អ្នកនិពន្ធបទចម្រៀង ងាកមកបង្កើតក្រុមបាល់ទាត់ ប្រកួតឈ្នះគូប្រកួត លទ្ធផលត្រចះត្រចង់

2024-01-19 07:23:46
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមួយរយៈនេះ មានមនុស្សក្រៅវិស័យច្រើនណាស់ហក់ចូលបាល់ទាត់ ក្នុងនោះមានក្រុម "ផ្ការីកគ្រប់រដូវ" របស់ ពាក់មី ក្រុមបាល់ទាត់ "កីឡាគុនខ្មែរ" ឥឡូវនេះ មានក្រុមថ្មីទៀតដឹកនាំដោយអ្នកនិពន្ធចម្រៀង ទើបបង្កើតឡើងថ្មីៗទៀត។

ក្រុមបាល់ទាត់របស់ក្រុមសិល្បករថ្មីនេះមានឈ្មោះថា "THO MEET.FC” ជាក្រុមបង្កើតឡើងដោយលោក THO MEET អ្នកនិពន្ធបទចម្រៀងល្បីឈ្មោះនៅផលិតកម្មរស្មីហង្សមាស។ ក្រុមនេះ ទើបបង្កើតបានប្រមាណ១ខែ មានសមាជិកសរុបជាង ២០នាក់ ក្នុងនោះមានអ្នកនិពន្ធ អ្នកចម្រៀង អ្នកភ្លេង តារាសម្ដែង និងខ្លះទៀតមកពីស្ថាប័នរដ្ឋ។

តាមលោក THO MEET ដែលជាស្ថាបនិក បានប្រាប់ឲ្យដឹងថា លោកមានចក្ខុវិស័យវែងឆ្ងាយចំពោះការបង្កើតក្រុមបាល់ទាត់នេះឡើង ក្នុងនោះទី១ គឺដើម្បីសុខភាព នាំយុវជនចៀសឆ្ងាយពីគ្រឿងញៀន និងអំពើអបាយមុខផ្សេងៗ។ ទី២ ដើម្បីរឹតចំណងទាក់ទងក្នុងរង្វង់សិល្បករដូចគ្នា ពិសេសគឺទំនាក់ទំនងរវាងតារាចម្រៀង និងអ្នកនិពន្ធទាំងអស់។ និងធំជាងគេ ទី៣ ដើម្បីជាចំណែកមួយជួយរកមូលនិធិជួយដល់មន្ទីរពេទ្យគន្ធបុប្ផា និងកុមារកំព្រា។ ដូច្នេះហើយ លោករីករាយ ប្រសិនបើមានម្ចាស់ស្បុនស័រណា ចាប់អារម្មណ៍ធ្វើការឧបត្ថម្ភដាក់ស្លាកយីហោ ផលិតផល ឬសេវាកម្មផ្សេងៗលើអាវក្រុមបាល់ទាត់ "THO MEET.FC”។

ជាក្រុមបាល់ទាត់ថ្មីថ្មោង "THO MEET FC” មកដល់ពេលនេះ ទើបប្រកួតបាន១ប្រកួតប៉ុណ្ណោះ ជាមួយក្រុមបាល់ទាត់ "រាហ៊ូ FC” ដោយទទួលលទ្ធផលត្រចះត្រចង់ ឈ្នះគូរប្រកួតក្នុងលទ្ធផល ០៦ ទល់នឹង ១៤ គ្រាប់។ នេះជាការចាប់ផ្ដើមយ៉ាងល្អនៃ ក្រុមបាល់ទាត់ "THO MEET FC” របស់អ្នកនិពន្ធផលិតកម្មរស្មីហង្សមាស។ យ៉ាងណា នៅដើមសប្ដាហ៍ក្រោយនេះ ក្រុមបាល់ទាត់មួយនេះ នឹងត្រូវជួបតតាំងជាមួយ ក្រុមបាល់ទាត់ "ផ្ការីកគ្រប់រដូវ" របស់នាយ ពាក់មី។

ចំពោះការប្រកួតសប្ដាហ៍ក្រោយនេះ លោក THO MEET មិនហ៊ាននិយាយអ្វីច្រើនទេ ព្រោះថានរណាក៏ដឹងថា ក្រុមផ្ការីកគ្រប់រដូវ របស់ ពាក់មី ជាក្រុមខ្លាំង មានកីឡាករល្អៗច្រើន។ យ៉ាងណា លោកបញ្ជាក់ថា នឹងប្រឹងប្រែងឲ្យអស់លទ្ធភាពក្នុងការប្រកួតដ៏ស្វិតស្វាញមួយនេះ។

ការប្រកួតរវាង THO MEET FC vs ផ្ការីកគ្រប់រដូវ ធ្វើឡើងនៅថ្ងៃទី ២២ មករា ២០២៤ វេលាម៉ោង ៦ល្ងាច នៅតារាងរបស់ក្រុមបាល់ទាត់ "ផ្ការីកគ្រប់រដូវ" ផ្ទាល់តែម្ដងនៅគីឡូម៉ែត្រលេខ៦៕