Neymar ជួយ Alves ១៥ម៉ឺនអឺរ៉ូក្នុងដំណើរការក្ដីក្ដាំរឿងរំលោភបំពានផ្លូវភេទ

2024-02-23 10:57:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធប្រេស៊ីលកីឡាករ Neymar បានផ្ទេរទឹកប្រាក់ចំនួន ១៥ម៉ឺនអឺរ៉ូ (១៦៤ ០០០ដុល្លារអាមេរិក) ទៅកាន់តុលាការអេស្ប៉ាញ ដើម្បីជួយអតីតមិត្តរួមក្រុមរបស់ខ្លួនគឺ លោក Dani Alves ក្នុងដំណើរការក្ដីក្ដាំរឿងរំលោភបំពានផ្លូវភេទ។ នេះបើតាមការចុះផ្សាយរបស់សារព័ត៌មានប្រេស៊ីល UOL។

ប្រភពខាងលើបានឱ្យដឹងថា Neymar បានផ្ទេរទឹកប្រាក់ ១៥ម៉ឺនអឺរ៉ូទៅកាន់តុលាការអេស្ប៉ាញ ក្រោមហេតុផលថា «ទឹកប្រាក់សងជំងឺចិត្ត»។ មានមតិមួយចំនួនយល់ថា ជាមួយនឹងទំហំទឹកប្រាក់បែបនេះ តុលាការអេស្ប៉ាញជួយបន្ធូរបន្ថយទោសទណ្ឌចំពោះ Alves ដោយហេតុថា ដំបូងឡើយខាងតុលាការចង់ដាក់ទោស អតីតខ្សែការពារប្រេស៊ីលរូបនេះរយៈពេល ១២ឆ្នាំ តែក្រោយមកក៏សល់ត្រឹមតែ ៤ឆ្នាំកន្លះ។

អតីតខ្សែការពារក្លឹប Barcelona និងក្រុមជម្រើសប្រេស៊ីលលោក Dani Alves ត្រូវបានតុលាការទីក្រុងបាសេឡូណាកាត់ទោសឱ្យជាប់ពន្ធនាគាររយៈពេល ៤ឆ្នាំ ៦ខែ ពីបទរំលោភបំពានផ្លូវភេទ។

រឿងរំលោភបំពានផ្លូវភេទនេះបានកើតឡើង កាលពីថ្ងៃ៣១ ខែធ្នូ ២០២២ ដោយ Alves បានជួប និងរាំជាមួយនារីម្នាក់នៅក្លឹបមួយនៅក្នុងក្រុងបាសេឡូណា។ បន្តមកទៀត Alves បានហៅនារីនោះទៅបន្ទប់ទឹក ហើយនាងនោះក៏ព្រមទៅជាមួយ។ ប៉ុន្តែក្រោយមក ពេលដែលនាងនោះចង់ចេញពីបន្ទប់ទឹក Alves ក៏បដិសេធ ហើយក៏ទះកំផ្លៀងនាង ជេរប្រមាថនាង ហើយបន្តទៀតក៏បានប្រព្រឹត្តិទង្វើរមិនគប្បី ផ្ទុយពីឆន្ទៈរបស់នារីនោះ។

ខាង Alves ដំបូងបដិសេធថារឿងនេះមិនបានកើតឡើង តែក្រោយមកក៏សារភាពថា រឿងនេះបានកើតឡើងមែន តែធ្វើឡើងក្រោមការព្រមព្រៀងគ្នា។

Alves ត្រូវបានចាប់ខ្លួន ហើយជាប់ក្នុងពន្ធនាគារតាំងពីខែមករា ឆ្នាំ២០២៣។

សូមជម្រាបផងដែរថា Alves ជាតារាបាល់ទាត់ដ៏ឆ្នើមមួយរូប ដោយឈ្នះពានជាច្រើនជាមួយក្លឹប Barcelona និងក្រុមជម្រើសជាតិប្រេស៊ីល។ យ៉ាងណាមិញ រឿងអាស្រូវនេះបានបញ្ចប់អាជីពបាល់ទាត់របស់បុរសវ័យ ៤០ឆ្នាំរូបនេះ៕

ប្រភព៖ Goal អត្ថបទ៖ សេរី មង្គល