មូលហេតុ៤យ៉ាង ដែលបណ្តាលឱ្យលោតសញ្ញាឆេក ABS

2023-07-13 09:05:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រព័ន្ធហ្វ្រាំង ឬហ្វ្រាំងកៀប ABS ជាប្រព័ន្ធដែលដាក់នៅលើហ្វ្រាំងជើង ការពារកុំឲ្យកង់ជាប់គាំង ដែលអាចបណ្ដាលឲ្យរថយន្តអូសទៅមុខ មិនអាចបញ្ជាចង្កូតបាន នៅពេលជាន់ហ្វ្រាំងភ្លាមៗ។ ប្រព័ន្ធនេះមានប្រសិទ្ធភាពបំផុត នៅពេលដែលផ្លូវមានសភាពរអិល ព្រោះវានឹងជួយមិនឲ្យរថយន្តបាត់លំនឹង ពេលជាន់ហ្វ្រាំងភ្លាមៗ។

យ៉ាងណាមិញរថយន្តដែលបំពាក់ហ្វ្រាំង ABS នេះ ភាគច្រើនក៏នឹងមានលោតសញ្ញាឆេក ABS នៅក្នុងកុងទ័ររថយន្តផងដែរ ដែលវាបញ្ជាក់ពីភាពមិនប្រក្រតីណាមួយរបស់ប្រព័ន្ធនេះហើយ ប៉ុន្តែមិនមែនឱ្យតែលោតសញ្ញាឆេក ABS គឺត្រូវតែប្តូរចោលនោះទេ។

ជាទូទៅ រថយន្តដែលមានឆេក ABS គឺមានមូលហេតុ ៤យ៉ាងដូចខាងក្រោម៖

ម៉ូឌីល ABS

គ្រឿងបង្គុំ ABS មានការភ្ជាប់គ្នាជាមួយប្រព័ន្ធមួយផ្សេងទៀតរបស់រថយន្ត គឺប្រព័ន្ធទប់លំនឹងពេលបត់ ឬរអិល (traction control) ដូច្នេះវាក៏ប្រើម៉ូឌីល (Module) រួមគ្នាផងដែរ។ អ៊ីចឹងពេលខ្លះ វាជាបញ្ហារបស់ប្រព័ន្ធ Traction Control ទេ តែក៏បណ្តាលឱ្យលោតឆេក ABS ដូចគ្នា។

កម្រិតប្រេងហ្វ្រាំងទាប

នៅពេលរថយន្តពុំមានប្រេងហ្វ្រាំងគ្រប់គ្រាន់ នោះដំណើរការនៃប្រព័ន្ធហ្វ្រាំង ឬការចាប់ហ្វ្រាំង មិនបានរលូនល្អល្អនោះទេដែលអាចបង្កគ្រោះថ្នាក់បាន ពេលនោះសេនស័ររបស់វានឹងបញ្ជូនព័ត៌មានមក ហើយបញ្ចេញសញ្ញាឆេក ABS។ ចំពោះការបាត់ប្រេងហ្វ្រាំងនេះ ក៏មានមូលហេតុរបស់វាដែរ ដែលត្រូវចូលការ៉ាស់ឱ្យជាងត្រួតពិនិត្យមើលជាក់ស្តែង។ បញ្ហាប្រេងហ្វាំងនេះទៀតសោត ប្រសិនបើវាអស់គុណភាព ហើយនៅតែបន្តប្រើទៀតនោះ អាចបណ្តាលឱ្យខូចដុំ ABS តែម្តង។

ខូចសេនស័រល្បឿនកង់

វាជាសេនស័រដែលបង្ហាញប្រាប់ពីការវិលជុំរបស់កង់រថយន្ត។ ប្រសិនបើសេនស័រនេះ បានក្លាយជាកខ្វក់ ឬឈប់ធ្វើការ ពេលនោះវាមិនអាចបង្ហាញព័ត៌មានត្រឹមត្រូវឡើយ ហើយក៏ប៉ះពាល់ដល់ប្រព័ន្ធហ្វ្រាំង ABS ផងដែរ ព្រមទាំងលោតចេញសញ្ញាឆេកនេះទៀតផង។

ប្រព័ន្ធ ABS ត្រូវបានបិទ

សម្រាប់រថយន្តដែលមានជម្រើសក្នុងការបិទបើកប្រព័ន្ធ ABS ឬប្រព័ន្ធ Traction Control គឺអ្នកប្រើប្រាស់អាចច្រឡំបិទ ឬចង់បិទប្រព័ន្ធនេះចោល ឬក៏អាចមានការដាច់ខ្សែកន្លែងណាមួយនៃប្រព័ន្ធនេះ។ ដូច្នេះ វានឹងលោតសញ្ញាឆេក ABS ព្រមានអ្នកបើកបរថា មុខងារសុវត្ថិភាពដ៏សំខាន់ កំពុងមិនដំណើរការ។ តែយ៉ាងណាក៏ត្រូវឱ្យជាងឆែកមើលសិនដែរ ក្រែងលោវាមានបញ្ហាអី្វផ្សេងទៀត៕