នៅសល់៣ថ្ងៃទៀតទេ គួន ម៉ុម នឹងឡើងទៅលេងលីគវៀតណាម

2024-03-08 04:23:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកថ្ងៃច័ន្ទទី១១ ខែមីនា ឆ្នាំ២០២៤ខាងមុខ កីឡាករដ៏ល្អប្រចាំក្រុមជម្រើសជាតិកម្ពុជានិងសមាគមបាល់ទះវិសាខា គួន ម៉ុម នឹងឡើងយន្តហោះទៅលេងនៅលីគប្រទេសវៀតណាម ពោលគឺនៅសល់ពេលតែ៣ថ្ងៃទៀតប៉ុណ្ណោះ។

បើតាមការឱ្យដឹងពីស្មាត់កើតនៅខេត្តតាកែវ គេបានចុះកុងត្រាលេងឱ្យក្លឹប Long An ជើងទីមួយរយៈពេល១ខែ ខណៈតម្លៃខ្លួនគេទទួលបានខ្ទង់ម៉ឺនដុល្លារឯណោះ។

ទៅក្លឹបនេះកីឡាករកើតនៅឆ្នាំ១៩៩៨ កម្ពស់១,៩៨ម៉ែត្រនឹងលេងជាមួយកីឡាករជំនាញប៉ះសេដែលមកលេងឱ្យសមាគមបាល់ទះក្រសួងមហាផ្ទៃក្នុងពានរង្វាន់តេជោលីគហ្វាមថយឃឿងដែរ។

គួន ម៉ុម បានបញ្ជាក់ថា ៖"...ទៅពេលព្រឹកថ្ងៃ១១ សល់៣ថ្ងៃទៀត លេង១ខែ...នៅ Long An ដដែល លេងជាមួយឃឿងជាមួយអីដែលគាត់មកខ្មែរយើងលេងឱ្យមហាផ្ទៃថ្ងៃមុនបង»។

ហ្វាម ថយ ឃឿង និង គួន ម៉ុម

នេះជាលើកទី២ហើយសម្រាប់កីឡាករ គួន ម៉ុម ក្នុងការចេញទៅលេងឱ្យក្លឹបអាជីពវៀតណាមមួយនេះ ហើយគេប្ដេជ្ញានឹងធ្វើឱ្យបានល្អសម្រាប់ក្លឹប Long An និងយកបទពិសោធន៍ល្អថ្មីៗនៅទីនោះ មកអភិវឌ្ឍបាល់ទះនៅកម្ពុជា៕

អត្ថបទ៖ Um Sopheak