames បានមានប្រសាសន៍ថា៖ «នៅថ្ងៃទី ២៨ ខាងមុខនេះ នៅវិមានឈ្នះៗ យើងនឹងមានកម្មវិធី BeyondTheGames’ Day។ ក្នុងនោះច្បាស់ណាស់យើងមានកម្មវិធីខនសឺតដ៏ធំមួយ និងតារាល្បីៗជាច្រើនរូបមែនទែនចូលរួម»។

លោកបានបញ្ជាក់ថា៖ «កម្មវិធីនេះលើសពីខនសឺត គឺយើងមានអ្វីប្លែកៗជាច្រើនទៀត។ យើងបានអញ្ជើញសិល្បករអ្នកគំនូរមកពីអាស៊ាន មកកាន់ស្រុកខ្មែរ។ អ៊ីចឹងគាត់នឹងមានគំនូរគូរជុំគ្នាប្រវែង ២១ ម៉ែត្រ ដើម្បីបង្ហាញសាមគ្គីភាព បេះដូងលោតក្នុងចង្វាក់តែមួយរបស់អាស៊ានទាំងមូល នៅទីតាំងតែម្ដង»។

វត្តមានពីសាធារណជនគឺជាការចូលរួមបង្ហាញភាសាបេះដូងរបស់យើងសម្រាប់កម្ពុជា តាមរយៈការស្រឡាញ់ ការគាំទ្រអត្តពលិកខ្មែរគ្រប់ៗរូប ប្រកបដោយមោទកភាពលើសពីការប្រកួត។

ជាងនេះទៅទៀត កម្មវិធីនេះជាឱកាសមួយសម្រាប់បង្ហាញភាពជាខ្មែរ ជាព្រះរាជាណាចក្រនៃវប្បធម៌ អរិយធម៌ ប្រពៃណីរុងរឿង សន្តិភាព ភាពរីកចម្រើន និងភាពចម្រុះនៃសក្ដានុពលផ្សេងៗរបស់កម្ពុជា ក៏ដូចជាបង្កើនស្មារតីលើសពីការប្រកួតតាមរយៈការបង្ហាញថាមពល និងវិបុលភាពរបស់ប្រជាជាកម្ពុជា ភាពសម្បូរបែប ភាពសុខដុមនៃសង្គមកម្ពុជាក្នុងពេលបច្ចុប្បន្នឆ្ពោះទៅអនាគតដ៏កាន់តែរឹងមាំជាមួយគ្នា លើសពីការប្រគំតន្ត្រី។

សកម្មភាពកម្សាន្តរួមមាន ការប្រគំតន្រ្តីពីសំណាក់តារាចម្រៀងជាតិ និងអន្តរជាតិល្បីៗជាច្រើនរូប ស្ដង់ពិព័រណ៍ផលិតផលជាច្រើនប្រភេទ សួនបេះដូង ការតាំងបង្ហាញគំនូរអាស៊ាន និងការតាំងបង្ហាញស្នាដៃគំនូរកុមារ។

លោក សុខ សប្បាយណា បានរៀបរាប់ថា៖ «យើងក៏យកបេះដូង អ្វីដែលបានដាក់តាំងបង្ហាញនៅសៀមរាប ក្នុងបរិវេណប្រាសាទអង្គរវត្ត យកមកតុបតែងបង្ហាញនៅវិមានឈ្នះឈ្នះ។ យើងក៏អ្វីដែលជាការប្រកួតប្រជែងគំនូរកុមារទូទាំងប្រទេសថ្នាក់បឋមសិក្សាហ្នឹង យកមកតាំងបង្ហាញស្នាដៃឆ្នើមចំនួន១២០ក្នុងហ្នឹងដែរ។ យើងក៏បានអញ្ជើញសិល្បករ ១១ សាសន៍ ប្រទេសមានអ្នកចម្រៀងមួយ អ៊ីចឹង ១១ បូកនឹងទីម័រ មកច្រៀងជុំគ្នាក្នុងបទដែលយើងតែងថ្មី ដើម្បីបង្ហាញពីស្មារតីគាំទ្រដល់ស៊ីហ្គេម និងបេះដូងលោតក្នុងចង្វាក់តែមួយ ក្នុងភាពមោទកៈ ក្នុងនាមកម្ពុជាជាម្ចាស់ផ្ទះ ដោយមានអ្នកចម្រៀង ១១ ជាតិសាសន៍មកច្រៀងបទហ្នឹង »។

#BeyondTheGames’ Day ក៏មានការពិព័រណ៍របស់ដៃគូ និងពីអាជីវករមូលដ្ឋានជាមួយការផ្ដល់ទីតាំងដោយឥតគិតថ្លៃ ដើម្បីឱ្យពួកគាត់មកលក់ជូនអ្នកចូលរួមកម្មវិធីកម្សាន្ត និងសកម្មភាពលេងល្បែង BeyondTheGames ផងដែរ។

រឹតតែពិសេសទៅទៀតនោះ លោក សុខ សប្បាយណា បានមានប្រសាសន៍ទៀតថា៖ «ក្នុងនោះតាមផែនការគឺភ្លើងគប់នឹងមកដល់ភ្នំពេញ។ ភ្លើងគប់ហ្នឹងបានទៅជុំវិញម៉ាអាស៊ានហើយ ហើយថ្ងៃទី ២៨ ល្ងាចហ្នឹងគាត់នឹងមកដល់ភ្នំពេញតែម្ដង។ យើងមានការមកដល់នៃភ្លើងគប់ មកដល់ទីតាំងរបស់យើងផងដែរ។ យើងមានការដង្ហែរភ្លើងគប់»។

អ៊ីចឹងថ្ងៃ២៨ នេះកម្មវិធីយើងនៅវិមានឈ្នះឈ្នះ ពីម៉ោង៤រសៀលទៅ ប៉ុន្តែការតាំងបង្ហាញគំនូរ ឬអ្វីហ្នឹង យើងនឹងតាំងពីព្រឹកទៅ។ អ៊ីចឹងសូមអញ្ជើញទាំងអស់គ្នាចូលរួមដោយសេរី ដើម្បីបង្ហាញភាសាបេះដូងកម្ពុជាយើងតាមរយៈព្រឹត្តិការណ៍ស៊ីហ្គេមនៅពេលនេះផងដែរ។ សូមអរគុណ!។