កប៉ាល់​ Fremantle Highway ត្រូវបានឆេះ​នៅកណ្តាលសមុទ្រ​កាលពី​ចុងខែកក្កដា​កន្លងទៅ ដោយការស៊ើប​អង្កេត​បឋម​ បង្ហាញ​ថា អគ្គិភ័យនេះ​កើតឡើង​ដោយសារតែ​រថយន្ត​អគ្គិសនីមួយ​ ខណៈកប៉ាល់​នេះ​បានដឹក​រថយន្តចំនួន ៣៨០០​គ្រឿង ក្នុងនោះ ៥០០គ្រឿង​ជារថយន្ត​អគ្គិសនី។

រថយន្ត​ដែល​ផ្ទុក​នៅលើកប៉ាល់​នេះ គឺសុទ្ធតែជារថយន្តប្រណីតដូចជា Rolls-Royce, BMW, Mercedes-Benz និង Volkswagen ជាដើម។

ឧបទ្ទវហេតុនេះ បានកើតឡើង​នៅចម្ងាយ ២៧គីឡូម៉ែត្រ​ពីកោះ Ameland ប្រទេសហូរឡង់។ យ៉ាងណាក៏ដោយ កប៉ាល់​នេះ​មិនបាន​ឆេះអស់ទាំងស្រុងឡើយ ហើយក៏មាន​រថយន្ត​ជាច្រើន​រយគ្រឿង ត្រូវបានសង្គ្រោះទាន់ពេលផងដែរ។ មនុស្សម្នាក់​ត្រូវបាន​ស្លាប់​ក្នុងហេតុការណ៍នេះ ហើយ​ក្រៅពីនោះ គឺ​បាន​លោត​ចូល​ទៅក្នុងសមុទ្រ។

ក្រុមហ៊ុន BMW និង Mercedes-Benz បាន​បញ្ជាក់​ថា រថយន្ត​របស់​ពួកគេ​រាប់រយ​គ្រឿង ត្រូវបាន​ឆាបឆេះ​អស់។ ដោយឡែក Rolls-Royce មិនបានបង្ហាញពីទំហំ​ខូចខាតរថយន្តរបស់ខ្លួនឡើយ គ្រាន់តែលើកឡើងថា ពួកគេ​កំពុងទាក់ទង​ទៅ​អតិថិជន​ដែល​រងផលប៉ះពាល់៕

អត្ថបទ៖ សំភី