ក្រុមហ៊ុន​ Booyong របស់កូរ៉េខាងត្បូង បាន​ផ្តល់​រថយន្ត​ក្រុង​ ១០០០គ្រឿង ដែល​ជាប្រភេទថ្មី ជូន​រាជរដ្ឋាភិបាលកម្ពុជា។ ពិធី​ចុះហត្ថលេខាប្រគល់-ទទួលរថយន្តក្រុងនេះ ធ្វើឡើង​កាលពីថ្ងៃទី២៩ ខែមិថុនា ឆ្នាំ​២០២៣ រវាង​ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តី​ក្រសួង​សេដ្ឋកិច្ច និងហិរញ្ញវត្ថុ តំណាង​ឱ្យរាជរដ្ឋាភិបាលកម្ពុជា និង​លោក Lee Joon Keun ប្រធាន​ក្រុមប្រឹក្សាភិបាល​ក្រុមហ៊ុន ប៊ូ យ៉ុង ខែ្មរII ខូអិលធីឌី ដែល​ជាបុត្រសម្ព័ន្ធ​របស់​ក្រុមហ៊ុន Booyoung Group នៃសាធារណរដ្ឋកូរ៉េ។

ការ​ផ្តល់ជូនរថយន្ត​ក្រុងនេះ ​បែងចែក​ជា ៣ដំណាក់កាល​គឺ ក្នុងឆ្នាំ២០២៣ ចំនួន ៤០០គ្រឿង, ឆ្នាំ២០២៤ ចំនួន ៣០០គ្រឿង និង​ឆ្នាំ២០២៥ ចំនួន ៣០០គ្រឿង។ នេះបើយោងតាម​សេចក្តី​ប្រកាសព័ត៌មាន​របស់​ក្រសួងសេដ្ឋកិច្ច។

រថយន្ត​ក្រុង​ទាំងនេះ នឹង​ត្រូវបែងចែក​ជូន​ទៅគ្រប់រាជធានី-ខេត្ត ដោយរៀបចំជា​យន្តការក្នុងការផ្តល់ «សេវាដឹកជញ្ជូន​សាធារណៈ» ដើម្បីជួយសម្រួលដល់ការធ្វើដំណើរ​របស់​ប្រជាពលរដ្ឋ​ នៅតាមមូលដ្ឋានរាជធានី-ខេត្ត។ ជាមួយគ្នានេះ តាមខេត្តនីមួយៗ ក៏អាចបទពិសោធន៍​របស់រដ្ឋបាលរាជធានីភ្នំពេញ ឬតាមជម្រើសសមស្រប​ផ្សេងទៀត៕

អត្ថបទ៖ សំភី