ឯកឧត្តម ផន រឹម អ្នកនាំពាក្យ​ក្រសួងសាធារណការ និងដឹកជញ្ជូន បាន​ឱ្យដឹង​កាលពីថ្ងៃទី២៥ ខែមករា ឆ្នាំ​២០២៤​ថា តាមគម្រោងសិក្សាផ្លូវល្បឿនលឿន​តភ្ជាប់ពីរាជធានីភ្នំពេញ-សៀមរាប- ប៉ោយប៉ែត ប្រវែង​សរុបប្រមាណ ៤២០គីឡូម៉ែត្រ មាន​ចំណុច​ចាប់ផ្តើម​ខាងជើង​ផ្លូវក្រវាត់ក្រុងទី៣ រាជធានី​ភ្នំពេញ និងចំណុចបញ្ចប់​នៅក្រុង​ប៉ោយប៉ែត(ព្រំដែនកម្ពុជា-ថៃ)។

ឯកឧត្តម​បាន​បញ្ជាក់​ថា គម្រោងផ្លូវល្បឿនលឿនទី៣នេះ នឹង​ឆ្លងកាត់រាជធានីភ្នំពេញប្រវែង ៣​គីឡូម៉ែត្រ ខេត្តកណ្ដាល ១៨ គីឡូម៉ែត្រ ខេត្ត​កំពង់ចាម ៤៣​គីឡូម៉ែត្រ ខេត្តកំពង់ធំ ១៣១គីឡូម៉ែត្រ ខេត្តសៀមរាប ១៣០ ​គីឡូម៉ែត្រ ខេត្តបន្ទាយមានជ័យ ៩៥​គីឡូម៉ែត្រ។ គម្រោង​នេះ ធ្វើឡើង​ក្រោមយន្តការ​ភាពជាដៃគូរវាងរដ្ឋ និងឯកជន (PPP)។

គម្រោង​ផ្លូវល្បឿនលឿននេះ គឺបែងចែកជាពីរដំណាក់កាល រួមមាន ដំណាក់កាលទី១ ពីរាជធានី​ភ្នំពេញ ទៅ​ក្រុងសៀមរាប និង​ដំណាក់កាលទី២ បន្តពីក្រុងសៀមរាប ទៅក្រុងប៉ោយប៉ែត។

គួរ​រំលឹកថា កាលពី​ថ្ងៃទី៧ ខែមិថុនា ឆ្នាំ​២០២៣ កន្លងទៅ រាជរដ្ឋាភិបាល​កម្ពុជា តាម​រយៈ​ក្រសួង​សាធារណការ និងដឹកជញ្ជូន បាន​ចុះកិច្ចព្រមព្រៀង​ក្របខណ្ឌ​លើ​គម្រោង​សាងសង់​ផ្លូវល្បឿនលឿន​ពី ​ភ្នំពេញ-សៀមរាប-ប៉ោយប៉ែត ជាមួយ​ក្រុមហ៊ុនសាជីវកម្ម​ស្ពាន និងថ្នល់​ចិន (CRBC)។

បច្ចុប្បន្ន​គម្រោងនេះ​ត្រូវបាន​ក្រុមហ៊ុន​ស្ពាន​និងថ្នល់ចិន CRBC កំពុងអនុវត្ត​ការសិក្សា​បឋម​សមិទ្ធិ​លទ្ធភាព (Preliminary Feasibility Study-PSF) ហើយ​គ្រោង​នឹង​បញ្ចប់​ការសិក្សា​កំណាត់​ភ្នំពេញ-សៀមរាប ក្នុងខែកុម្ភៈ និងកំណាត់​សៀមរាប-ប៉ោយប៉ែត ក្នុងខែឧសភា ឆ្នាំ​២០២៤ខាងមុខ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB

អត្ថបទ៖ សំភី