សារមន្ទីរសិល្បៈ Metropolitan នៃទីក្រុងញូវយ៉ក សហរដ្ឋអាមេរិក បាននិយាយកាលពីពេលថ្មីៗនេះថា ខ្លួននឹងប្រគល់ស្នាដៃសិល្បៈរូបចម្លាក់បុរាណ ចំនួន១៦ ទៅប្រទេសកម្ពុជា និងប្រទេសថៃ បន្ទាប់ពីពួកគេត្រូវបានជួញដូរ ដោយឈ្មួញនិងអ្នកប្រមូលរូបសិល្បៈបុរាណម្នាក់ដែលត្រូវបានចោទប្រកាន់ពីបទដំណើរការបណ្តាញជួញដូរវត្ថុបុរាណដ៏ធំមួយចេញពី អាស៊ីអាគ្នេយ៍។

ការធ្វើមាតុភូមិនិវត្តន៍ថ្មីបំផុតនៃស្នាដៃសិល្បៈនេះកើតឡើងនៅពេលដែលសារមន្ទីរជាច្រើននៅសហរដ្ឋអាមេរិក និងអឺរ៉ុបគិតគូជាមួយនឹងការប្រមូលវត្ថុបុរាណដែលលួចពីអាស៊ី អាហ្រ្វិក និងកន្លែងផ្សេងទៀតក្នុងអំឡុងពេលសម័យអាណានិគមនិយម និងក្នុងគ្រាមានចលាចល។

យោងតាមសារមន្ទីរ Manhattan បានឱ្យដឹងថា រូបចម្លាក់ខ្មែរចំនួន ១៤ នឹងត្រូវប្រគល់មកកម្ពុជាវិញ ហើយរូបចម្លាក់ចំនួនពីរនឹងត្រូវប្រគល់ជូនប្រទេសថៃវិញ។ការធ្វើមាតុភូមិនិវត្តន៍នៃវត្ថុបុរាណ មានជាប់ពាក់ព័ន្ធជាមួយនឹងឈ្មួញ Douglas Latchford ដែលត្រូវបានចោទប្រកាន់នៅឆ្នាំ ២០១៩ ពីបទរៀបចំផែនការរយៈពេលជាច្រើនឆ្នាំដើម្បីលក់វត្ថុបុរាណខ្មែរដែលត្រូវបានលួច នៅលើទីផ្សារសិល្បៈអន្តរជាតិ។

នាពេលកន្លងមក សារមន្ទីរសិល្បៈ Metropolitan មិនត្រឹមតែទទួលស្គាល់ពីសារៈសំខាន់នៃវត្ថុបុរាណខ្មែរទាំង ១៣ មុខ ដែលត្រូវបានលួចដោយឥតអៀនខ្មាសប៉ុណ្ណោះទេ ប៉ុន្តែថែមទាំងបានស្ម័គ្រចិត្តប្រគល់វត្ថុទាំងនោះវិញ ដែលជាផ្នែកនៃកិច្ចសហប្រតិបត្តិការបន្តទៅម្ចាស់កម្មសិទ្ធិត្រឹមត្រូវ គឺប្រជាជនកម្ពុជា៕

ប្រភព៖ BBC   អត្ថបទ ៖ សង្ហា