អស្ចារ្យមែន ផលិតផលខ្មែរមួយនេះ ទទួលបានការពេញនិយមកើនឡើងនៅប្រទេសជប៉ុន និងទីផ្សារអន្តរជាតិ

2023-06-08 02:12:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈដែលកម្ពុជា នៅមានរបាយនាំចូលទំនិញជាច្រើននៅឡើយពីបរទេស ស្រាប់តែគ្រួសារខ្មែរមួយ មានគំនិតច្នៃផលិតផលក្នុងស្រុក ក្លាយជាទំនិញមានទីផ្សារនៅក្នុងស្រុក ថែមទាំងអាចនាំចេញទៅទីផ្សារអន្តរជាតិថែមទៀត។

ក្រុមហ៊ុន មិសុតា គឺជាក្រុមហ៊ុនខ្មែរសុទ្ធសាធ ដែលត្រូវបានបង្កើតឡើងតាំងពីឆ្នាំ ២០១៧ ដោយស្ថាបនិកជាគ្រួសារខ្មែរមួយគឺ លោក និងលោកស្រី តាន់ មីសស្សែល នៅឆ្នាំ ២០១៧។ មិសុតា មានរោងចក្រនៅក្នុងខេត្តបាត់ដំបងនាតំបន់ពាយព្យ នៃប្រទេសកម្ពុជា ដែលមានផ្គត់ផ្គង់ផលិតផលប្រភេទផ្លែឈើសម្ងួតជាច្រើនប្រភេទ ដែលប្រិយមិត្តអាចរកបានតាមម៉ាត ផ្សារទំនើបដូចជា Bayon, Amazing Cambodia, Phnom Penh Superstore, Khmer Organic Shop, Macro, KC Mart, Laykong supermarket នៅព្រលានយន្តហោះអន្តរជាតិភ្នំពេញនិងសៀមរាប និងត្រៀមបង្ហាញមុខនៅផ្សារទំនើប Aeon, 7-Eleven និង Lucky នាពេលឆាប់ៗនេះផងដែរ។

លោក តាន់ មីសស្សែល ជា CEO របស់ មិសុតា

តាមលោក តាន់ មីសស្សែល ជា CEO របស់ មិសុតា បានឲ្យដឹងថា សហគ្រាសរបស់លោកចាប់កំណើតឡើង ក្នុងបេសកកម្មដើម្បីជួយកសិករខ្មែរចេញ ឬកាត់បន្ថយពីវិបត្តិផលិតគ្មានទីផ្សារ ពោលគឺ កែច្នៃកសិផលខ្មែរដែលជួបបញ្ហាសល់ច្រើននៅពេលប្រមូលផល ឲ្យទៅជាផលិតផលអាហារមានគុណភាពល្អតាមស្តង់ដារអន្តរជាតិ ដើម្បីបង្កើតការងារជូនប្រជារាស្រ្ត និងចូលរួមចំណែកកសាងសេដ្ឋកិច្ចសង្គមកម្ពុជា។

ចក្ខុវិស័យរបស់ មិសុតា គឺចង់ក្លាយជាក្រុមហ៊ុនកែច្នៃអាហារលេចធ្លោមួយទាំងនៅទីផ្សារក្នុងស្រុកនិងនៅបរទេស។ ដោយសារត្រូវការរៀបចំប្រព័ន្ធផលិតឲ្យត្រូវតាមស្តង់ដារនិងដោយសារផលប៉ះពាល់នៃបញ្ហាកូវីដ មិសុតា ទើបបានអភិវឌ្ឍន៍ទីផ្សារនៅឆ្នាំ ២០២១ ។

មកទល់បច្ចុប្បន្ន មិសុតា មានផលិតផលច្រើនប្រភេទដូចជា ១.ផ្លែឈើសម្ងួតធម្មជាតិ Oja (ស្វាយ ចេក ម្នាស់ ស្រកានាគ) ជាផលិតផលមិនមានបន្ថែមស្ករ គ្មានលាយពណ៌ឬក្លិន គ្មានលាយសារធាតុរក្សា ផលិតពីផ្លែឈើខ្មែរស្រស់ ១០០%។ ២.តំណាប់ផ្លែឈើ Misota (ស្វាយ ម្នាស់ ក្រូចពោធិ៍សាត់) មានសភាពទន់ រសជាតិឆ្ងាញ់ ផលិតពីផ្លែឈើខ្មែរស្រស់ មានច្រើនរសជាតិដូចជា រសជាតិផ្លែឈើដើម រសជាតិហិរ និងរសជាតិសូកូឡាដែលបានពីការស្រោបសូកូឡាមានគុណភាពខ្ពស់លើចំណិតផ្លែឈើ។

៣.ម្ជូរល្មមសម្ងួតធម្មជាតិ Oja ដែលអាចឆុងជាតែមានរសជាតិឆ្ងាញ់និងល្អសម្រាប់សុខភាព ៤.ទឹកឃ្មុំធម្មជាតិ Oja ៥.អាហារសម្រន់ល្អដល់សុខភាព Green Charm ៦.សុរាជាតិផ្លែឈើ Jatoro ដែលផលិតពីអង្ករខ្មែរនិងជាតិផ្លែឈើ។

តាមលោក អុល តុលា COO របស់ មិសុតា ប្រាប់ថា ផលិតផលដែលពេញនិយមខ្លាំងលើទីផ្សារ គឺផ្លែឈើសម្ងួតធម្មជាតិ Oja, តំណាប់ស្វាយ Misota, ម្ជូរល្មមធម្មជាតិ Oja, និងទឹកឃ្មុំធម្មជាតិ Oja ដោយសារគុណភាពបែបធម្មជាតិ ផលិតដោយស្របតាមស្តង់ដារសុវត្ថិភាពអាហារនិងគុណភាពលំដាប់អន្តរជាតិ HACCP, Halal, ISO 9001: 2015 & ISO 22000: 2018។

ដោយឡែកផលិតផលអាហារសម្រន់ Green Charm ក៏លក់ដាច់ផងដែរដោយសារវាមានជីវជាតិល្អជួយទ្រទ្រង់ថាមពលរាងកាយ ងាយទុកដាក់ឬយកតាមខ្លួន និងមានតំលៃសមរម្យជាងគេ។ ក្រៅពីពេញនិយមនៅក្នុងស្រុក ប៉ុន្តែផលិតផល មិសុតា ទាំងនេះ ក៏កំពុងពេញនិយមនៅទីផ្សារបរទេសផងដែរ មានដូចជា ជប៉ុន បារាំង និងថៃ។ "ក្រៅពីនេះ យើងក៏កំពុងលក់សាកល្បងនៅអាមេរិក និងអូស្រ្តាលីថែមទៀតដែរ។

ក្រៅពីពង្រឹងនៅទីផ្សារក្នុងស្រុក លោក អុល តុលា ប្រាប់ទៀតថា កំពុងមានគម្រោងពង្រីកទីផ្សារបន្ថែមនៅប្រទេសខាងលើតាមរយៈផលិតផលកំពុងដាក់លក់ផង និងផលិតផលថ្មីៗ មានដូចជាផ្លែឈើស្រោបដោយសូកូឡា តែសុខភាព ក៏ដូចជាស្វែងរកអ្នកចែកចាយនៅប្រទេសផ្សេងទៀតដូចជាកូរ៉េ ចិន និងប្រទេសអារ៉ាប់ផងដែរ៕

អត្ថបទ៖ ទារិកា