ក្រុមកីឡាករប៊ូលកងយោធពលខេមរភូមិន្ទ បើកឆាកឈ្នះខេត្តតាកែវ ១៣-០៤ ព្រឹកមិញនេះ

2023-11-16 04:21:36
ចំនួនមតិ 0 | ចំនួនចែករំលែក 0

ចន្លោះមិនឃើញ

បើកឆាកការប្រកួតជើងឯកថ្នាក់ជាតិ ឆ្នាំ២០២៣ របស់សហព័ន្ធកីឡាប៊ូល និងប៉េតង់ ព្រឹកមិញនេះគឺក្រុមកងយោធពលខេមរភូមិន្ទ បានយកឈ្នះក្រុមមកពីខេត្តតាកែវ ដោយលទ្ធផល ១៣-០៤ លើវិញ្ញាសាបុរស ៣ទល់៣។

កីឡាករប៊ូលកងយោធពលខេមរភូមិន្ទ

ឯកឧត្ដម សុខ សូកាន ប្រធានសហព័ន្ធកីឡាប៊ូល និងប៉េតង់កម្ពុជា បានឲ្យដឹងថា ការប្រកួតជ្រើសរើសជើងឯកថ្នាក់ជាតិនេះធ្វើឡើងក្នុងគោលបំណងធំលើកស្ទួយវិស័យកីឡាប៊ូល និងប៉េតង់ បង្កើនទំនាក់ទំនងរវាងសម្ព័ន្ធ ក្លឹប និងផ្តល់ឱកាសដល់កីឡាករ កីឡាការិនី ចូលរួមប្រកួតប្រជែង ដុសខាត់សមត្ថភាព។

កីឡាករខេត្តតាកែវ

បន្ថែមពីនេះទៅទៀតក៏ជាឱកាសសម្រាប់សហព័ន្ធសម្លឹងមើលអ្នកមានសមត្ថភាពដើម្បីជ្រើសរើសឲ្យចូលប្រមូលផ្ដុំក្នុងក្រុមជម្រើសជាតិ ឬថ្នាលហ្វឹកហាត់ត្រៀមការប្រកួតផ្សេងៗនៅពេលខាងមុខជាដើម។ ដូច្នេះហើយសូមកីឡាករ កីឡាការិនីដែលចូលរួមទាំងអស់ត្រូវប្រឹងប្រែងប្រកួតឲ្យអស់ពីសមត្ថភាពក្នុងឱកាសនេះ។

កីឡាករខេត្តតាកែវ

រំលឹកដែរថា សហព័ន្ធកីឡាប៊ូល និងប៉េតង់កម្ពុជា បានបើកការប្រកួតជ្រើសរើសជើងឯកថ្នាក់ជាតិរបស់ខ្លួនហើយកាលពីព្រឹកមិញនេះ។ ការប្រកួតនេះធ្វើឡើងរយៈពេល ៣ថ្ងៃចាប់ពីថ្ងៃទី១៦ ដល់ ១៨ ខែវិច្ឆិកា ឆ្នាំ២០២៣ នៅក្នុងពហុកីឡដ្ឋានជាតិ។ សម្រាប់ការប្រកួតឆ្នាំនេះគឺមាន សម្ព័ន្ធ ក្លឹប ចូលរួមសរុប ៥៣ មកពី ១២ រាជធានីខេត្ត និង ៣ ស្ថាប័ន សរុបប្រតិភូ កីឡាករ កីឡាការិនីមាន ៧០១នាក់៕