ដំណឹងល្អ! កំណាត់ផ្លូវជាតិលេខ១០ ពីទីរួមស្រុកវាលវែង ទៅអូរសោម សង់ជិតរួចរាល់ហើយ

2023-06-28 07:27:11
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋបាលខេត្តពោធិ៍សាត់ បានបញ្ជាក់ឱ្យដឹងថា គិតត្រឹមថ្ងៃទី២៨ ខែមិថុនា ឆ្នាំ២០២៣នេះ ការដ្ឋានសាងសង់ផ្លូវជាតិលេខ១០ គិតចាប់ពីកំណាត់ផ្លូវទីរួមស្រុកវាលវែង ឃុំប្រម៉ោយ ទៅកាន់ឃុំអូរសោម ត្រូវបានស្ថាបនាជិតរួចរាល់ជាស្ថាពរហើយ ដែលបង្កលក្ខណៈងាយស្រួលក្នុងការធ្វើដំណើរ។

តែយ៉ាងណាមិញ ចំពោះការសាងសង់ផ្លូវជាតិលេខ១០ ទាំងមូល គឺទើបតែសម្រេចបាន ៦០% ប៉ុណ្ណោះ ពោលគឺហាក់មានភាពយឺតយ៉ាវបន្តិច ដោយសារការសាងសង់មានការពិបាក ព្រោះត្រូវឆ្លងកាត់ជ្រោះភ្នំ។ នេះបើតាមការឱ្យដឹងពីឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ថ្លែងក្នុងពិធីមួយ កាលពីសប្តាហ៍មុន។

គម្រោងសាងសង់ផ្លូវជាតិលេខ១០ តភ្ជាប់ពីសំឡូត- វាលវែង-អូរសោម ដល់កោះកុង សាងសង់ស្របតាមបទដ្ឋានបច្ចេកទេសកម្រិត៣ របស់សាធារណរដ្ឋប្រជាមានិតចិន មានទទឹងតួផ្លូវសរុបចំនួន៩ម៉ែត្រ ជាប្រភេទផ្លូវកៅស៊ូពីរស្រទាប់ (DBST) សាងសង់ស្ពានចំនួន២៨កន្លែងប្រវែង ១.៧២១,៤៦ម៉ែត្រ ដែលក្នុងនោះមានស្ពានខ្ពស់ជាងគេមួយដែលមានកម្ពស់៧៥ម៉ែត្រ បណ្តោយ៥៣០ម៉ែត្រ និងទទឹង១០ម៉ែត្រ ព្រមទាំងមានបំពាក់ ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាព។ ផ្លូវនេះគ្រោងចំណាយប្រមាណជាង ១៨៨លានដុល្លារ ជាហិរញ្ញប្បទានរបស់ប្រទេសចិន និងថវិកាបដិភាគរបស់រាជរដ្ឋាភិបាលកម្ពុជា។

ក្នុងពេលចុះត្រួតពិនិត្យការសាងសង់ផ្លូវនេះ នាពេលកន្លងមក ឯកឧត្តម ស៊ុន ចាន់ថុល បានលើកឡើថា កាលដើមឡើយគម្រោងសាងសង់ផ្លូវជាតិលេខ១០នេះ មានប្រវែងតែ ១៨៨គីឡូម៉ែត្រប៉ុណ្ណោះ។ ប៉ុន្តែដោយសារតែទិសផ្លូវត្រូវប៉ះចំជម្រកសត្វព្រៃរស់នៅ ទើបក្រសួងបរិស្ថានស្នើសុំឱ្យបង្វែរទិសផ្លូវចេញឱ្យផុតពីតំបន់សត្វព្រៃ ហេតុនេះរាជរដ្ឋាភិបាលក៏បានសម្រេចប្តូរមុខផ្លូវនេះដោយចំណាយថវិកាបន្ថែម ៥៧លានដុល្លារ៕

អត្ថបទ៖ សំភី