ការប្រកួត​រចនាគំនូរសុបិនស្រ្តី លើកទី១០ ឆ្នាំ​២០២៣ (Dream Girls Design Contest 2023) បាន​រកឃើញ​ម្ចាស់ជ័យលាភីហើយ បន្ទាប់ពីត្រូវគណៈកម្មការ​ បាន​វាយតម្លៃយ៉ាងល្អិតល្អន់បំផុត​ក្នុងការជ្រើសរើស។

ក្នុងពិធីប្រគល់​រង្វាន់​ដែលធ្វើឡើង​នៅថ្ងៃទី១៩ ខែវិច្ឆិកា ឆ្នាំ​២០២៣ គណៈកម្មការ​បាន​សម្រេច​ជ្រើសរើស​បេក្ខនារី ២រូប ឱ្យជាប់​ចំណាត់ថ្នាក់ទី២ស្ទួន និង៣រូប ចំណាត់​ថ្នាក់លេខ៣ស្ទួន ពោលគឺ​មិនមាន​អ្នកទទួលបានចំណាត់ថ្នាក់លេខ១ឡើយ។

បេក្ខនារី ចំនួន២រូប ដែល​ទទួលចំណាត់ថ្នាក់លេខ២ រួមមានឈ្មោះ មៀន គីមចេង អាយុ២១ឆ្នាំ និងឈ្មោះ ភាព ស្រីរ័ត្ន អាយុ២២ឆ្នាំ។ រង្វាន់ទទួលបាន គឺ​ទឹកប្រាក់ ៣០០ដុល្លារ។

ចំណែក​បេក្ខនារី៣រូប​ដែល​ជាប់ចំណាត់ថ្នាក់លេខ៣ បានទៅលើឈ្មោះ ខាត់ រីណា អាយុ២៥ឆ្នាំ, ឈ្មោះ ខៀវ សេរីរត្នសៅវត្តី អាយុ២០ឆ្នាំ និងឈ្មោះ កៀន ដាវី អាយុ ២៣ឆ្នាំ។ រង្វាន់ទទួលបាន​គឺទឹកប្រាក់ ១០០ដុល្លារ។

បើតាម​លោកស្រី Wakana Nukui ស្ថាបនិក Dream Girl Project បាន​បញ្ជាក់​ថា រូបគំនូរ​របស់​ Kimcheng និង Sreyrath គឺ​ស្អាត​ខ្លាំង និង​មាន​អត្ថន័យ​ស្របតាមប្រធានបទ​ដែលឆ្នាំនេះ​ផ្តោតទៅលើ «អច្ឆរិយកម្ពុជា» ដែលសឹងតែ​អាច​ទទួលបានចំណាត់ថ្នាក់លេខ១​ទៅហើយ គ្រាន់តែនៅ​មាន​ចំណុចខ្វះខាតបន្តិច​ប៉ុណ្ណោះ។

ចំពោះអ្នកឈ្នះក្នុងកម្មវិធីការប្រកួតរចនាគំនូរសុបិនស្ត្រី ក៏ទទួលបានឱកាសការរៀនសូត្រ និងអាហារូបករណ៍ក្នុងសាលាសិល្បៈ។ អ្វីកាន់តែអស្ចារ្យ គឺស្មាដៃរបស់បេក្ខនារី​មួយចំនួន ក៏បានយកទៅប្រើប្រាស់ក្នុងផលិតផលនៅហាង Amazing Cambodia ទាំង៧ ដែលទីតាំងនៅផ្សារទំនើប AEON និងព្រលានយន្តហោះ។ អ្នករៀបចំ គឺលោកស្រី WaKana Nukui ម្ចាស់ក្រុមហ៊ុន Blooming Life និង អ្នកនាង ហ៊ាង វត្តី ម្ចាស់ក្រុមហ៊ុន រៀល ថាយហ្គើរ។

ថ្លែងប្រាប់​អ្នកកាសែត​ក្នុងកម្មវិធីនេះដែរ អ្នកស្រី Wakana Nukui បាន​និយាយថា អ្នកស្រី​បានមកកម្ពុជាលើកដំបូង​ក្នុងឆ្នាំ​២០០៩ ហើយពេលនោះ​អ្នកស្រី​បានទៅទស្សនាប្រាសាទអង្គរវត្ត និងបានឃើញក្បាច់រចនាយ៉ាងស្រស់ស្អាត។ ពេលនោះ អ្នកស្រីយល់ឃើញ​ថា ស្រី្តកម្ពុជា​​មាន​សមត្ថភាព​អាច​រចនាគំនូរ​បាន និងទទួលបាន​កម្រៃសម្រាប់ជីវភាព​គ្រួសារ។​ ហេតុនេះ វា​បានជំរុញ​ឱ្យ​អ្នកស្រី បង្កើតកម្មវិធី​នេះឡើង ដើម្បីឱ្យស្រ្តីខ្មែរ បង្ហាញ​ពីទេពកោសល្យ​របស់ខ្លួន។

អ្នកនាង ហ៊ាង វត្តី ម្ចាស់​ក្រុមហ៊ុន រៀល ថាយហ្គើរ និង​​ជាអតីត​ជ័យលាភីលេខ៣ ក្នុងកម្មវិធីការ​ប្រកួត​រចនាគំនូរ​សុបិន​ស្រ្តីឆ្នាំ២០១៣ បាន​និយាយថា តាមរយៈការចូលរួមប្រកួតប្រជែង​នេះ បាន​ធ្វើឱ្យអ្នកនាង​មានក្តីសង្ឃឹម និង​មានក្តីរីករាយ​ដែលស្នាដៃរបស់ខ្លួន ត្រូវបានគេទទួលស្គាល់។ មិនតែប៉ុណ្ណោះ វាបានធ្វើឱ្យ​អ្នកនាង​មានភាពក្លាហាន​ចេញបើកក្រុមហ៊ុនអាជីវកម្មខ្លួនឯង និង​យកស្នាដៃ​គំនូររបស់ខ្លួនទៅបង្ហាញ។

គួរបញ្ជាក់ថា ការប្រកួតរចនាគំនូរសុបិនស្ត្រី (Dream Girls Design Contest) បានប្រព្រឹត្តឡើងវិញម្តងទៀត នៅថ្ងៃទី១៩ ខែវិច្ឆិកា ឆ្នាំ២០២៣ បន្ទាប់ពីការរី​ករាល​ដាល​ជំងឺកូវីដ រយៈពេល៣ឆ្នាំកន្លះ៕

អត្ថបទ៖ សំភី