៥ខែនៃឆ្នាំ២០២៣នេះ រដ្ឋប្រមូលពន្ធដារបានជាង ១,៨ពាន់លានដុល្លារ ហើយនឹងអាចសម្រេចតាមផែនការសម្រាប់ឆ្នាំនេះ

2023-06-16 09:19:51
ចំនួនមតិ 0 | ចំនួនចែករំលែក 0

ចន្លោះមិនឃើញ

សរុបរយៈពេល ៥ខែ ឆ្នាំ២០២៣ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួន ៧៣៨៩,០៨ប៊ីលានរៀល (ជាង ១,៨ពាន់លានដុល្លារ) ស្មើនឹង ៥១,១៤% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី១៥ ខែមិថុនា ឆ្នាំ២០២៣។

តាមរយៈស្ថានភាពនេះ អគ្គនាយកដ្ឋានពន្ធដាររំពឹងថា ការអនុវត្តការងារគ្រប់គ្រងប្រមូលពន្ធសម្រាប់ឆ្នាំ២០២៣ អាចនឹងសម្រេចបានគ្រប់តាមផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ចំនួន ១៤ ៦៤៥,៣៨ប៊ីលានរៀល (ប្រមាណ ៣៥៧១,៦៩លានដុល្លារ)។

បើគិតតែក្នុងខែឧសភា ឆ្នាំ២០២៣ ចំណូលពន្ធ-អាករគ្រប់ប្រភេទដែលប្រមូលបាន គឺមានចំនួន ៩៥៥,៣៧ប៊ីលានរៀល (ប្រមាណ ២៣៥,៨៩លានដុល្លារ) ស្មើនឹង ៦,៦០% នៃផែនការ។ ជាមួយគ្នានេះ ចំណូលពន្ធពីប្រតិបត្តិការពាណិជ្ជកម្មនតាមប្រព័ន្ធអេឡិចត្រូនិក (E-commerce) ក្នុងខែឧសភា ឆ្នាំ២០២៣ ទទួលបាន ២៣,០៩ប៊ីលានរៀល (ប្រមាណជា ៥,៧លានដុល្លារ) និងសម្រាប់រយៈពេល ៥ខែ ឆ្នាំ២០២៣ ទទួលបាន ១៣១,៦៦ប៊ីលានរៀល (ប្រមាណជា ៣២,៥១លានដុល្លារ)។

គួរដឹងថា ក្នុងចំណោម ៥ខែនេះ ខែដែលប្រមូលចំណូលពន្ធបានហក់ខ្ពស់ គឺខែមីនា សម្រេចបាន ៣២៥៨,០១ប៊ីលានរៀល (ប្រមាណ ៨០៤,៤៥លានដុល្លារ)៕

អត្ថបទ៖ សំភី